«Шудон корка» — нылпи дунне: бадӟымзэ но, пичизэ но липет улаз пыртэ

«Шудон корка» шуыку, малпасько, тросэз пичи дырзэ син азяз пуктоз. Ма, со валамон но, кӧня поколениысь нылпиослэн шумпотон минутъёссы ӵапак шудон коркан шудыса ортчемын угось. Вунэтод шат сое?

Нош тӥ тодӥськоды-а, Удмурт Элькунын «Мынам Удмуртие» телеканалын «Шудон корка» нимын нылпи передача вань но кемалась ӧвӧл со Россиысь «ТЭФИ-KIDS» конкурсын вормисе потӥз — нылпиослы сӥзем тужгес устоез передача луиз — шуыса? Тӥни вот! Кыӵе ӟечокъёс! Малпасько, та огъя удмурт калыкмы понна но шумпотон ивор, бадӟым дан. Соин туннэ вераськиськом Ольга Фархутдиноваен — «Шудон корка» нылпи программаез кылдытӥсен но нуисен. 

«ТЭФИ-KIDS» кылдӥз 2019-тӥ арын, озьыен, туэ со 6-тӥ ползэ ортчиз. Нырысьсэ та премиез «Тужгес устоез нылпи программа» номинациын «Ты — супер!» калыккуспо вокальной проект басьтӥз. Туэ вожвылъяськонэ пӧртэм улосъёсысь 200 котыр телепроектъёс вуизы. «Шудон корка» та конкурсэ нырысьсэ пыриськиз. Нялтас вераса, «ТЭФИ» статуэткалэн секталаез — 5 килограмм.

— Ольга Витальевна, сюлмысь ӟечкыласько Тӥледыз но командадэс та бадӟым вормонэныды — «Шудон корка» программадылэн «ТЭФИ-KIDS» вожвылъяськонын вормисе потэменыз. Та бадӟым шумпотон но дан вань удмурт калык понна, мон сямен. Уг ке янгышаськы, туэ вожвылъяськонэ ог 200 пала телепроектъёс пыриськизы, тӥ пыриськиды нырысьсэ. Уждэс конкурсэ кыӵе малпанъёсын келяды? Осконды-а яке шӧдонды-а вал-а вормоды шуыса? 

— Келякум малпай, мед ми сярысь но тодозы шуыса. Куке финалэ потӥм, соку осконэ кылдӥз ни. Малы ке шуоно со вакытэ мыным туж кулэ вал со награда. ТЭФИ тужгес но дуно кузьым луиз передачамылэн кызь арес тырмонэзлы.

20 ар куспын трос иськемъёс но пӧртэм телевизионной фестивальёс ортчемын. Мон шумпотӥсько, «Шудон корка» передачамы котьку куинь азьмынӥсьёс пӧлын дано интыос басьтылӥз но Россиысь тросаз телеконкурсъёсын тужгес умой нылпи передачаен лыдъяськиз шуыса. Нырысетӥ инты ми басьтӥмы Ханты-Мансийскын «Спасти и сохранить» шуыса нимаськись калыккуспо телефестивальын. Та туж вылӥ данъет. Озьы ик данъяськыса вераны быгатӥсько «Смиротворец» фестивальын вормеммы сярысь но. Нош тужгес валтӥсез — со куке учкисьёс программаямы асьсэ нылпиоссэс ваё, куке вазисько съёмкаосы пыриськон пумысен, удмурт кылын кылбуръёс, кырӟанъёс дышетско, комментарийёс гожъяло. Огъя вераса, обратной связь — со самой ӟеч мотивация. Со кужым но мылкыд сётэ ужмес азинтыны, мар ке выльзэ кылдытон бордын тыршыны, бератаз малпан кылдэ: «озьыен, ваньмыз со юнме ӧй вал...»

— Ма сярысь вал вожвылъяськонэ келям передачады?

