Баланы бакчага йөртергә ярыймы?

 Гаиләбез белән ислам динен тотабыз. Намазга бастык. Балабызның бакчага барыр вакыты җитә. Аны дәүләт яслеләренә бирсәк ярыймы? Анда ризык хәләлдерме, белмибез. Баланың бакчада ашаган ризыгы өчен әти-әни җаваплымы икән? Баланы җыр түгәрәгенә йөртергә ярыймы? 

“Гаилә” мәчете имам-хатыйбы Рөстәм хәзрәт ХӘЙРУЛЛИН җавап бирә:

— Хәзер хәләл ризык булган балалар бакчалары да күп, шөкер. Бала ничә яшьтә булуына карамастан, хәләл ризык ашарга тиеш. Рәсүлебез: “Әни ул — мәдрәсә”, — ди. Ягъни баланы күбрәк анасы тәрбияләсен, балалар бакчасына бирмичә, үзе өйрәтсен, укытсын, мәчет үткәрә торган түгәрәкләргә дә бала әни белән барсын иде. Баланы җыр түгәрәгенә яздыру буенча төрле фикерләр бар. Ләкин татар халкында җыр-бию һәрвакыт яшәде һәм яши. Шуңа да рөхсәт ителгән, шәригать кануннарына каршы килмәгән түгәрәкләрдә шөгыльләнсә, күпкә хәерлерәк. Баласын хәрам ризык ашый, гөнаһ кыла торган җиргә йөртсә, ата-ана, әлбәттә, моның өчен җавап бирер.

чыганак