Марат Яруллинның тормышта зур яңалыклар

Җырчы яңа фатирга күчүе, эстрадада танылу ысуллары һәм киләсе концерт сезоны турында сөйләде. 

– Тормышыңда нинди яңалыкларың бар, Марат?
– Үземнең фатирыма күчтем, ремонт тәмамланды. Минем өчен бу зур вакыйга. Үзем эшләп алган фатир, монысы тагын да кадерлерәк. Озакка сузмыйча, Коръән укытып алдык. Әти-әни, туганнар, якыннар килде. Фатир бәяләрен үзегез беләсез. Күпмедер күләмен алдан ук түләдем, калганы ипотекага. Фатирны бизәү, мебель алуны дизайнер белән бергә эшләдек. Күңелемә ятты, үз өең дә үз көең инде. 

– Яшь җырчыларга эстрадада кыенмы?
– Үзеңне күрсәтер өчен мөмкинлекләр күп. Танылу өчен зур акчалар түкмәдем. Хәзер җырчыларга танылу өчен интернет ярдәмгә килә. “Танылу өчен күпме акча кирәк?” – дип сораучылар бар. Продюсер да кирәкми, тырышлык һәм теләк кирәк. 

– Бер концерттан күпме акча эшлисез?
– Аллаһка шөкер, барысына да җитә. Төгәл сумма әйтә алмыйм, чөнки финанс мәсьәләләр белән абый шөгыльләнә. Мин, гомумән, акча, мал артыннан кумыйм. Булганына канәгать.

– Эстрадага яңалык кертеп торасыз. Сездән кабатлаучылар да бар кебек. Ачу килмиме?
– Юк, нишләп? Карасыннар, эшләсеннәр. Әгәр мин кемнедер илһамландырам икән, димәк файдасы тия. Матур итеп кенә урласыннар. Алдан ничектер ачу килә иде. Ә икенче яктан яхшы бит ул. Мәсәлән, Салават абыйны гына алыйк. Күпләрнең Салават абый кебек буласы килә, әмма берсе дә Салават Фәтхетдинов була алмый. 

– Җырчылардан кемне үзегезгә өлге итеп аласыз?
– Салават абый. Ул легенда, бүген эстрадада аңа тиңнәр юк.

– “Өйләнеп куймасам, буйдак 2 концерт сезоны дәвам итәчәк”, – дип шаярттыгыз. Уеннан уймак чыкканы булмадымы?
– Әлегә юк әле. Безнең тамашачы юморны аңлый. Шулай да уенын чынын бергә кушып сөйләшергә яратам. Әле бер көнне социаль челтәрдә өлкән яшьтәге ханым: “Кайчан өйләнәсең инде. Картаеп бетәсең бит”, – дип комментарий язган. Картаймыйм әле. Шәраб шикелле елдан-ел яхшырам гына.

Илгизә Галиуллина

 Шәһри Казан

Фото җырчының социаль челтәреннән