ВАНЬ УДМУРТЪЁСЛЭН ӦТЧАМЗЫЛЫ 100 АР ТЫРМОН АЗЬЫН

Азям та люкаськеме лыктэмъёсын туспуктэм. Шуо ог сизьымдон делегат. Соос пӧлысь одӥгез шляпаен йӧно воргорон. Кин бен со? Со Яковлев Иван Васильевич — удмуртъёслэн тодмо югдытӥсьсы-дышетӥсьсы, нырысетӥ удмурт тодосчиос но удмурт литератураез кылдытӥсьёс пӧлысь одӥгез.

Вордскиз 17 инвожое 1881 арын. Али дыре Татарстанысь Балтач ёросэ пырись Покчи Лӧзя гуртын. Казаньысь дышетӥсьёсты дасясь семинариез йылпумъям бере, 20 аресъем егит пиез кыдёке Пермь губерниысь Бадӟым Гондыр школае ужаны лэзё. Революционной ужъёсын выремез понна, Иван Васильевичлы кема ужаны ӧз кылды, сое Пермь губернилэсь палэнэ улляло. 1902 арын Елабуга уездысь дышетӥсьёслэн съездазы кужмо вераське удмурт кылэз дышетон уже кутон понна. Удмурт кылэз утён сярысь статьяез «Вятские епархиальные ведомости» журналын печатлаське. Асьме пала матынъяськыса, полицилэн эскерем улсаз, Алнаш но Можга котырын ужа.1907 арын Казаньысь дышетӥсьёслэн семинарысьтызы удмурт начальной училище интыяське. Татын но кема ужаны ӧз кылды, арестовать каро но тюрьмае пукто, келяло Кострома улосэ, нош ик большевикъёсын герӟаськемез понна. 1912 арын выльысь Казане берытске, 1917 арозь вузкарон ужъюртын ужа. Февраль революция бере Поволжьеысь калыкъёс автономиос басьтон понна вераськыны кутско. Казаньын «Поволжьеысь пичи калыкъёс, огазеяське!» вазиськонэн Поволжьеысь калыкъёслэн Огинзы (Обществозы) кылдэ. Отын кӧня ке ёзэз ужа, удмурт ёзэныз И. В. Яковлев кивалтэ. 1917 арын куартолэзьлэн шораз та Огинлэн съездэз люкаське. Ог арня ӵоже бигер, башкир, чуваш, мордва, мари, удмурт калыкъёслэн азьветлӥсьёссы пӧртэм юанъёсты эскеро: ас коже кивалтон, дышетон, кооперация, музъем сярысь. Нырысь ик вераське Т. К. Борисов, собере прениын кыл сётӥське И. В. Яковлевлы но. Ваньзы сямен федеративной республикаез умоен лыдъяло. Калыкез дышетонъя ужпумын И. В. Яковлевлы удмурт кылын задачник дасяны ӵектӥллям вал. 15 гудырикошконэ 1915 арын «Войнаись ивор» газет «Удморт» нимын потыны кутскиз. Газетэ интыямын вал И. В. Яковлевлэн «Удмортлэн улэмез» статьяез. Автор аслаз статьяяз удмуртъёсты дышетскыны ӧте, соослэсь пеймыт улэмзэс, бере кылемзэс шарая, удмурт пиналъёсты удмурт кылын дышетонлэсь кулэлыксэ валэктэ.

Октябрь революция бере юн-юн удмурт лулчеберетэз азинтонэ пыриськыны кутске: Казаньысь Наркомнацлэн удмурт ёзаз книга, газет-журнал поттон бордын тырше, бадӟым уж нуэ Казань университетын рабфаклэсь удмурт ёззэ кылдытон-радъян бордын, удмурт студентъёсты совпартшколаын, Таткомвузын но пединститутын дышетӥз. Казаньын 1918 арын толшоре И. В. Яковлевлэн но Н. А. Бобровниковлэн «Удмуртъёслы гожтэм гожтэт» нимо брошюразы потэ. Тулыс Елабуга уездысь удмурт кенеш Елабугаын удмурт дышетӥсьёсты дасянъя кык толэзьем курсъёс радъясько. Та уже но лекциос лыдӟыны асьме палась тодӥсь-валась дышетӥсьёс И. С. Михеев (Кукмор ёросысь) но И. В. Яковлев ӧтисько.

