Луиза Закирова «ТНВ»дан китә?

Озак еллар алып баручы булып эшләгән Луиза Закирова «ТНВ» телеканалыннан китә.

«Мин китәм… 18 ел. 6570 көн. Ярты гомер. Ә бәлки, күбрәктер дә. Эш, кешеләр, ялгышулар, түбән төшүләр һәм күтәрелүләр турында нәрсә беләм – боларның барысына да «ТНВ»да өйрәндем. Әлеге телекомпания минем өем, университетым һәм көзгем иде. Мин биредә үземне эзли, таба һәм яңадан югалта идем. Хәзер китәргә карар кылдым. Нигә? Бу хакта алдагы постларымда язачакмын.

Бүген соңгы язылу көне иде», – дип хәбәр итте Луиза социаль челтәрләрдә.

Экраннар «йолдызы»на коллегалары һәм дуслары яңа проектларында уңышлар теләгән.

«Уңган, тырыш, булган кыз! Киләчәгең уңышлы булсын. Ак юллар, матуркай»; «Балигъ булуың белән»; «Елыйм һәм үлеп-үлеп сокланам. Уңышлар телим»; «Луиза, иң яхшысы, иң кызыклысы, иң перспективалысы, күп керемлесе һәм мавыктыргычы – алда! «ТНВ» – үсә һәм акча эшләп була торган урын түгел, аеруча синең кебек профессионаллар очрагында. Синең тырышлыгың һәм эшеңә тугрылыгың белән таулар күчерәчәксең», – дип язалар аңа.

Интертат