Балтачта социаль объектларны төзекләндерү эшләре дәвам итә

Быел районда зур күләмле төзелеш һәм төзекләндерү эшләре каралган. Район башлыгы Рамил Нотфуллин шушы көннәрдә урыннарга чыгып, объектлардагы эш барышы белән танышты.

2024-25 елларда «Романтик» лагеры күп кенә үзгәрешләр кичерде. Быел да биредә эш дәвам итә. «Строймастер» оешмасы яңа йокы корпуслары төзи, «Водстрой» оешмасы ашханәгә реконструкция ясый.

Балтач һәм Норма мәктәпләрендә дә күптән көтелгән төзекләндерү эшләре башланып китте. Финанслау федераль һәм республика бюджетларыннан башкарыла. Балтач мәктәбендә «Водстрой», Норма мәктәбендә «Тасним» үзебезнең районның төзелеш оешмалары эшли.

Үзәк хастаханәнең гараж, ашханә, подвалында «Водстрой», Сосна авылында мәдәният йортында «Артстрой» оешмалары төзекләндерү эшләренә керештеләр.