26 инвожое 1918 арын усьтӥське Вань удмуртъёслэн нырысетӥ …тчамзы. Сое усьтонэ 78 делегат люкаське. …тчамлы тӧрое огкылысь Максим Прокопьевич Прокопьев бырйиське. Эскероно ужпумъёс: интыосысь докладъёс; калыкез дышетон; газет-журналъёс, кнгигаос поттон; удмуртъёслэн Татар-Башкир республика кылдытон шоры учкемзы; удмуртъёслэн Прикамской(Кам котыр) губерния кылдытон шоры учкемзы; нимаз удмурт волостьёс кылдытон сярысь; удмуртъёс пӧлын кооперация, вузъёсын тырмыт карон сярысь; тазалыкез утён сярысь; Удмурт комиссариат но РСФСР-ысь Наркомнаце кык муртэ быръён сярысь; школаосын Закон Божийез дышетон сярысь. Делегатъёс огкылысь кутӥзы И. В. Яковлевлэсь В. Г. Короленколы, удмрутъёслы Мултан ужын дурбасьтӥсьмылы, ӟечкылан телеграмма лэзьыны ӵектонзэ. Соин ӵош ик съезд Кроленколэсь «Дело мултанских вотяков» книгазэ удмурт кылын поттыны пуктӥз. Вылӥ пуктэм ужпумъёсъя вераськиз на аспалмы И. В. Яковлев но. …тчам бадӟым кужым сётӥз удмуртъёслэсь асваланзэс будэтыны, калыкмес огазеяны, мукет калыкъёсын валче ӵошатскыса улыны. Татын асьме пал удмуртъёслэн но люкетсы вань вылэм.

Иван Васильевич Яковлев бадӟым пытьы кельтӥз удмурт литературае «Пичи Петыр» повестеныз, «Яктамыр-батыр», «Вормонтэм батыр» поэмаосыныз. Адӟем карылӥз А. С. Пушкинлэсь, М. Ю. Лермонтовлэсь, Л. Н. Толстойлэсь. 1917 ар бере кылбуръёсын куинь сборниксэ поттэ. Иван Васильевич дышетӥсь луэмысьтыз, трос сюлмаське пиналъёслы ӟечесь тодон-валанъёс сётон, дышетонэз умоятон понна. Озьы со трос дышетон книгаослэн авторзы луиз. Тужгес вӧлмемез — со 1906 арын поттэм «Грамматические упражнения в трёх частях» дышетон книгаез. Та книга ӟуч луымтэ пиналъёсты ӟуч кыллы дышетон туж пайдаё вал. Та учебникъя дышетылӥзы Волга но Урал котырын, Казахстанын, Шор Азиын, Сибирьын. Печатласькылӥз 11 пол 1917 арозь. Та учебник сярысь бадӟым дунъет сётыса, «Мэгариф» журналэ куке соку гожъяллязы бигер тодосчиос Р. Ф. Исламов, А. Ш. Асадуллин но. И. С. Михеевлэсь ӟуч кылъя лыдӟон книгазэ учкыса, удмурт пиналъёслы удмурт кылын лыдӟон книга гожтэ. Отчы пыртэмын туж тунсыкоесь визьнодась веросъёс, басняос, выжыкылъёс. Та книгаез но куинь пол печатласькылэ. Казань университетлэн археологияя, историяя, этнографияя Огинлэн (Обществолэн) ёзчиез луыса, тодосчи Яковлев трос материал люказ удмуртъёс пӧлын пелляськон, веднаськон, тунаськон сярысь, кырӟанъёс. Ас улытозяз 50-лэсь трос статьяос, кыллюкамъёс, дышетон книгаос, кылбуръёссэ но мукет произведениоссэ поттыны вуиз. Берло дырзэ Иван Васильевич Таткомуниверситетын, Казань университетысь рабфакын удмурт кылэз дышетонлы сӥзиз. Удмурт дышетӥсьёс азьын пӧртэм ӧтчамъёсын, конференциосын, кенешонъёсын докладъёсын потылӥз, ӟечесь ӵектонъёс сётылӥз.

И. В. Яковлев кулӥз 1931 арын. Вордскем гуртаз сое уг вунэто. Покчи Лӧзя школаын шаертодон музеязы дано аспалзылы сӥзем сэрег вань.

Василий Никитин

Карек-Серма гурт