Балтач зиратында күмәк өмә оештырылачак

Зиратлар – адәм баласының соңгы йорты. Алар яныннан узганда гына булса да, һәркем үзенең бу дөньяда мәңгегә килмәгәнлеген исенә төшерә. Бүген яшәгән йортыбыз ничек чиста булса, зиратларны, каберлекләрне дә шулай ук җыештырып, төзек тоту – иң саваплы гамәлләрнең берсе.

Мәрхүм туганнарыбыз алар рухына дога кылуга гына түгел, каберләрен төзекләндереп, карап, чистартып торуга да мохтаҗ һәм бу эш – нәсел дәвамчыларының бурычы.

Агымдагы атнаның шимбәсендә, ягъни 4 октябрь көнне, Балтач зиратында күмәк өмә оештырылачак. Туганнары, якыннары бистә зиратында җирләнгән райондашларыбызны һәм теләге булган һәркемне әлеге изге эштә актив катнашырга чакырабыз. Өмә иртәнге сәгать 8 дән көндезге 12 кадәр дәвам итәчәк. Исәннәрнең – кадерен,  үлгәннәрнең каберен белеп яшик!