Гаиләләргә бушлай концерт

Күптән түгел район мәдәният үзәгендә махсус хәрби операция ветераны Ленур Биктимеровның концерты булды. Әлеге концертка махсус хәрби операция гаиләләре бушлай чакырулы иде. Концерт барышында җырчы гаиләләргә шушындый игелекле мөмкинлек тудырган Балтач муниципаль районы башлыгы Рамил Нотфуллинга рәхмәтен җиткерде. 

Концертка килгәндә, ул бик матур узды. Махсус хәрби операциягә катнашы булган һәркем канәгать калды. Кайбер җирлекләр мобилизация башланган көннән бирле җиң сызганып эшләүче волонтерларын да чакырган иде. Җырчы Балтач җирлегендә яшәүче һәвәскәрләргә дә сәхнәдә урын бирде, аның бу алымын алкышларга күмеп кабул иттеләр.

Ленур Биктимеров шәһит киткән кардәшләренең рухына багышлап та җырлар башкарды, күзләрдән яшь кипмәде, йөрәкләр Ленурга кат-кат рәхмәт әйтеп типте, искә алулар инде арабызда булмаган батыр райондашларыбызның рухларын шат кылсын.

Бик яхшы концерттан күңелләре булып кайтып киткән әниләр районыбыз башлыгы Рамил Нотфуллинга зурдан-зур рәхмәтләрен «Хезмәт» газетасы аша җиткерүебезне үтенеп, Рамил Рәшитовичка эшендә уңышлар, гаиләсенә сәламәтлек, ил-көннең тынычлануын теләделәр.

Ленар үзе дә махсус хәрби операция зонасында көрәшкән егет. Алгы сызыкта чакта кардәшләре арасында ул берүзе исән кала, аңарчы көрәштәш дусты аңа төшен сөйләгән була, «төшемдә кара атлар күрдем, арасында тик бер генә ак ат бар иде» дигән була. Менә шул Акбүз ат дигәнең бүгенге көндә яралы аяк белән үз хәлен үзе белеп йөрүче Ленар булып чыга да инде.