Сизнер гуртысь Быдӟым Атыкай оже 100-лэсь трос мурт пыриськем

7-тӥ куартолэзе Сизнер гуртын но Вормон нуналэз матэктытон, шаерамы каньыл улон ваён понна Быдӟым тыложын асьсэды жалятэк нюръяськем ӵыжы-выжыоссэс, гуртооссэс, — ожгарчиосты но ож мышкын тыршемъёсты — буре вайизы. Мылкыдэз бугыртӥсь мур пуштросъем ужрадэ гурт калык, нылпиос но гажано куноос — ёросысь исполнительной комитетлэн кивалтӥсезлэн нырысетӥ кивоштӥсез Ильшат Солтанович Галимуллин, «Смаиль» обществолэн тӧроез Ильгам Мансурович Шакиров, Смаиль гурт поселенилэн главаез Рифнур Гайнанович Юсупов но Смаиль гуртысь ветеранъёслэн огазеяськонзылэн председателез Солтан Ибрагимович Фатихов пыриськизы.

Гуртлэсь историзэ эскеронэн вырем Анфиса Анатольевна Ермохиналэн шедьтэм тодэтъёсызъя, Сизнер гурт Быдӟым Атыкай оже 100-лэсь трос гуртозэ келям. 1941 арын, Быдӟым тылож кутскем сярысь ивортэмзы бере ик, гуртысь 8-9 таза но кужмо воргоронъёсты фронтэ басьто. Со дырозь куинь пиосмуртъёсты финн оже келяло. (Огъя вераса, финн оже кошке куать мурт, соос пӧлысь одӥгез уг берытскы, бырыны шеде). Гужем аран дыре эшшо 10 муртэ, 1910-1911 аръёсы вордскем воргоронъёсты, Быдӟым тыложе келяло. 10-эз пӧлысь одӥгез берытске. 24 толшоре 1942-тӥ арын фронтэ кошке эшшо 5 мурт, нош со арын ик южтолэзе — 4. Озьы пумен гуртын воксё шуымон музъем кузёос — воргоронъёс — уг кылё. Улонлэн вань секытэз нылкышноослэн, пересьёслэн но нылпиослэн пельпумъёссы вылэ усе...

Быдӟым тыложе пыриськыса фашизмен нюръяськем гуртооссэс но нимысьтыз ожгар операциын батырлыко бырыны шедем гуртозэс, Матвеев Павел Михайловичез, буре вайыса, сизнеръёс минут ӵоже чус сылӥзы, тау карыса синпелет доры сяська керттэтъёс понӥзы. Сяме пыремъя ужрад йылпумъяськиз «Смаиль» обществолэн кивалтӥсе-злэн Ильгам Шакировлэн юрттэменыз дасям узыр ӝӧк сьӧрын чай юонэн.