Зэмос директор но, дышетӥсь но

Ми вордским но будӥм Совето Союзын. Туж кужмо пужалляськыса ужазы соку котькуд удысын. Жадёнэз, ӝожъяськонэз валатэк, партилэсь пуктэм ужпумзэ мыло-кыдо быдэсъяллязы. Котькытын шӧдӥськиз адямилэн вань кужымзэ, мылкыдзэ поныса ужамез.

Югыт вал соку котырын! Колхоз ужын-а, больница, школа юртъёсын-а — ужазы: визьмазы, эмъязы, ю-нянь будэтӥзы. Пиналъёсты но школаын ик дышетӥзы ужез, улонэз, вордскем шаерез яратыны, ог-огеныд тупаса ӟечен улыны.

Ӟаны школамы, азьло таӵе чебер юртэ интыяськемын ӧй вал ке но, милемлы туж чебер но дуно потылӥз. Дуно но синмаськымон вал милемыз дышетэм дышетӥсьёсмы но.

Ермаков Иван Васильевич кема аръёс школалэн директорез вал. Зэмос бадӟым сюлэмо дышетӥсь но кивалтӥсь вал со.

Капчи ӧвӧл адямиосын ужан удыс. Кивалтон уж сяна, хозяйство ужъёсты нуон но трос дырез, мылкыдэз но визез кулэ каре. Азьлань мынон, пуктэм ужпумдэ быдэстон, ӟечен гинэ выль но выль вырйылэ вутскон понна трос тыршыны кулэ. Соку али кадь выль технологиос ӧй вал на, ваньмыз адямилэсь валамзэ, кутскем ужез сётскытэк пумозяз вуттэмзэ кулэ кариз.

Шудо дыръёс вал соку! Адямиос но огшорыесь, дышетӥсьёс но паськыт усьтэм сюлэмоесь, визьмоесь, нылпиос но бадӟымъёслэсь кылзӥськисесь, кышкасесь, вань верам дышетэмъёсты валасесь! 

Кӧня пӧртэм тунсыко ужрадъёс ортчо вал школаын. Милям школаын дышетскись пиналъёс сюлмысен, мыло-кыдо пыриськизы смотр-конкурсъёсы, олимпиадаосы но мукет со выллем ужрадъёсы. Туннэ нуналэ со шудо школаын дышетскем аръёс тодамы, фотокарточкаосын гинэ возьмасько на.

Улон ортче, ар сьӧры аръёс лобӟо, вордско нылпиос, пересьмо дышетэм дышетӥсьёсмы но. Озьы мынэ улон.

1982-тӥ ар Ӟаны школа понна — шуккет луиз: Ӟаны школаез огазеязы Тюнтер школаен. Соку мынам классэ 9 классэ Тюнтере выжиз. 10-тӥ классын милемын Иван Васильевич кивалтӥз. 1 ар дышетэм арез но милям классмы понна вунонтэм тунсыко ужрадъёсын узыр луыса кылиз.

Быгатӥм ми бускель гуртъёсы спектаклен но ветлыны, Ижевске но вуыны. 1 арез но зэмос дышетӥсьмы Иван Васильевич милемын сюлэмзэ поныса ужаз. Аслэсьтыз зэмос дышетӥсь луэмзэ шараяз!

Мед али трос луозы шумпотыса, каньыл, шудо-буро улон нуналъёсыз гажано дышетӥсьмылэн. Вань ӟечсэ гинэ солы та улонын. 

1984 арын Тюнтер школаысь 10 классэз йылпумъям дышетскисьёслэн нимынызы Нина Кумаева

Туспуктэм лэсьтэмын Ижевске мыном вакытэ.