Солэн но люкетэз вань

Начальной классъёсты дышетонлэн аслаз шуг-секытъёсыз вань. Дышетӥсь ачиз дышетоно вань предметъёсъя специалист луыны кулэ. Дышетскисьёслы тодонлэн нырысетӥ основаосыз начальной классъёсын сётӥське ук. Соос отын лыдӟыны, гожъяськыны, математикалэн элементарной правилоосызлы, инкуазь явлениосты валаны, соослы дунъет сётыны дышетско, физической навыкъёс басьто. Дышетӥсь сложной явлениосты капчи но валамон вера вал. Соин ик анай-атайёс пиналъёссэс Ираидалэн классаз сётыны тыршылӥзы.

Мирной профессия со дышетӥсь. Нош Ираида Михайловна но война аръёсы кияз пыӵал кутӥз. Егит комсомолка ачиз мылкыд карыса фронтэ кошкиз. Кышкасьтэм нылмурт ожмаське северо-западной фронтын. Со связья полклэн штабаз ответственной заданиосты быдэсъяз: службазэ умой но кышкатэк нуэмез понна Ираида армилэн но полклэн командованиезлэсь дас кык пол благодарностьёс басьтэ.

Коммунист Савельевалэн боевой заслугаосыз вылӥ дунъямын. Со наградить каремын «За победу над Германией в Великой Отечественной войне», «За боевые заслуги», «Ветеран труда» медальёсын но Почётной грамотаосын. Педагогической ужын кема аръёс ӵоже но умой ужамез понна солы сётэмын Татарилэн заслуженной дышетӥсез дано ним.
<...>
A. Марданов. («Азьлане», № 56, 8 май, 1976 ар)