Солдат орденъёс

ЧЕРНОВ ПРОКОПИЙ ПЕТРОВИЧ

III степенё Слава орденлэн кавалерез.

Вордӥськемын 1926-тӥ арын 10-тӥ тулыспалэ Сырья гуртын. Шоръёзо тодон-валан басьтэ, Сырьяысь покчиёзо но Ципья шоръёзо школаосын дышетскыса. Ужан сюрессэ «Труд» колхозлэн Сырья гуртысь дуриськонниаз тыршем атаез вӧзын дурисьлэн юрттӥсез луыса кутске.

1943-тӥ арын шуркынмонэ Прокопий Черновез армилэн радъёсаз басьто. Нырысь со запасной учебной полкын военной подготовкаез ортче. 1944-тӥ арын толсурысен Быдӟым ож бырытозь, передовойын ожмаське. Прибалтийской республикаосты мозмытонэ, тушмонлэсь кышкыт Курляндской группировказэ пазьгонэ, Германилэн территорияз ожмаськонъёсы пыриське. Ожмаськонъёсын возьматэм батырлыкъёсыз понна Отечественной войналэн II степенё орденэныз, III степенё Слава орденэн, «За отвагу» медален но мукет медальёсын пусъемын.

П.П. Чернов война бырем бере но ожгар службаен уг люкиськы. Заочно амалэн йылпумъя Жуковский нимо Военно-воздушной инженерной академиез. 1946-1956 аръёсы Монино каргуртысь Военно-воздушной академиын служить каре. Собере солэн службаез герӟаське Туркменистан но Казахстан Республикаосын. 1975-тӥ арын подполковник званиен отставкае кошке но Владимир улосысь Кержач городэ интыяське, 1-тӥ городской школаын военной подготовкалы дышетӥсь луыса ужа.

Ветеран улонысь кошке 2003-тӥ арын, ватэмын Кержач городысь шайвылын.