Ваньмыз улмоен герӟаськемын вал

Та нуналэ нылпиослэн дырзы туж пайдаё ортчиз. Соос тодматскизы праздниклэн историеныз, соин герӟаськем сям-йылолъёсын, тодӥзы трос тунсыкозэ, мылысь-кыдысь шудонъёсы пыриськизы. Шудонъёс но аспӧртэмлыкоесь вал, ваньмыз улмоен герӟаськемын.

«Зэмзэ ке верано, сомында пиналъёс люкаськозы шуыса чик ӧй малпа вал, ог 60 мында нылпиос люкаськизы, дыр», — шуэ «Яблочный спас яблочко припас» шуыса нимаськем ужрадэз ортчытыны малпам, ачиз радъям но ортчытэм нылкышно — Галина Петрова.

Паймод та кышномуртлэн пӧзись улонэзлы, буйгатсконэз тодӥсьтэм мылкыдызлы, чик тэк пукыны уг тоды со. Веранэ Покчи Лӧзя Культура юртысь художественной руководитель Галина Денисовна Петрова сярысь. Лӧзяослэн традиционной «Берёзка» праздниксы но, Петрол нуналлы сӥзем калык шулдыръяськон но, Улмо Спас нуналэ ортчем ужрад но солэн тыршемезлэн бервылыз луэ.

Кыӵе ке ужрад ортчытыны малпаку, одӥг мылкыд гинэ уг тырмы, коньдон ужпумъёс сярысь но сюлмаськоно луэ. Огъя вераса, спонсоръёсты утчаны тупа. «Таяз радэ нокинлэсь коньдон курыса ӧй ветлы, кӧня ке кузьымъёс азьло ужрадъёслэсь кылемын вал, кӧнязэ ке ачим басьтӥ», — шуэ Покчи Лӧзя Культура юртысь лулчеберетъя кивалтӥсь. Нош тани Петрол праздникез ортчытыкузы коньдонэн юрттэт сётэм Бадӟым Лӧзя гуртысь ужбергатӥсь Сергей Плотников. «Сергей юрттӥз, праздникмы шулдыр ортчиз», — шуэ ачиз Галина Денисовна, таукарон кылъёссэ вераса.

Бен, улонзы пӧзе лӧзяослэн, толэзьлы быдэ кыӵе ке ужрад (куд-ог дыръя одӥг гинэ но ӧвӧл).  Галина Денисовна выль но выль мылкыдъёсын улӥсь адями угось, солэн котьку азьлапаллы мар ке но маппамын. Али дыре тани 30 гудырикошконэ, Татарстанлэн нуналэзлы сӥзьыса, ужрад ортчытон малпанэн улэ со. Малпасько, солэн та малпанэз но одно ик улонэ пыӵалоз шуыса.