Ужзэ яратӥсь адями котьку син азьын

29 куартолэзьысен 25 коньывуонозь медиа но журналистика удысысь егитъёс пӧлын Всероссийской «Шум» проект ялэмын вал. Егит блогеръёслы та проект эшшо одӥг луонлык сётӥз асьсэлэн творчествоенызы тодматыны но учкисьёссылэсь лыдзэс будэтыны.
Асьмеос котьку вераськом, адямилэн вань азинсконъёсыз, бадӟымесь вормонъёсыз семьяысеныз кутско шуыса. Та зэмлыко веран: семья пушкын кусыпъёс шуныт но эшлыко ке, адямилэн но сюлмыз бурдъяське, солэн вань кутсконъёсыз одно ик быдэсмо, вань ужъёсыз вольыт лэсьтӥсько. Таяз учыре но семьялэн интыез, солэн юрттэмез туж дуно. Ӵапак семья вылэ ик пуктӥське валтӥсь акцент, семьялэн примерез вылын возьматӥське котькуд калыклэн чеберлыкез но узырлыкез. Ӵапак таӵе дунлыкъёсын ик улэ Широбоковъёслэн семьязы. Юн но эшлыко луэмзы юрттэ соослы вань вырйылъёсты басьтыны.
Василий но Лилия Широбоковъёс — зэмзэ но адӟем карымон егитъёс. Соослэн будо куинь пиналъёссы: Варвара, Таисия но Иван. Егит кузпалъёс удмурт лулчеберет пыр гинэ ӧвӧл, асьсэ пример вылазы возьмато — аслад вордскем кылэдлэсь но лулчеберетэдлэсь дуноез номыр но ӧвӧл. Та веран шӧдӥське соослэн ужъёсазы, тыршемъёсазы. Удмурт шӧмо проектсылы луыса соосты туннэ тодо Удмурт Элькунысь котькуд юртын, та проект ик юрттэ соослы мукет калыкъёсты но тунсыкъяськытыны. 
Нялтас вераса, Василий Широбоков пулэсь арбериос лэсьтыны усто. Со корка но ачиз пуктэ, вань кулэ луись тӥрлыкъёсты но чебермаса улонэ пыӵатэ. Адями аслэсьтыз ужзэ сюлэмезъя быръем шуыса адӟиське. Нош Лилия Широбокова блогер ужен гинэ уг тунсыкъяськы. Туэ южтолэзе со эшъёсыныз валче Sayеs шуыса нимаськись йӧскалык дӥськут но чеберман тӥрлыкъёсты вӧлмытонъя бренд кылдытӥз. Татын котькуд адями аслыз кельшымонзэ шедьтыны быгатоз. 
Лилиялэн блогез кемалась син азе йӧтӥз вал ини. Нырысь ик удмурт адями понна туж тунсыко луоз, кызьы со удмурт лулчеберетэз но кылэз азинтэ. Аслаз усьтэм сюлэмо луэменыз но ӟеч малпанъёсыныз со адямиосты бордаз кыске. Тае тӥ солэн мерлыко бамаз пырыса но адӟыны быгатӥськоды.
Бадӟым вормонэз сярысь тодэме бере, тунсыко потӥз, кызьы бускель элькунысь огшоры кышномурт кылдытыны быгатӥз сыӵе тунсыко проект, кудӥз быдэс Россиын данлык шедьтӥз.
— Лилия, вералэ вал, кыӵе арысен тӥ кутскиды та проектты борды но огъя кӧня ар луэ ини блог нуэмдылы?
— Огъя вераса, блогъёсме нуэмелы 9 ар котыр луэ, дыр, ини. Но «Удмурт азбар» — со нимаз проект. Та малпан йырам кылем арын лыктӥз, ӵапак ноябрь толэзь вал. Тани туэ ноябрь толэзе солы одӥг ар гинэ луоз ай. Азьло мынам со огшоры вал, кыӵе ке нимысьтыз мугъёс татын ӧй вал. Огшоры нылмуртлэн огшоры блогез. Собере ини со кыӵе ке пуштросэн тырмыны кутскиз. Дыр ортчыса, учкисьёс но тросгес люкаськыны кутскизы.
— Мар тӥлесьтыд мылкыддэс бурдъяз анай кылын блог кылдытыны? 
— Кызьы асме тодӥсько, быдэс улонме мон удмурт кыл понна вал. Пичи дырысеным ик тодӥсько ни вал улонэ удмурт кылын, удмурт культураен герӟаськемын луоз шуыса. Азьло контент тросгес удмурт калык поннагес лэсьтӥсько вал. Собере кызьы ке ас понназ озьы пӧрмиз, контентэ удмурт калыклы гинэ ӧвӧл, мукет калыкъёслы но тунсыко луыны кутскиз, кудъёсыз уло Россиын, кудъёсыз кун сьӧры кошкемын. Адямиослы туж тунсыко вылэм сыӵе контентэз учкыны, кытын мукет адямиос сярысь верало. Кудъёсыз ке воксё уг тодо, паймо вал, кинъёс сыӵе удмуртъёс, кыӵе аспӧртэмлыко соослэн вераськонзы, сямъёссы. Контентме адӟо но интернете пыро, утчасько, мылкыдзэс верало, Удмуртие вуэмзы потэ шуыса. Та ик мылкыдме пуромытэ, дыр, блогме азинтыны, анай кыл но культура сярысь вераны. 
