Пересьмон солы шумпотон гинэ вае

Волкова Нина Васильевна вордӥськиз 1941-тӥ арын 19-тӥ толшоре Улын Ушма гуртын. Улыны нокытын вал, анаеныз но сузэреныз ӵош ферма коркан улӥзы. Колхозлэн Улын Ушма гуртысь фермаяз столовой лэсьтэмзы бере, отын сиён пӧзьтӥсь луыса ужаз. 

Петров Николай Александровичлэн, со аръёсы фермаен кивалтэм муртлэн, тодэ ваёнъёсысьтыз: 

«Нырысь ик картофка дасяз, сыӵе ческыт сиськизы ужасьёс. 10 ар ӵош ужамы. Нина Васильевна 1976-тӥ арын ортчем социальной ӵошатсконъёслэн ударникез но луэ. 1988-тӥ арын семья подряд амалэз улонэ пыӵатӥзы но Нина Васильевналэн семьяез (ачиз но кенэз — скал кыскисьёс, пиосыз — возчикъёс), быдэсак 6-тӥ корпусэз басьтыса, та амалэн кунян будэтыны кутскиз. Лыдъяны кутскизы котькуд копейказэс: ю тысь, оборудование понна асьсэлы тыроно вал. Уждун умой вал. Соос сьӧры бызьылоно ӧй вал, асьсэды асьсэос обслуживать каризы». 

Нина Васильевна тодаз вае: 

«Нуналаз куинь пол скал кыскылӥм. Доре бертӥськод, нош отын кезьыт, сиён ӧвӧл, гур эстоно». 

Кышномурт будэтӥз 8 нылпи: пӧлазы вань медработникъёс но, пудо утисьёс но. Солэн 13 внукъёсыз, 9 правнукъёсыз. Эмеспиез СВО-ын. Пусъемын 2-тӥ но 3-тӥ степенё «Материнская слава» орденэн. 

Сяська будэтэ, «сяська пӧлын улӥсько», шуэ. Улонэзлы уг ӝожтӥськы, пенсиезлы шумпотэ. Туж тау каре нылпиосызлы, кенъёсызлы утялтэмзы но ӟеч сямо луэмзы понна. 

Нина Васильевнаез юбилееныз валче ӟечкыланы вуизы «Сурнай» обществолэн директорез Фагим Хакимуллович Сибагатуллин, Покчи Лӧзя гурт поселенилэн главаез Лариса Михайловна Михайлова, интыысь ветеранъёслэн кенешсылэн тӧроез Николай Александрович Петров но поселениысь нылкышноослэн кенешсылэн тӧроез Евгения Аркадьевна Кондратьева.

Лариса Михайлова,
Покчи Лӧзя гурт

Туспуктэмъёс: Л. Михайлова