Выльдӥськон – ӟеч азьпаллэн инъетэз медло (1 люкет)

Мерлык но калык

Мерлыко уж трос дырез но кужымез кулэ каре. Калыкез огазеяны, мукет калыкъёс пӧлын данзэ вӧлмытыны, егитъёсты но пиналъёсты калык сям-йылолъёсын, кылэн тунсыкъяськытон — та ваньмыз лулчеберетъя йӧскалык огазеяськонлэн ёзчиосызлэн валтӥсь ужпумъёссы. Сое быдэстыны туж бадӟым юрттэт сёто школаосын, музейёсын, библиотекаосын, клубъёсын ужась ӧнерчиос.

Пичи гуртъёсын удмуртлык юнгес возиське на, нош городъёсын ини нылпиос чылкак ӟучомемын, удмурт кыллэсь но лулчеберетлэсь куштӥськемын. Азинтӥсьёслэн тыршеменызы гинэ калыклэн чеберлыкез выль сямен усьтӥське. 

Туала нылпиос троссэ информационной дуннее выемын. Пӧртэм гаджетъёслэн, туала технологиослэн нуналмысь улонэ пыременызы, сям-йылолъёсты палэнэ кельтӥськом, кунгожысь трендъёслы синмаськиськом. Калыкез лыдъян-чотанъя, асьсэды удмуртэн лыдъясьёс арысен аре ӧжытгес но ӧжытгес кылё. Жаляса верано, та тенденци ӝожомон но кышкан югдуре вуттэ. Быдэс Россиын 2010 арын асьсэды 552 299 адями «удмурт» шуиз ке, 2020 арын та лыдпус 386 465 гинэ луиз ини. Республикая верано ке, 2010 арын удмуртъёс шуыса асьсэды 23 454 адями пусйиз, нош 2020 арын — 21 327-ез гинэ. 

Бен, республикая учконо ке, югдур сокем шугъяськымон югдур ӧвӧл кадь. Но кӧняез гинэ соос пӧлысь удмурт нылпиос удмурт кылэз валаса но тодыса, вераськыса будо? Гуртъёсысь удмурт семьяосты но учконо ке, семья пушказы удмурт кыл шергес но шергес чузъяське ни.

«Городэ кошкизы ке, ӟуч кылын умой мед вераськозы», «кошкизы ке, калык пӧлын акцентэн верасько», «удмурт кылэз тодыса кытчы мыно ини соос», «удмурт кылын вераськыса кыдёке уз мынэ» — таӵе выллем веранъёсты кылӥсько ке, пушкам ваньмыз ӝуаны кутске. Ку кылъёсты тодон могӟет кылдытыны кутскиз? Юнме шорысь удмурт кылбурчи Даниил Яшин ӧз гожты вал: «Аслэсьтыд кылдэ яратытэк, мукетсэ уд дышы гажаны». Аслэсьтыд выжыдэ вунэтыса, мукет калык но тонэ бордаз уз кыскы.

Озьы ке но, бигер элькунысь удмуртъёслэн автономизы аслэсьтыз ужзэ быгатэмезъя азьланьтыны тырше. Со понна Вконтакте вотэсбамын кык пӧртэм группаос кылдытэмын. Сётӥськом соослэсь qr-кодъёссэ (бамлэн улӥяз сётэмын). Итӥське элькунысь удмуртъёс борды.