«Зуркатӥзы» Балтась удмуртъёс бускель музъемез

Южтолэзь — со вань улослэн сайкан вакытэз. Шуныт куазьлы шумпотыса, мылкыд но капчигес луэ, пальпотӥськод нырысетӥ пельтэм тӧллы, паймиськод сяськаяськись писпуослы но нырысетӥ куар поттэм сяськаослы. Озьы ик лулчеберет но кутске аслэсьтыз выль тулыссэ.

15 южтолэзе Кукморысь лулчеберетъя юртын нош ик люкаськизы удмуртъёс. Мӧйыос, быдэ вуэмъёс, пичиос огкадь луыса султӥзы сцена вылэ, возьматӥзы но тодматӥзы интыысь лулчеберетэнызы. Сяме пыремъя, куноосты пумитазы кырӟанъёсын но калык сиён-юонэн. Быдэс шаерысьтымы самой усто коллективъёс удмурт шӧмен пыӵам эктонъёссэс вайиллям. Ӵыдонтэм чебер адӟиськизы сцена вылын удмурт дӥськут но чеберман тӥрлыкъёс.

Зэмзэ но, удмурт калык лулчеберет али ке но пумаз-йылаз эскеремын ӧвӧл на. Выльысь но выльысь асьмеос тодматскиськом калык гуръёсын, сям-йылолъёсын. Пӧртэм инъетъёсысь ивортодэт люкаса, шедьтӥськом выль но выль материалъёсты, кудъёсыз пырыса кылё коллективъёслэн репертуаразы. Со котькуд ёрослэн нимысьтыз: аслаз манерез, аслаз гурез, аслаз выросэз.

VIII улоскуспо калык эктонъя «Эктон дыр» вожвылъяськон котькуд аре тросгес но тросгес удмуртъёсты огазея. Шумпотымон, та вожвылъяськонэ вань номеръёс пӧлысь ӝыныезлы матын Балтась коллективъёс луизы. Со Ципья, Покчи Лӧзя, Ӟаны лулчеберетъя юртъёс, Сырья но Вуж Кушкет гурт клубъёс. Данъяськыса вераны кулэ, соос туж вылӥ уровенен дасям эктонъёсты быдэстӥзы. Йылпумъянъёсыз но ушъяськымонэсь, коллективъёсмы I, II но III степенё дипломъёслэн лауреатъёссы луизы.