Калганнарга караганда яшьрәк булса да

– Сугыш башланганда миңа 11 яшь кенә иде. Ачлык, хәерчелекнең үзәкләргә үткән вакытлары күп булды. 7нче сыйныфны тәмамлагач мәктәпкә бармадым, чөнки эшләргә кирәк иде. 1941-1945 елларда Ленин исемендәге колхозда эшләдем. Әтием белән бергә ат сбруйларын төзәтә идек, арба, чана тәртәләре, тырма һәм чалгы саплары әзерләдек, кул тырмалары ясадык. Бәрәңге казу, салам өюләрне, каравыл торуларны әйтеп тә тормыйм инде, – ди ул.

Әлеге хезмәтләре өчен Гыйлван абыйга да, әтисенә дә “1941-1945 елларда тырыш хезмәте өчен” медале бирелә.

Гыйльван Гыйльмуллин Көнбатыш Украинада бандеровчыларның милли яшерен отрядларын юк итүдә катнаша. 1948нче елны ФЗӨгә алалар. Юллар аны Кузбасс шахталарына алып килә. 17-18 яшьлек егетләрне 2-3 километр тирәнлектәге шахталарга төшерә торган булалар. Карпат тауларында башыннан кичкәннәрен дә бик озаклап сөйли ветеран.

– ФЗӨ белән армия елларымны кушып санасаң, 5 ел да 7 ай хезмәт иттем, – ди Гыйльван ага.

Балтач бистәсендә яшәүче Гыйльван Гыйльмуллинга шушы көннәрдә 90 яшь тулды. Юбилярны Балтач районы башлыгы урынбасары Наил Сабирҗанов та тәбрикләде. Ул ветеранга изге теләкләрен җиткерде, Россия Президенты Владимир Путинның котлау хатын, чәчәк бәйләме һәм район башлыгының истәлекле бүләген тапшырды.