«Шаккаттык, тирес өстендә карбыз үскән», ди райондашыбыз

Курмала авылында гомер итүче Ирек Әгъләмҗанов үстергән сусыл, кып-кызыл карбызлар фотосын интернет челтәрләрендә күргәч, аны үстерү тәртибе, сорты белән кызыксынып, элемтәгә чыктык, дип яза Ирек мәйданы.

— Хатыным Шаһидә теплицада карбызны да, кавынны да үстереп карады. Үсмәде. Кайчак бик тырышсаң да, булып чыкмый бит ул, — ди Ирек абый. — Ә бу карбызларыбыз уйламаганда, көтмәгәндә үсте. Улыбыз узган ел майда күчтәнәчкә карбыз алып кайтты. Ашадык та кабыгын малларга бирдек һәм оныттык. Мал-туарны күп асрыйбыз. Карбызның кабыгы белән бергә, орлыгы да шунда эләгеп, маллар ашагач, тирес белән бакчага чыккан һәм тишелгән. Карбызның яфрагын таныйм, ул тишекле-тишекле. Күргәч, шаккаттым. Шундый могҗиза булды ул. Үзең чәчеп, җәй буе карап үстерсәң дә, бу кадәр уңышлы булмастыр, мин әйтәм. Күргәч, үземчә ара-тирә су сипкән булдым шунда, беркая да күчереп утыртмадым. Карбыз җәелеп үсә икән. Октябрьгә өлгерде. Соңга таба бераз кырауга да эләкте. Шушы бер төптән 7-8 карбыз булды. Дүртесе эре иде. Иң зурысы 5,4 кг авырлыкта булды. Аның баллылыгы... Бер ялгансыз әйтәм, кибетнекеннән баллы. Кечкенәләренең дә эче кызыл, бик тәмле иде.

Без социаль челтәрләрдә:  ВКонтакте, ВКонтакте, ТикТок, Ютуб, Одноклассники, Телеграм, Яндекс.Дзен

Район тормышына кагылышлы иң мөһим яңалыкларыбызны Балтаси_Хезмэт телеграм каналыбызда да укыгыз.