Водительлэн улонэз – сюрес...

Вазь ӵукна ик «Сурнай» обществолэн гаражаз уж пӧзе. Ужасьёс техниказы доры дырто: кин ке двигателез заводить каре, кин ке потон азяз берпуметӥзэ эскерон ортчытэ. Ваньзы бусыын выль ужан нуналлы дасясько. Соос пӧлын КамАЗ машиналэн водителез но — Константин Иванов.

— Бусыосы вазь ӵукнаысен ик потӥськом. Татын мон дас одӥг ар ужасько ини, со пӧлысь дас арзэ КамАЗ-лэн водителез луыса. Огъя водительской стаже — 17 ар. Уже мыным кельше, со саклыкез но кылкутонэз кулэ каре, — вера Константин Анатольевич.

Солэн ужан сюресэз 15 ар талэсь азьло, 2010-тӥ арын, кутске. Покчи Лӧзя гуртын 26-тӥ шуркынмонэ 1988-тӥ арын вордскем Константин Иванов, 2006-тӥ арын гуртысьтызы школаез йылпумъяса, 2009-тӥ арозь Савалиысь политехнической техникумын средне-профессиональной тодон-валан басьтэ, программистлы дышетске. Водительской удостоверение 2007-тӥ арын басьтэ. 2010-тӥ арын оштолэзе ужан сюрессэ мытэ: «МДСУ-1» обществое сюрес лэсьтонъя сезонной уже интыяське. Собере «Стройсервис» обществоын водитель луыса ужан сюрессэ азинтэ. Шуд утчаса, палэнэ но кошкыса уте: Казаньысь моторостроительной производственной предприятиын кӧня ке ужа. Но шудэз ас вордскем музъемаз, гуртын ик вылэм! Озьы 2014-тӥ арын егит воргорон гурт возёс удысэ вуэ, «Сурнай» обществоын тракторист луыса ужаны кутске. Нош 2015-тӥ арын водительлэн ужаз выже, КамАЗ-эн ужа. Али дыре, КамАЗ-эн туж ик уж луымтэысь, ГАЗ-53 машинаен ужа, вань пуктэм ужпумъёсты усто, рос-прос быдэсъя.

— Мон вордскемын колхозникъёслэн семьяязы. Анай-атае ас дыразы гурт удысын ужамын, али дыре пенсиын ини. Огъя вераса, быдэс поколениосмы милям колхозын будэм макеос. Соин ик, дыр, сюлмы монэ но гурт удысэ кыскиз. Пичи дырысен ик ини мон пӧртэм техникаен тунсыкъяськи. Тужгес но тунсыко пото вал мыным ӵужатаелэн, Никифоров Михаиллэн, пӧртэм ужъёсыз. Со туж яратӥз техникаез, солы тунсыко потэ вал соосты тупатъяны, выльдыса, выль улон сётыны. Соин но ӵужатае техникаез тупатъясь адӟем карымон усточиен тодам кылиз. Малпасько, гурт удысэз гажан, ужез яратон мылкыдъёсты пыӵатонын та факторъёс валтӥсь инты басьтӥзы, дыр, — шуэ Константин. 

Гурт возёсъёсын тыршись водительлэн ӧнерез шӧдскымон висъяське карысь грузоперевозчикъёслэн ужзылэсь. Валтӥсь аспӧртэмлыкез бусы ужъёслэн сезонной луэменызы юн герӟаське. Тулыс-гужем ӵоже водительёслы шутэтскытэк ик ужано луэ, удобрениосты, кизёно юосты но тӥрлыкез бусыосы ӝог вуттоно, музъем ужасьёс бусыосты кизьыны но муосты дыраз утялтыны, пудо сиён дасяны мед вуозы шуыса. Сӥзьыл вуэмъя, кысык ужан дырлэн выль тулкымез вуэ: кисьмам ю-нянез октоно но итымъёсы, амбаръёсы вуттоно, кукурузаез утялтоно, картофкаез ӝог бичано, гуосы интыяно.

Азьланьтонзэ 42 номерысь лыдӟыны быгатоды