Шаерез утисьлэсь арзэ усьтыса

Туэ но та мур пуштросъем ужрад, аслэсьтыз данзэ ыштытэк, кулэезъя ортчиз. Вал со 18 толшоре. 

Олег Исаевлэн калыкезлы пумозяз оскымон луэмзэ возьматӥсь сямез али но паймытэ. Будӥсь поколение котьку тодаз мед возёз шуыса ик радъяське таӵе ужрад.

Кыкетӥез муг но туж данъяськымон: Россилэн Президентэзлэн — В. В. Путинлэн Указэзъя — 2025-тӥ ар Россиын Атыкай музъемез утисьлэн арез шуыса ялэмын. Та кык ужрадъёс дырызъя орчытӥськизы шуыны луэ. 

Пӧртэм мугъёс кылдэмен-а, мукет шуг-секытъёсын сэрен-а, но туэ та ужрад Ӟаны шоръёзо школаын дышетскисьёс пӧлын гинэ радъяськиз. Нырысь ик покчи, 5-7, 8-11 классъёсын дышетскисьёс пӧлын куасэн ӵошатсконъёс ортчизы. Котькуд пинал аслаз долгез шуыса лыдъя та ӵошатсконъёсты. Куазез но умой ортчытыны луонлык сётӥз, дышетскисьёс но мыло-кыдо пыриськизы.

Кыкетӥ люкетаз сӥё-дано линейка луиз. Татчы лыктӥзы геройлэн анаез Вера Петровна но геройлэн сузэрез Алевтина Николаевна. Ожгарчилэсь зэмос дунлыксэ пусйиз ёросысь военной комиссариатысь ӧнерчи Рифат Закиров. Ёросын ӧвӧл, дыр, адями, кудӥз уг тоды, кин со сыӵе Олег Исаев. Соин но таӵе ужрад — со нырысь ик аспалмес буре ваён, солэсь ужзэ азинтон но пример басьтон. 

Пиналъёслы озьы ик вазиськиз школалэн директорез Константин Грахов:

— Кин ке малпалоз, малы котькуд ар та ужрад кулэ шуыса. Та шонертэм малпан, со асьмелэн нырысь ужмы. Огшоры гуртысь пияш быдэс Россиын гажамон адями луиз. Сыӵе адями луон понна огшоры ужъёсты быдэстоно, огшоры ӟеч ужъёс бордысен кутсконо, кудъёссэ адӟозы тӥляд анай-атайёсты, тӥляд ӵыжы-выжыосты, классысь юлтошъёсты, эшъёсты, дышетӥсьёсты. Тани та ик кулэ али. Дунне вылысь югдурез ваньды тодӥськоды. Ӟечлык мед вормоз шуыса, нош ӟечлык котьку ворме шуыса асьтэос тодӥськоды, со ӟечлыкез юнматыны кулэ. 

Зэмзэ но, туала ожгарчиосмылы туж секыт йӧтэ. Гань-гань семья котырын улонзэс соос шаерез утёнэн воштӥзы, кинъёс ке пыраклы синъёссэс кынизы, кинъёс ке тазалыксылы изъян басьтӥзы. Соин пичи дырысен нылпиосты кылзэс кутыны дышетоно, калыкезлэн зэмос кунмуртэз луыны дышетоно. 

Дышетскисьёс геройлэсь улонзэ тодазы вайизы, кылбуръёс лыдӟизы но кырӟан кырӟазы. Котькуд ар ини Вера Петровна пиезлэн туспуктэмез азьын сюсьтыл ӝуатэ. Тае мон шуысал нимысьтыз йылол. Тодӥськоды, дыр, сюсьтыл — со дуннеосты герӟась одӥгез тодмет. Оло, озьы героймы но та ужрадэ пыриське, калык пӧлын луэ. Анай пизэ озьы тодаз вае, солы выль шокан сётэ кадь. Соку туспуктэмысь воргорон но анаез шоры мӧзмись синъёсыныз небыт учкыны кутске кадь. 

Ужрадэз чебертӥз ӵошатсконъёсын вормем но призо инты басьтэм дышетскисьёсты данъян люкет. Соослы нимысьтыз медальёс но грамотаос сётӥзы.

Асьмелы ноку вунэтоно ӧвӧл геройёсты, кудъёсыз асьме пӧлын улӥзы, кудъёсыз сюлэмзэс сётӥзы асьме тынӥсь улонмы понна. Бен, туннэ секыт югдуръёс буйгатскыны уг лэзё, соос эшшо но мылкыдмес куашкато. Но калыкмы котьку эскеронъёс пыр дано потӥз, озьы ик медло азьланяз но.

О. Н. Исаевлы сӥзем куасэн бызьылонъя ӵошатсконъёсын вормемъёс но призо инты басьтэмъёс:

Покчи классъёсын дышетскись нылъёс пӧлын:

1 инты — Прокопьева Татьяна, 4 класс;
2 инты — Закирова Софья, 3 класс;
3 инты — Григорьева Валерия, 4 класс. 

Покчи классъёсын дышетскись пиос пӧлын:

1 инты — Камаев Антон, 3 класс;
2 инты — Терентьев Кирилл, 3 класс;
3 инты — Терентьев Мирослав, 4 класс. 

5-7 классъёсын дышетскись нылъёс пӧлын:

1 инты — Гафетдинова Рузия, 6 класс;
2 инты — Шишкина Диана, 6 класс;
3 инты — Шадрова Анастасия, 5 класс.

5-7 классъёсын дышетскись пиос пӧлын:

1 инты — Закиров Тимур, 6 класс;
2 инты — Смирнов Ярослав, 7 класс;
3 инты — Григорьев Роман, 5 класс. 

8-11 классъёсын дышетскись нылъёс пӧлын:

1 инты — Кешишева Ангелина, 10 класс;
2 инты — Апакова Лиана, 8 класс;
3 инты — Иванова Арина, 11 класс.

8-11 классъёсын дышетскись пиос пӧлын:

1 инты — Евдокимов Яков, 9 класс;
2 инты — Яковлев Денис, 9 класс;
3 инты — Исаев Константин, 10 класс.