«Пичи дырысен пудоосты яратэм бере, соосын ужаны мыным туж кельше»

Кемалась ӧвӧл ёросамы арлы быдэ радъяськись Азьмынӥсьёслэн слётсы ортчиз. Котьку сямен, отын данъязы пӧртэм удысъёсысь азинлыко бервылъёсы вутскем аспалъёсмес. Тӥледыз но соосын тодматомы. Нырысетӥез героймы — Бадӟым Лӧзя 1-тӥ люкет гуртын улӥсь Филиппов Владимир Петрович.

Пичи дырысеныз пудоосты яратэ

Владимир Петровичез Азьмынӥсьёслэн слётазы кема но азинлыко ужамез, гурт возёс удысын 2021-тӥ арын азинлыко бервылъёсы вутскемез понна Балтась ёрослэн главаезлэн Таукарон гожтэтэныз пусйизы. Шонерзэ вераны кулэ, та солэн нырысетӥез вормонэз ӧвӧл, та дырозь но воргоронэз таукарон гожтэтъёсын, грамотаосын награждать карылӥзы. Аслаз тыршыса ужаменыз, нуналлэн котькуд дыраз — вазь ӵукна-а со, бер уйин-а — гуртоосызлы, тодмоосызлы юрттыны дась луэменыз со гуртаз но, ужаз но гажанэ вутскиз. Туннэ нуналэ но солы, бадӟым опытэн но стажен пудо эмъясьлы, пӧртэм визь-кенеш курыса вазиськыло, кивалтэтэз но сое гажа, ужасьёсыз азьын примере пуктэ. 

Владимир Петрович 1992-тӥ арысен кутскыса вордскем гуртаз пудо эмъясь луыса ужа. Нялтас вераса, туэ ужаны кутскемезлы куамын ар но луэ вылэм ини. Со вань улонзэ гурт удыслы, пудо-животлы сӥзем адями.

1972-тӥ арын Бадӟым Лӧзя 1-тӥ люкет гуртын вордскыса, Владимир Покчи Лӧзя шоръёзо школаын тямыс классэз йылпумъя но, Можгаысь ветеринарной техникуме дышетскыны пыре (1987-1991-тӥ аръёс). Пичи дырысеныз пудо-животэз яратӥсь пияш котьку анай-атаезлы но пудо котырын ужаны юрттэм. Чылкак гурт атмосфераын, ужась семьяын быдэ вуэм Владимирлэн аслэсьтыз улонзэ гуртын азьланьтэмез потэ. Соин, Можгаысь дышетсконзэ йылпумъяменыз валче армие мыныса бертэмез бере (Кировын служить каре), вордскем гуртысьтыз фермае ужаны интыяське. Гуртын будэм адями гуртлы кулэ луымон мед луоз, пе.

— 1992-тӥ арын кызьы Ленин нимо колхозын («Сурнай» колхоз соку озьы нимаськиз) ужаны кутски, туннэ нуналэ но татын ик тыршисько. Басьтэм ӧнерея ужамелы но туж шумпотӥсько. Пичи дырысен пудоосты яратэм бере, соосын ужаны мыным туж кельше, — шуэ воргорон. — Анай-атай пичи дырысен ужаны, пудоосты яратыны дышетӥзы. Аслэсьтым нылпиосме но озьы будэтӥ.

Филипповъёс трос пудо вордо

Владимир Петрович ужаз гинэ ӧвӧл, дораз но пудоен вырыны яратэ. Ужысьтыз жадьыса бертэ ке но, пудоез доры потытэк кылемез солэн ӧвӧл. Кузпалэныз Людмила Михайловнаен соос трос пудо вордыса уло.

— Мон ачим Сизнер гуртысь, — вераны кутске Людмила Михайловна. — Ныл фамилие Сергеева. Владимирен 1991-тӥ арын кузпалъяськимы, кык нылпимы вань — Екатерина нылмы (Удмуртиын улэ, кык нылпиез вань) но Тимур пимы. Туннэ нуналэ соос асьсэ семьяоссэс кылдытыса уло ини. Тимур Алёна кышноеныз Ижевскын улэ вал, но милемлы юрттыны шуыса, гуртэ бертӥзы — пудо трос ук. Туннэ нуналэ соослэн Лиза нылзы вань. Нялтас вераса, Тимур но «Сурнай» обществоын ужа. Тӥни озьы ваньмы ӵош, ог-огмылы юрттыса улӥськомы. Яра али нылпиосмы вань, соос милям валтӥсь юрттӥсьёсмы.

Ачиз депутат, ачиз хоккеист, ачиз мызганчи

Владимир Петровичен вераськонмы куспетӥ луиз — солы бускель гуртэ скал эмъяны мыноно вал. (Нялтас вераса, сыӵе дыръёсыз пудо эмъясьлэн ӵем луыло вылэм. Гуртоосыз но, бускель гуртъёсысь адямиос но, Владимир Петровичлэсь котьку юрттыны дась луэмзэ тодыса, шуге-леке вуэм яке висьыны кутскем пудозэс эмъяны курыса, солы вазисько). Соин вераськонмес Людмила Михайловнаен азьланьтӥмы.

— Пичи дырысеныз пудоен гинэ ӧвӧл, спортэн вырыны но яратэ кузпалэ, — шуэ кышномурт. — Хоккеен шудыны солы туж кельше. Толалтэ гинэ ӧвӧл, гужем но Арчае ветлыса, ледовой дворецын шудо. Со сяна, пичи дырысеныз Владимир мызганэн но шудэ, ачиз кырӟа. Тӥни сыӵе мынам кузпалэ — пӧртэм ласянь быгатӥсь адями. Али со гинэ но ӧвӧл, Владимир Петрович куинетӥ арзэ гуртысьтыз депутат но луэ вылэм. Ужез, гуртэз понна со трос тырше, семьяезлы но юн пыкет луэ. Со понна ик сое гажало.  Азьмынӥсьёслэн слётазы Таукарон гожтэтэн пусъемзы азьпалан эшшо но бадӟым вормонъёсы вутскыны стимул мед луоз.