Ишеттегезме? Яңа салым турында закон проекты әзерләнә

Россиядә илнең автопаркын яңарту чараларын күздә тотучы закон проекты әзерләнә. Документны «Россия автомобиль дилерлары» ассоциациясе әзерли. Планнар турында ассоциациянең президенты Алексей Подщеколдин «Авторетейл. 1нче яртыеллыкның нәтиҗәләре» матбугат конференциясендә сөйләде, дип хәбәр итә РБК.

Аның сүзләренчә, әлегә закон проектының беренчел варианты гына әзер. Проектны әзерләү эшен июль азагына кадәр төгәлләргә планлаштыралар. Хәзерге вакытта ассоциация документның эчтәлеге буенча юридик консультацияләр алып бара.

Подщеколдин билгеләп үткәнчә, Россиядә юл йөрү кагыйдәләреннән тыш, автомобиль өлкәсен җайга сала торган норматив актлар юк диярлек.

«Законда без төп төшенчәләрне формалаштырырга телибез: нәрсә ул автомобиль, нәрсә ул дилер, кем ул автоҗитештерүче, кем ул дистрибьютор. Машинага хезмәт күрсәтү нинди булырга тиешлеге һәм автомобильне куллану вакыты нинди булырга тиешлеге турында язачакбыз», — дип аңлатты «Россия автомобиль дилерлары» ассоциациясе башлыгы.

Ул илдә автомобильләрне күчемсез милек кебек үк озак — 10-15 ел һәм аннан да озаграк эксплуатациялиләр, дип өстәде.

«Россия автомобиль дилерлары» ассоциациясенең төп инициативалары арасында — машинаның җитештереп чыгарудан алып утилизацияләүгә кадәр бөтен яшәү циклын күзәтү. Шулай ук автомобиль хуҗаларын ресурсларын эшләп чыгарган машиналардан котылырга стимуллаштырырга тәкъдим ителә.

«Эксплуатацияләү вакыты тәмамлангач, дәүләт иске машиналарны утилизацияләү программасы хисабына утильгә тапшыруда ярдәм итәргә тиеш», — дип билгеләде Подщеколдин.

Закон проектының якынча версиясе нигезендә, 15 елдан озаграк файдалануда булган автомобильләр өчен түбәндәге таләпләр кертелергә мөмкин:

Югары транспорт салымы;

Елга ике тапкыр мәҗбүри техник тикшерү узу.

«Калган төрле дискриминация кертергә кирәкми, — дип саный ассоциация башлыгы. — Кызганыч, безнең илдә хәзерге вакытта автомобильләрне уртача куллану вакыты 16 ел. Әгәр кырысрак нормалар кертсәк, гражданнарга зыян киләчәк», — дип өстәде Подщеколдин.

Чыганак