Солэн нимыз мед чузъяськоз удмурт литератураын

Туж шумпотӥсько, Н. Никифоровлэн эшшо одӥг выль книгаез потӥз шуыса. Малы ке шуоно со Николай Михайловичлэн улоназ бадӟым малпанэз вал — выль книгаен лыдӟисез доры вуон. Но, жаляса верано, улон вакытаз солэн та малпанэз ӧз быдэсмы. Никифоров Писательёслэн союзазы пырыса ӧз ке но вуы, со асьмелэн, вань удмурт калыклэн, зэмос писательмы луэ. 

Кинлэн гинэ вань меда сомында гожъямъёсыз, нош кӧня со гожъясал на. Кӧня солэн повестьёсыз, пичиослы но бадӟымъёслы веросъёсыз, кылбуръёсыз, сценкаосыз, юморескаосыз. 

Николай Михайлович туж ӝикыт быгатыса нуэ вал ужзэ. Солэсь архивзэ эскерыса, шедьтӥмы 29 покчиослы верос но 139 бадӟымъёслы, 21 сценкаос-пьесаос, 25 повестьёс, 120 серемес веросъёс, 54 малпамтэ веросъёс, 3 выжыкыл, 22 ӟуч кылын гожъям ужъёсыз. Тӥни тамында гожъямъёс пӧлысь, кӧнязэ али асьмеос тодӥськом? Туж ӧжытсэ гинэ. Соос ваньмыз но пазяськемын пӧртэм газет-журналъёсын, нош огинэ люкаса поттэмын ӧвӧл. «Гондыр эктон» книгаяз люкаса поттэмын пиналъёслы 21 веросэз. 

Произведениосыз одӥг интыын мед луозы шуыса ик, 2022-тӥ арын ВК-ын кылдытӥм «Н. М. Никифоровлэн творчествоез» нимо сообщество. Татысь но шедьтыны луоз ужъёссэ. Каллен соос отчы потыло. Таин уж уг йылпумъяськы. Бадӟым уж нуоно ай. Туж умой луысал, писательлэсь повестьёссэ но одӥг книгае люкаса поттыны яке ваньмызлы кельшем «Сьӧд кашо зундэс» повестьсэ ке но. 

Ваньмыз та кулэ Николай Никифоровез медаз вунэтэ, солэн нимыз мед чузъяськоз удмурт литератураын шуыса. Мед пыртысалзы вал солэсь веросъёссэ но кылбуръёссэ удмурт литературая учебникъёсы но. Тӥни сыӵе малпанъёсын улӥськом. Малпасько, Н. Никифоровлэн куке но асьме кие нош ик выль книгаез вуоз на.

Олеся Яковлева, Ӟаны шоръёзо школаысь удмурт кылъя но литературая дышетӥсь.