Шаермес утисьёс: Данилов Егор Гаврилович

Евдокиялэн анаез — Узы выжыысь, Сизнер гуртысь. Соослэн вордӥсько куинь нылъёссы но одӥг пизы. 1930-тӥ арын кылдэм «Комбайн» колхозэ пырисько быдэс семьяен. 1932-тӥ арын сое колхозэн кивалтонэ быръё. 1941 арын августлэн кутсконаз Быдӟым оже басьто. Ысто сое Ленинград фронтэ. Отын со 1943-тӥ арозь оборонительной рубежъёсты юнматон удысын тырше. Нырысьсэ жугиськонэ пыриське 3-тӥ куарусёнэ 1943 арын, Суворов ордено 90-тӥ стрелковой Ропшинской Краснознаменной дивизиысь 173-тӥ стрелковой полкын противотанковой пушкалэн наводчкез луыса.1943 арын данъямын «За оборону Ленинграда» медален. Батырлыксэ возьматэ 14-тӥ инвожое 1944 арын Каннаксен гурт вӧзын. Тушмон ыбылыку, огназ потэ Райволан-Йоки шурез, сӧсырме. Озьы ке но жугиськонлэсь куштӥськытэк противотанковой пыӵалэн быдтэ пулемётной расчётэз. Та пулемётной расчётэз быдтэм бере, шур вамен потыны сюрес усьтӥське кыкетӥ стрелковой батальонлы. Подвигез понна Егор Гаврилович 4-тӥ пӧсьтолэзе 1944-тӥ арын #060-3 приказэн 3 степенё Слава орденэн пусйиське. 18 куарусёнэ 1944 арын Йыгева гурт вӧзын аслаз пыӵалэныз быдтэ тушмонлэсь кык ыбылон интызэ но кык пулемётной интыоссэ, шонер ыбылыса ужысь поттэ тушмонлэсь станковой пулемётсэ, ӝуатэ боеприпасъёсын складзэс. Та подвигез понна 1944 арын 24 коньывуонэ #0152-2 приказэн 2-тӥ степенё Слава орденэн пусйиське. 1945-тӥ арын демобилизовать каремзы бере бертэ вордӥськем гуртаз. Берло аръёсы «Активист» колхозын бригадир но амбарлэн заведующиез луыса ужа. Пӧртэм аръёсы Кугунур сельсоветэ депутатэ но товарищеской народной судлэн председателяз бырйиськылэ. Пенсие потэм бераз гын сапег лэсьтэ, юрт котыраз выре. Улонысь кошке 27-тӥ шуркынмонэ 1986-тӥ арын 83 аресэн. Ватэмын Ципья шае кузпалэныз артэ. Егор Гавриловичлэн али дыре кык нылыз улэп. Бадӟымез — Шестакова Елизавета Егоровна 90 арес, вордӥське 1927 арын. Картлы бызе Турья Починка (Карек-Серма) гуртэ, Тикон Павичлы. Нылпиосыз но внукъёсыз уло Карек-Сермаын, Ципьяын, Глазовын, Ижевскын, Кизнерын, Якшур-Бодьяын, Кировын, Петербургын, Москваын, одӥгез внучкаез быземын Америкае Нью-Йорке.

Кыкетӥ нылыз Сапожникова Анна Егоровна (1930-2009) быземын Сырья гуртэ Сапожников Дмитрий Александровичлы (Асан Митрейлы). Ӵошен будэто 5 нылпи. Нылпиоссы но внукъёссы уло Сырья, Дурга гуртъёсын, Казань, Н. Челны. Москва городъёсын но мукет интыосын. Куинетӥ нылыз Сапожникова Надежда Егоровна (Яким кышно) вордӥське 1934 арын. 83 арес, улэ картэныз Сапожников Яким Степановичен, пиеныз но кенэныз Сырья гуртын. Соос куинь нылпи будэтӥзы. Нылпиоссы но внукъёссы уло Сырья, Кизнер гуртъёсын но Удмуртиысь пӧртэм ёросъёсын, Казаньын. Пиез Данилов Василий Егорович (Гавырла Вася) быдэс гумырзэ улӥз Киськемын. Кузпалэз Семон Починка гуртысь Мария Кузьминична. Ӵошен будэтӥзы куинь нылпи. Нылпиоссы но внукъёссы уло Киськем, Кӧргем, Плотбище гуртъёсын, Можга, Ижевск городъёсын. Данилов Егор Гавриловичлэсь дорвыжызэ уте правнукез Кӧргемын вордскем Камаев Иван Васильевич кышноеныз но пичи нылыныз. Героймылэн 17 внукез, чотаса быдтонтэм правнукъёсыз но пра-правнукъёсыз. Огазе люкаськизы ке одӥг бадӟым гурт луоз.

Алексей Шмелёв