— Тӥ вормись луиды бадӟым огъя Росси масштабен ортчем проектын. Кытысен тӥ та сярысь тодӥды? Кыӵе мылкыдъёсты вал вормисьёс пӧлы шедемды бере?
— Финалист луэме сярысь мыным гожтӥзы. Соку мон туж пайми, малы ке шуоно 15000 заявкаос пӧлысь бырйизы 84-зэ гинэ, мон тӥни соос пӧлын вал. Проектлэн йылпумъяськонэз но награждениез Москваын ортчиз. Татын ини вань финалистъёс мылкыдъёсынызы люкиськизы, ог-огмылэсь малы ке дышетским, тунсыкозэ тодӥм. Огъя вераса, та проект туж юрттэ егитъёслы. Шумпотӥсько, та проектын аслэсьтым малпанъёсме шонер вуттыны быгатӥ шуыса. Синву потытозь ик шумпотӥм. Малы ке шуоно мон огнам ужасько, мынам командае — со мынам семьяе, кудӥз мыным пуш кужым сётэ, котькуд ужам валтӥсь стимул луэ. Сыӵе вылӥ признание мон понна туж шумпотымон но данъяськымон. 
— Удмурт Элькунысь удмуртъёсты учкыса шумпотӥськод но вожъяськиськод. Соос пӧртэм проектъёсы пырисько, вормись луо. Кызьы малпаськоды, малы палэнын улӥсь удмуртъёс та пумысен берегес кылё?
— Зэмзэ вераса, мон та юан сярысь ноку ӧй но малпаськы. Но со герӟаськемын ӧвӧл кадь потэ адями Удмуртиын-а улэ яке палэнын. Шугъяськисько кӧня ке та юанлы валэктон сётыны. Аслэсьтыд уждэ яратыса лэсьтӥськод ке, мылкыддэ, лулдэ отчы понӥськод ке, мукет адямиос но бордад кенжо, мылкыдзы ӝутске асьсэлэсь проектъёссэс лэсьтыны. Кутоно но лэсьтоно, возьматоно, шараяно. Озьыен, котькытын улӥсь адями, городын-а яке гуртын-а, быгатоз вылӥ азинсконъёсы вуыны. Та адямилэн улоно интыеныз герӟаськемын ӧвӧл, дыр. Туала информационной луонлыкъёс туж паськытэсь ук, мукет шаерысен но аслэсьтыд культурадэ, кылдэ паськытатыны луэ. Мукет калыкъёс пӧлын улӥськод ке, со эшшо но тунсыко луэ.
— Азьланяз кыӵе планъёсты, ужъёсты? Кызьы син азяды пуктӥськоды «Удмурт азбар» проекттылэсь азьланьзэ? 
— Малпанъёс трос, котькудаз вутскеме потэ, ужын но, семьяын но, блогын но, пӧртэм проектъёсын но. «Удмурт азбар» проект азьланьтӥськоз шуыса малпасько. Озьы ик клипъёс снимать каром, тросгес горизонтальной видеоос лэсьтыны тыршом. Отын огшоры адямиосты, гуртын улӥсьёсты возьматом, кудъёсыз асьсэлэсь ужзэс яратыса лэсьто, удмурт кылын верасько, пиналъёссэс дышето удмурт кылын. Туж потэ вал «Удмурт азбар» проект мед луоз сыӵе пространство, этнокомплекс, этнодеревня выллем, кудаз ми быгатомы палэнысь но, кунсьӧрысь но куноосты пумитаны, малы ке шуоно, милесьтым контентмес учкыса, адямиослэн мылкыдзы вань ини Удмуртие лыктыны, культураен тодматскыны. Малпасько, льӧль малпанъёсы одно ик быдэсмозы, со понна инъет вань. 
— Лилия, туж бадӟым тау юанъёсмылы валэктон сётэмды понна. Азяды пуктэм ужпумъёсты одно ик мед быдэсмозы. Удмурт лулчеберетлэсь но кыллэсь чеберлыксэ, узырлыксэ шараяса, калыкмы сярысь тросгес адями мед тодоз, нош удмуртъёс данъяськыса мед вераськозы анай кылынызы!
Тӥни озьы огшоры нылмурт аслаз тыршеменыз бадӟымесь азинсконъёсы вутскыны быгатӥз. Та эшшо огпол возьматэ: аслэсьтыд уждэ яратыса лэсьтӥд ке, ваньмыз одно ик пӧрме. 
P. S. Та тунсыко семьяен но Лилиялэн блогеныз матынгес тодматскемды потэ ке, соослэсь сообществозэс шедьтыны быгатоды Вконтакте мерлыко бамысь. Татын тӥ асьтэлы гинэ ӧвӧл, нылпиостылы но тунсыкозэ шедьтоды.

Туспуктэм: семья архив