— Передачамы нимаське вал «Приличные и неприличные». «Шудон корка» программамы удмурт кылын потэ, но «ТЭФИ» конкурсэ ӟуч кылын лэсьтэмзэ келямы. Со 12 минутъем инкуазьлы сӥзем передача вал. Отын ми нылпиос но нымы-кибыос пыр тыршимы возьматыны адями но лулос дуннеослэсь герӟетсэс. Покчиос дышетско нымы-кибыослэсь, чаклало соосты, нош нымы-кибыос — покчиослэсь. Ми пиналъёслы малпан сётыны выримы, нымы-кибыослэн но асьмелэн кадь ик улонзы но пӧлазы котькыӵеосыз но вань шуыса. Тӥни сыӵе визьнодан пуштросэн передача милям пӧрмиз.

— Финалын Тӥ азьпалтӥды Крымысь «Баттл поколений» шоуэз но «Карусель» телеканалысь «Каляка-Маляка» студиез. Кызьы Тӥ малпаськоды, маиз сокем кельшиз тӥляд передачадылэн дунъясьёслы? Маин тӥ соослэсь висъяськиськоды?

— Передачамы аслаз огшоры луэменыз дунъясьёслы кельшиз, дыр, шуыса малпасько. 

— 20 ар ини Тӥ нылпиослы тунсыко мед луоз шуыса тыршиськоды. Нош малы одно нылпи передача ужан удысады (оло, улонады но, дыр) валтӥсез луиз? Со асьтэлэн быръёнды-а яке улон озьы радъяз-а?

— Мон Дэбесысь педучилищеез йылпумъяй, покчи классъёсты дышетӥсьлэсь ӧнерзэ басьтӥ, но школаын ӧй ужа — Ижкарын пӧртэм садикъёсын 5 ар тырши. 112-тӥ нылпи садысен телевидение кошки, со вал 2003-тӥ ар. Пичи дырысеным телевизоре шедеме потэ вал.

— Озьыен, малпанды быдэсмиз?

— Озьы. Со вакытэ нылпи программаос ӧй вал. Валтӥсь редактормы ӵектӥз нылпи передача лэсьтыны. Мон соглаш луи. 5 ар садикын ужаме юрттӥз. Эшшо педагогической образование но интыяз луиз на. Огъя вераса — ваньмыз тупаз.

— Нош малы одно ик «Шудон корка»? Кытысь потӥз сыӵе ним?

— Шудон корка — ас нылпи вакытысьтым шудон дуннее. Мон туж яратӥсько вал шудон коркаен шудыны. Писпу вылэ, ӝӧк улэ, кенер вӧзы, липет улэ, атаелэн бензовозаз но шудон корка лэсьтэме вань. 

— Программаостылы темаос асьтэос малпаськоды-а? Ма сярысь тунсыко потэ учкыны туала нылпиослы, кызьы соосты анай кылын потӥсь контентен тунсыкъяськытоно, тӥляд малпамдыя?

— Малпасько ачим, яке нылы тунсыко юан сётэ ке. Мар аслым тунсыко потэ, сое ик бугыръясько нылпи синмын. Туала нылпиосты шуг ке но паймытыны, тыршиськомы пальыштыксэс ӧтьыны. Графика амалэз, анимация кутӥськомы. Тросгес эмоциосын ужасько. Инкуазен герӟаськем темаосты тросгес сётӥсько. Тужгес валтӥсез — учкисьмылы шумпотон мылкыд кельтыны, удмурт кылмес вӧлмытыны, удмуртлыкмес калыкмы пыр возьматыны. Маин луэ данъяськыны, мармы вань асьмелэн гинэ — удмуртъёслэн: сиён-юон, шудонъёс, кырӟан, эктон но тужгес валтӥсез — кылмы. Анай-атайёсын но ужаськом, нылпиоссы мед валалозы, «Шудон коркае» удмурт кылын вераськись пиналъёс шедё шуыса. Пӧртэм конкурсъёс ортчытъяськомы, учкисьёсмес люкаськомы котырамы.

— Удмурт кыл шуэмысь нош юан: нылпиос ӟучомо, удмурт кылын вераськемысь дугдо. Та туж бадӟым сюлмаськон кылдытэ. Тӥляд ужады но шӧдӥське, луоз, та югдур?

