«Пыриськыны эн кышкалэ, мылкыдъёстэс эн ватэ, шара малпаське но творчествоеныды данъяське!»

О. Н. Исаев нимо Ӟаны шоръёзо школаысь журналистъёс гожто

2024-тӥ арын тулыспалысен Татарстан Элькунын сям-йылолъёсты утён но азинтон, семья кусыпъёсты юнматон, нылпиосты но егитъёсты визьноданын семьялэсь кулэлыксэ будэтон, мерлыклэсь инъетъёссэ духовно-нравственной амалэн кылдытон понна «О самом главном» вожвылъяськон ортчытӥське. Конкурслэн аспӧртэмлыкез луиз пӧртэм арлыдъем адямиослэн отчы пыриськемзы, кылсярысь, 2025-тӥ арын 700 пала пыриськисьёс вал, тужгес пичиезлы 5 арес, бадӟымезлы — 85. Конкурс семьяез утён удысын кун политикаез калыке вӧлмытон вылысь ортчытӥськиз. Вормисьёсты но призёръёсты данъян ужрад 2024-тӥ арын 13-тӥ толсуре Казаньысь лулчеберетъя кун институтлэн концерт залаз ортчиз. Та йылпумъян этапын данъязы устооссэ конкурсэ пыриськисьёсты. Сыӵеос пӧлын вал школаысьтымы дышетскисьёс но: Исаев Егор, Чирикова Кира но Исаева Вероника. 

2025-тӥ арын вожвылъяськонэ школаысьтымы 12 дышетскисьёс пыриськизы, соос пӧлысь ньылез пӧртэм номинациосын вормисьёс луизы: 9-тӥ классысь Апакова Лиана «Семейные реликвии» номинациын 2-тӥ, нош «От героев былых времён» номинациын — 1-тӥ инты. «От героев былых времён» номинациын ик 6-тӥ классысь Чирикова Валерия 1-тӥ луиз. «Спасибо, мама!» номинациын 8-тӥ классысь Чирикова Кира 1-тӥ интые потӥз, нош соин ӵош ик дышетскись Григорьева Яна та ик номинациын 3-тӥ интыен пусйиськиз. Вормисьёслэн дипломъёссы но сётэм сертификатъёслэн огъя быдӟалазы — 10 сюрс манет — таӵе луэ туэ конкурсэ пыриськисьёслэн йылпумъянъёссы. Ӟечокъёс, нылъёс! 

«Туннэ мынам улонам одӥгез тужгес яркыт учыр луиз — «О самом главном» конкурсын вормисьёсты данъян ужрадын данъет басьтӥ. Осконтэм вал со. Мон кык номинацие пыриськи: «Семейные реликвии» но «От героев былых времён». Нырысетӥ номинациын 2-тӥ инты басьтӥ, нош кыкетӥяз — 1-тӥ инты. Данъян ужрад сюлме пыӵась вал. Жюрилэн ёзчиосыз туж лякытэсь вал, сцена вылын соку ик туспуктӥзы дипломъёс но кузьымъёс сётонэз. Ужрад ортчиз В. И. Ленин нимо Культурно-досуговой комплексын. Та юрт синмаськымон: бадӟым, югыт, котькуд деталь рос-прос малпамын, бадӟым но яркыт выль ар кызэз но пуктӥллям, чебер фотозона дасяллям. Жюрилы мыным оскемзы но ужме вылӥ дунъямзы понна тау. Вань пинал пыриськисьёслы сӥземе потэ — пыриськыны эн кышкалэ, мылкыдъёстэс эн ватэ, шара малпаське но творчествоеныды данъяське!» — шуэ Апакова Лиана.