Вылын Ушма гуртын стела усьтӥзы

Куартолэзь асьмелы шуныт вае. Нош та толэзез асьмеос яратӥськом 9-тӥ куартолэзь понна. Туэ асьмеос Быдӟым Атыкай ожын Вормонлэсь 80-тӥ тулыссэ пумитамы! 

Туж ӝутскем мылкыдэн люкаськизы сизьыметӥ куартолэзе милям Вылын Ушма школаямы ож мышкын ужамъёс но ож нылпиос. Куазь но шулдыр луиз со нуналэ. Льӧмпу но чияпу сяська зын лӧсъяськиз котыр улосэ.

Туж шулдыр концерт учкизы лыктэм куноос. Пиналъёс но школа-нылпи садын ужасьёс мылысь-кыдысь дасяськиллям. Нырысь ик дышетӥсь МироноваИрина Васильевна тодматӥз проектэн, кытын возьматэмын вал ож нылпиослэн 10 ар талэсь азьло туспуктэмъёссы но али дырын фотооссы. Ӝыныез соос пӧлысь кулэмын ини. Жаляса верано луэ, ожысь ветеранъёс милям гуртын ӧвӧл ини табере. Лыктэм куноосты узыр ӝӧк сьӧрын ческыт чаен утялтӥзы. Мар кулэ на пересьёслы?! Вань кадь ож нылпиослэн нимынызы, школа-нылпи садын ужасьёслы но пиналъёслы, Покчи Лӧзя школаын дышетскисьёслы туж бадӟым таукылмес вераськом! Азьланяз но ужаны тазалык но азинскон сӥзиськом соослы.

Та нуналэ ик ӝыт 6 часэн милям гуртын стела усьтонлы сӥзем ужрад ортчиз. Мылкыд карем гуртоосмы люкаськизы стела доры. Ужрадэз кутскиз Покчи Лӧзя гурт поселенилэн кивалтӥсез Исмагилов Айдар Салимзянович. Азьланьтӥз праздникмес Балтась ёрослэн главаезлэн воштӥсез Сабирзянов Наиль Нургаязович. Соос вань люкаськем калыкез ӟечкылазы Вормон Нуналлэн 80 аръем юбилееныз. Собере мон аслэсьтым гожтэм кылбурме лыдӟи. Ӧжыт гинэ дасям концерт но учким. Милям стелаын гожтэмын: 25 мурт войнаысь бертымтэ, 30 солдат берытскем. Соос но улэп ӧвӧл ини табере. Ужрадлэн пумаз стела доры сяськаос но венокъёс понӥмы. Вань лыктэм гурт калыклы тау кылме верасько. Азьланяз но таӵе ужрадэз умой ортчытыны мед кылдоз!

Екатерина Иванова,
Вылын Ушма гурт