ЗАГ, Кызьы огазеясько талантъёс: гурт клубъёслэн валче ортчытэм концертъёссы

Берло дыре ёросын аспӧртэмлыко тенденция шӧдӥськыны кутскиз: гурт клубъёс но лулчеберетъя юртъёс концертъёсты валче ортчытъяны ӧдъязы. Одӥгез сыӵе яркыт пример луэ кемалась ӧвӧл ортчем праздниклы — Анайлэн нуналэзлы — сӥзем концертъёс. Кылсярысь, сыӵе эшлыко концертъёс туэ Ципья, Покчи Лӧзя, Ӟаны лулчеберетъя юртъёсын, Сизнер гурт клубын луизы. Вераны кулэ, калык туж шумпотыса потэ таӵе пумиськонъёсы. Тае клубъёслэн но лулчеберетъя юртъёслэн кивалтӥсьёссы но пусъё:
— Сыӵе совместной концертъёс, мон малпасько, туж тунсыко пӧрмо, учкисьёс но уно люкасько. Тани Анайёслэн нуналзылы сӥзем концертамы но, кудӥз 5-тӥ толсуре ортчиз, калык быдэс зал тыр люкаськиз. Со нуналэ ми Ӟаны гуртысь лулчеберетъя юртэн ӵош концерт пуктӥмы, ог 100 пала мурт пыриськиз отчы. Нош ми асьмеос Ӟаные мынӥмы ни вал 9 май дырья, соос дорын концерт возьматӥмы. Собере мынӥмы Покчи Лӧзяе. Табере тани соос ми доры лыктыны кулэ. Кылем арын Арлыдоослэн нуналзылы Арборе мынӥмы, собере соос ми доры лыктӥзы. Азьло палан но та ӧрын ужанмес азьланьтыны малпаськом, кылсярысь, Улисьял гуртысь самодеятельной артистъёсын валче концерт ортчытыны малпанмы вань, — шуэ Ципья лулчеберетъя юртысь устолыкъя кивалтӥсь Евгения Михайлова.
Нялтас вераса, ӵапак Ципья лулчеберетъя юрт ик таӵе ужан амаллэн кичӧлтӥсез но луэм вылэм.
— Бен, та милям Елена Александровна Демееваен инициативамы луиз. Ялан одӥг ик артистъёсыз адӟемзы но уг поты, дыр, зрительёслэн шуыса, ми малпамы мукет клубъёсын валче концертъёсты ортчытыны, — валэктэ Евгения Петровна. 
— Лулчеберетъя ёзэт, ужъюлтошъёсты кызьы пумитазы та малпандэс? Дурбасьтӥзы-а тӥледлы, итӥськизы-а бордады? — юасько.
— Нырысь ик кылем арын октябре, Арбор лулчеберетъя юртлэн директореныз огкылэ вуыса, ог-огмы доры ветлӥмы. Ёросысь лулчеберетъя ёзэт но милемлы дурбасьтӥз, автобус сётӥз. Мукет клубъёс но умой шуыса веразы. Ӟаныослы но лӧзяослы та малпан кельшиз. Соосын вераськыса концертъёс ортчытӥмы. Весь одӥг муртъёсын пуктӥськомы ук концертъёсыз, нош тазьы выль артистъёс сцена вылэ пото. Тӥни озьы Арбор, Ӟаны но Покчи Лӧзя лулчеберетъя юртъёсын ог-огмылы юрттыса ужаськом, — вера лулчеберет удысын ужась. 
— Мон туж шумпотӥсько, концертъёс тазьы ортчытъяны кутскимы шуыса. Кылем арын Ӟаны но Ципья лулчеберетъя юртъёсын валче концертъёсты ортчытӥмы. Бӧрысь ми соос доры мынӥмы. Озьы капчигес но шулдыргес! Туэ мон ӧти Княбаш гурт клубысь артистъёсты но Дурга гуртысь апай-сузэръёсты — Татьяна Ахмадиеваез но Ольга Камашеваез. Татьяна али ужа Сизнер клубын. Соос шумпотыса 30-тӥ шуркынмонэ ми доры лыктӥзы. Нош ми 6-тӥ толсуре Сизнере ветлӥм. Милемыз туж шуныт пумитазы учкисьёс. Концертъёслэсь, клублэсь туж мӧзмиллям, вылды. Жаль, ми ньыль кузя гинэ вал. Оскиськом, выль ар бере быдэс составен отчы концертэн мыныны быгатом шуыса. Таӵе ужан амал милемлы туж кельше. Вань на малпанмы Ӟаны лулчеберетъя юртын концерт пуктыны. Тӥни озьы ужаськом, — малпанъёсыз сярысь вера Покчи Лӧзя лулчеберетъя юртысь устолыкъя кивалтӥсь Галина Петрова. 
Валче ортчытэм концертъёс сярысь гожтэме быдэс уз луы, дыр, шуыса малпасько, учкисьлэн малпанэзтэк.
— Мыным шуд усиз Сизнер гуртын Анайёслэн праздниксылы сӥзем концертэз учкыны. Концерт туж сюлмысь но шуныт пӧрмиз. Котькуд выступлениез учкисьёс кужмо кичабонъёсын пумитазы. Шумпоттӥз, нылпиос но выступлениос дасяллям шуыса, соос трос номеръёсы пыриськылӥзы. Малпасько, соослэн анайёссылы пиналъёссэс сцена вылын адӟыны шумпотымон вал. Концертэ озьы ик пыриськизы мукет гуртъёсысь адямиос но. Таин сэрен пӧртэм номеръёс яркыт пӧрмизы, учкисьёсты туж тунсыкъяськытӥзы. Та туж умой опытэн вошъяськон! Тау шулдыр но шуныт ӝыт понна радъясьёслы но артистъёслы, — мылкыдъёссэ вера Казаньысь куно — Ляйсан Матвеева.
Зэмзэ но, валче ортчытэм концертъёс тунсыко луо. Одӥг ласянь, со мукет гуртысь адямиосын кусып возён, мукет ласянь — аслэсьтыд быгатонлыкъёстэ возьматон. Таӵе ужрадъёсты валче ортчытонлэн пайдаез шӧдскымон: валче ужрадъёс гуртъёс куспын эшъяськонэз юнматыны юртто, пыриськисьёслы творчествоя опытэн вошъяськыны луонлык сёто но учкисьёслэсь тунсыкъяськонзэс будэто. Таӵе концертъёс тросгес пыриськисьёсты но учкисьёсты кыско, праздник но огазе кариськон мылкыдэз кылдыто. Таӵе ужрадъёсы пыриськон юрттэ егит артистъёслы данъет басьтыны, быгатонлыксэс будэтыны но выль яратӥсьёсты шедьтыны.

Фото: Е. Михайлова