25 толшор — Татьянаослэн нуналзы (+фото)

Толшор праздникъёс выль ар каникулъёсын гинэ уг йылпумъясько — толэзьлэн пумаз, шонергес вераса, 25 толшоре, Россиысь вань студентъёс асьсэлэсь праздниксэс — Студентлэсь нуналзэ — пусъё. Соку ик Татьянаослэн нуналзы но пусйиське.

Кызьы тодӥськом, та кык нуналъёс куспазы юн герӟаськемын. Кылдэм историзэс учконо ке, ӵапак Дун-чылкыт Татианаез буре ваён нуналэ — 25-тӥ толшоре (вуж стилья 12-тӥ толшоре) 1755-тӥ арын Императрица Елизавета Петровна Москваысь кун университетэз усьтон сярысь указ гожтӥз. Со дырысен Татианалэн (туала дыръя — Татьяналэн) нуналыз студентъёслэн праздниксылы пӧрмиз. Али дыре та чебер нимез нуллӥсь нылъёс, нылкышноос та нуналэ ӟечкыланъёс басьто, семьяенызы яке эшъёсынызы праздникез пусъё. Пор-Кутешысь Трофимовъёслэн семьяязы но берло 7 ар ӵоже та праздникез пусъён чебер сямлы пӧрмиз ини: соослэн семьяязы кык Таняос — кык кенъёс — вань уга.

Праздникез Таняос арлы быдэ пусъё. Кыкназы гинэ но ӧвӧл — бадӟым семьяенызы ӵош (туннэ нуналэ соос 8 ӵошен уло). Та нуналэ матысьёссы соослы кузьымъёс кузьмало, асьсэос но соос ог-огзэсты праздникенызы ӟечкылало. Семья куспазы соос умой уло шуыса кык кенъёс уг вато. Та, валамон, кыкназылэн но Таня нимез нуллэменызы но арлы огпол Татьянаослэсь нуналзэс пусъеменызы гинэ уг герӟаськы…  

Кык Таняос Трофимовъёслэн семьяязы 2015-тӥ арын кен луыса лыктӥзы

— Милемлы ог-огмы борды дышыны чик секыт ӧй вал, кыкнамы но Таняос ук, огъя кыл шедьтӥмы. Сямъёсмы но тупало, улон шоры учконмы но, — пальпотыса веранзэс кутско егит нылкышноос.

Зэмзэ вераса, Таняос одӥг юртын кык кенъёс луыса улыны кутскытозязы ик тодмо вал ини — соос кыкназы но Ципья шоръёзо школаын одӥг ар кусыпен дышетскизы. Кыкназы но шыпытэсь, каньылэсь, тыршись дышетскисьёс вал, табере сыӵе ик кенъёс но луо.

Трофимовъёслэн семьяязы кен луыса нырысь Кузнецова Таня вуэ. Вордскемын но будэмын со Сырья гуртын. Пор-Кутешысь Трофимов Пётрен соос школаын дышетскыкузы ик эшъяськыны кутско. Эшъяськонзы яратонлы пӧрме но 2015-тӥ арын егитъёс кузпалъясько, чебер сюан ортчыто.

— Кузпалъяськытозь Пор-Кутеш гуртэ лыктэме вань вал ини, но картлы кошкеме бере нырысь капчи ӧз луы, малы ке шуоно Пор-Кутеш мон понна тодмотэм гурт вал, адямиоссэ но ӧй тоды, — шуэ бадӟымез кен. — Но шумпотымон, гурт калык йӧно, ӟеч пумитаз. Соин та ласянь шуг-секытъёс кылдӥзы шуыса вераны уг луы. Со сяна, анайзые Нина Юрьевна но туж шуныт пумитаз, монэ аслэсьтыз нылзэ кадь яратӥз.

2015-тӥ арын ик Пётрлэн выныз Юрий но Янгурчиысь Поликарпова Татьянаез кышно пыртэ (сюанзэс 2016-тӥ арын ортчыто).

— Мон татчы лыктэмен валче выль семьяме туж яратӥ, ваньзэсын огъя кыл шедьтӥ, — шуэ Юралэн кышноез Таня. — Кузпалъяськытозямы Юралэн серекъяса верамез но вал, «тон ми доры куное мынам анае доры ветлӥськод, лэся» шуыса. Малы ке шуоно мон зэмзэ но вуоно анайзыеным соку ик умой кусыпъёсын вал ини.

