Балтачның язмышларга буйсынмас җаннары “Наз”га җыелган (фото)

Районыбызда инвалидлар декадасы уңаеннан төрледән төрле чаралар үткәрелә. Балалармы, урта яки олы яшьтәгеләрме - һәркемнең күңеленә хуш килерлек. Без дә, киңәшләштек тә "Наз" тернәкләндерү үзәгендә әдәби-музыкаль кичә үткәрергә булдык. Китапханәдә эшләүчеләр буларак, һәр үткәргән чарабыз китап белән бәйле булырга тиеш дигән кагыйдәгә нигезләнеп, без инвалид язучы-шагыйрьләрнең иҗатына тукталырга булдык. "Язмышларга буйсынмас җаннар" дип исемләнгән бу чарада Ф.Яруллин, Г.Сагыйров, Л.Сәләхетдинова, Ч.Габделганиева иҗатларына күзәтү ясалды, аларның шигырьләренә язылган җырлар тыңланылды. Шул исемдәге китап күргәзмәсеннән китаплар тәкъдим ителде.Безне иң сөендергәне- тыңлаучыларның исләре китеп шигырь тыңлаулары, кабат-кабат укуны сораулары булды. Кичәбездә нур-нур өстенә нур булып Казан шәһәренннән килгән Газинур әфәнде Хәмидуллинның яттан шигырьләр укуы булды. Бер дә аерыласы килмичә генә кичәдән соң да аралашып, якыннан танышып хушлаштык.

Гөлсинә Животникова.