— Зэм, нылпиосын ужаны котьку но тунсыко потэ вал, но али секытгес, малы ке шуоно пиналъёс ӟучомемын, камера азе удмурт кылъёссэс соос дышетыса пото ини. Нош 20 ар талэсь азьло сыӵезэ ӧй адӟысалыд, нылпиос удмурт кылын эркын вераськылӥзы. Но озьы ке но ми шумпотыса ужаськомы. 

— 20 ар куспын программа но воштӥське, воштӥсько нуисьёсыз но. Нырысь-валысь удмурт покчиосын шудӥзы-вераськизы Моко мунё но Малыок нылаш. Собере Моколэн выль эшез кылдӥз — Чульымчи нылаш. Кытысь сыӵе тунсыко ним? 

— Чульымчи, со чульк! междометилэсь, туж шумприч, чульк! гинэ потӥсь верамлэсь кылдӥз. Удмурт фольклорын ӧвӧл нылашъёслы нимъёс. Соин ик ми сое асьмеос малпамы. Туж интыяз луиз — садикын но, школаын но Чульымчимылэсь нимзэ куто ни. Озьы туннэ Моко коркакузё но Чульымчи нылаш программалэн воштонтэм нуисьёсыз луо. Али соос анимационной вариантын ини. Зэм, программа воштӥське оформление ласянь но, ужпумез гинэ солэн ялан одӥг — нылпиослы эш, нош анай-атайёслы юрттӥсь луыны. Передача пыр ми учкисьёслы вуттыны тыршиськом асьме удмурт кылмылэсь чеберлыксэ но кужымзэ, кыӵе со мусо кылӥське нылпиослэн вераськоназы, синмаськытэм потэ адямиосты удмурт кыллы — пичиосты но, бадӟымъёсты.

— «Шудон корка» программаын сяна, Тӥ пӧртэм проектъёс, грантъёс бордын но тыршиськоды. Со сярысь но вералэ вал. 

— Озьы, проектъёс бордын ужасько, малы ке шуоно соос луонлык сёто эшшо но паськытгес вӧлмытыны но пыӵатыны улонэ сюлмысь потэм малпанъёсме. Мультик лэсьтонъя «УдМульт» проектмы, каверъёсын «КаверГур» проектмы но али «Шаер гур — О Родине пою» проектмы — ваньмыз нылпиослы сӥземын. Ачим но синмаськисько туала пиналъёсмылы — кӧня луонлыкъёссы соослэн — кидэ гинэ ӝут — ваньмыз соос понна. Мед гинэ соос валасалзы сое. Мон малпасько, кинэ асьмеос будэтомы, сыӵе улонэ ик вуомы. Соин ик мон туж тыршисько покчиосмылы сюлэмазы пичи ке но шуныт тылгизьы кенжытыны, дунне шоры чылкыт синмын, яратыса учкыны дэмласько. «Шудон коркамылэн» но вань проектъёсызлэн сыӵе миссизы. 

— «УдМульт» ӵектосты — одӥгез тужгес тунсыкоез, мон сямен. Трос-а вал пыриськисьёс?

— «УдМульт» — «Луло Мунё» проектэ 10 ёросъёсысь нылпи мультстудиос пыриськизы. Котькудӥз ужаз мастерен — кибашлыен, кудӥз мунё лэсьтэ. Мультикъёслэсь сценарийзэс гожтӥзы пиналъёс, нош мунёосты мастеръёс дасязы. Бервылаз 10 чебер кукольной анимация пӧрмиз.

— Азьпаллы планъёсты? Маин учкисьёсты азьланяз шумпоттыны малпаськоды? 

— Проектъёсмы трос. Азьпалан — юбилеймы.

— Тау, Ольга Витальевна, дыр шедьтыса монэным вераськемды понна. Азьланяз но творческой малпанъёсты медаз синэ. Вормонъёсты дурыныз мед кисьтӥськозы. Юбилейдэс ӟеч пумитаны мед кылдоз. Азинсконъёс Тӥледлы но ужъюлтошъёстылы!

Вераськиз Ольга Плотникова