Таняос кыкназы но вераськыны кутскеммы бере ик анайзызы сярысь туж шуныт кылъёс веразы. Соослэн верамзыя, Нина Юрьевналэн семьялэн огъя но эшлыко улыны быгатэмез понна тыршемез вераса быдтонтэм бадӟым. Со валась но йӧно, кенеш сётыны быгатӥсь кышномурт. Асьсэос но Таняос сыӵе нылъёс. Юнме уг верало, дыр, ини, кенъёс анайзылы кельшо шуыса…

Нина Трофимова — семьяез огазеяса улӥсь анай

Нина апай ачиз Пор-Кутеш гуртэ Удмуртиысь Кизнер ёросысь вуэм, татчы со Владимир Трофимовлы картлы кошкем. Кышномурт ватытэк вера, Татарстанын улон солы капчиен ӧз сётскы шуыса. Но со котьку умой но валась кен луыны тыршем.

— Мон гумырам бадӟым семьяын улӥ, — валэктэ Нина Юрьевна. — Пор-Кутеше улыны лыктэме бере но песяй-бабаен улӥмы, куинь нылпиосмы вордскизы. Табере тани нылпиосы ваньзы асьсэ семьяоссэс кылдытӥзы. Ваньмы бадӟым семья луыса улӥськомы. Мила нылы семьяеныз Балтасьын улэ, нош пиосы семьяосынызы вӧзам. Туж шумпотӥсько, кык сыӵе йӧно кенъёсы вань но соос вӧзам шуыса. Верало ведь, киысьтыд дас чиньыед пӧлысь котькудӥз аслад, нокудзэ но висъяны уг луы шуыса. Озьы тӥни аслэсьтым нылпиосме кадь кенъёсме но туж яратӥсько, матын карисько. Соос но монэ туж ярато, гажало, верам кылме кылзо.

Туннэ нуналэ Пор-Кутеш гуртысь Трофимовъёслэн семьязы самой бадӟым семьяос пӧлысь одӥгез

Нина апайлэн визьмо но яратӥсь анай, Пётрлэн но Юрийлэн ужась, семья понна тыршись воргоронъёс, нош Таняослэн валась, ужез яратӥсь кенъёс луэменызы семья шулдыр, эшлыко луэ. Со бадӟыма, паськыта. Пётрен Таняослэн кык нылъёссы — Лия но Диана — будо, соос нылпи садэ ветло али. Кузпалъёс кыкназы но «Дуслык» обществоын тыршо, Таня кунян ваён  отделениын скал кыскись, нош Пётр — тракторист.

— Та семьяын монэ матын карыса пумитамзылы мон пумтэм тау карисько, — шуэ сырья кен. — Анаен гинэ ӧвӧл, семьяысь котькинэн умой кусыпъёсмы кылдӥзы. Кылсярысь, Петялэн сузэреныз Милаен. Милесьтым нылпиосмес но со туж яратэ, пичи дырысенызы соосты учкиз, утиз. Таняен но тани куспамы кык кенъёс кадь гинэ ӧвӧл, апаен сузэръёс выллем улӥськомы.

Мукетыз Таня но таӵе ик кылъёс вераз.

— Семьямы, зэмзэ но, эшлыко, син медаз усьы. Та понна нырысь ик тау шуыны кулэ анайзымылы. Солэн тыршеменыз шулдыр улӥськомы. Туннэ нуналэ пудо но вордӥськомы, 3 скалмы, 2 кунянмы вань. Мон Ципьяын магазинын вузкарисько, Юра кузпалы шабашкаын ветлэ, Юлия нылмы будэ, — шуэ покчи кен.

Трофимовъёслэн семья куспазы гинэ ӧвӧл, гуртоосынызы но кусыпъёссы умой. Пор-Кутешын Гуртлэн нуналыз, тол шулдыръяськонъёс выллем кыӵе ке ужрад ортчытоно луизы ке, со Трофимовъёслэн юрттэтсытэк уг ортчы.

— Мыло-кыдо улыны тыршиськомы. Ужаны но кулэ, шулдыръяськыны но. Улон адямилы огпол гинэ сётӥське. Туэ тани Вуж Выль арын пӧртмаськыса потӥмы. Куспамы керетыса, ог-огмес валатэк ке улысалмы, сыӵе шулдыр но огъя улыны ӧй быгатысалмы. Нылпиосызлэн шудо луэмзы котькуд анай понна улонын самой валтӥсез луэ, — шуэ Нина апай. — Нош анай-атайзэс яратыса, гажаса, вӧзазы ке луизы, солэсь но бадӟым шумпотон ӧвӧл. Та ласянь мон асме шудо кышномурт, шудо анай но шудо песяй шуыны быгатӥсько. Котьку туннэ нуналэ кадь ик тупаса, ӵошен улыны мед быгатомы.

Пётрлэн но Танялэн выль юрт пуктон малпанзы вань, но со юртсэс соослэн али улоно юртсы доры пуктэмзы потэ, семьязы но анайзы вӧзын луон понна. Соос озьы дышемын — котьку котьмае валче ужаны, валче тыршыны, валче улыны.