Афганистан — секыт но вунонтэм сюресъёс

Асьме государстволэн историяз вань одӥг дата — 25 декабрь 1979 ар, календарьын со нокызьы но пусъемын ӧвӧл, телеканалъёсын но та нунал сярысь одӥг кыл но ӧз поттэ. Ӵапак быдэс дунне Выль ар пумитаны дасяськыку, 25 декабре 1979 арын срочной служба нуись советской солдатъёсыз Афганистанэ пырто, соослы соку 18-20 арес гинэ луэ, мар адӟонъёс но уг кылдо егит пиослы ят музъемын. Дасесь-а вал соос соку ожмаськыны? Та нуналысен трос семьяосын куректонъёс но сюлэмшугъяськонъёс кутско. Ожмаськон туж кема кыстӥське, 1979 арысен 1989 арозь. Отчы пырисько 640 сюрс военнослужащейёс.

Афганистан интыяськемын Азилэн юго-западаз, лымшор паласен граничить каре Пакистанэн, шундыпуксёнысен — Иранэн, шундыӝужанысен — Китаен, уйпаласен — Советской Союзэн (Таджикистан, Узбекистан, Туркменистан).

1978 арын Афганистанын лэчыт политической югдур кылдэ, отын огыр-бугыр улон кутске. Афганской лидеръёс трос пол вазисько Советской кивалтэтлы военной юрттэт курыса. Вылӥ совето кивалтэт (Л.И. Брежнев, Д.Ф. Устинов) Афганистанысь югдурлы дунъет сёто, 12 декабре КПСС-лэн ЦК-эзлы Политбюроез, 40-тӥ армиез Афганистанэ пыртыны секыт решение кутэ. 25 декабре 1979 арын советской войскоез (ограниченный контингент) Афганистанэ пыртон кутске Термезысен, Кабулэ но Кундузэ аслаз ходэныз, нош воздушно-десантной дивизия военно-транспортной авиациен Кабул но Баграм аэродроме. Ожмаськонэ быро ог 15 сюрс солдатъёс но офицеръёс, уноез инвалид луэ, пленэ шеде, уноезлэн али дыре улон сюресэз тодмо ӧвӧл, ивортэм ышо, нош кӧняез кулэмын ни, улонысь кошкемын бертэмзы бере. Асьме солдатъёсыз быронэ вуттӥзы Афганистан калык пӧлын вӧлмем палась висёнъёс но: тиф, холера, пӧртэм формаен гепатит.

«Афган ожысь событиос али кема малпаськытозы военнойёсты, историк тодосчиосты, политикъёсты, огъя граждан обществоез» — Россия Федерацилэн Президентэз В.В. Путин. (Государственной Кремль дворецын Совет войскоослэсь ограниченной контингентсэ Афганистанысь поттонлы 15 ар тырмонлы, интернационалист ожгарчиосты буре ваёнлы сӥзем сӥё-дано собраниын выступлениысьтыз).

Ожмаськон — со котьку но трагедия, куректон, вӧсь луон, сюлэмшугъяськон. Солдат улон но кулон вискын мынӥсь нюръяськонэ шеде. Кӧня улонэз яратӥсь егит пиослэн улонзы куспетӥ чигиське, ят музъемын ожмаськыса, кинлэн ке но пиез, агаез, выныз, яратоно адямиез. Кӧня семьялы куректон вае со. Соку, 1980-тӥ аръёсысен асьме солдатъёсыз Афганистанэ лэзьыны кутскем бере, куд-ог анай-атайёс пӧртэм амалъёсын асьсэ пиоссэс армиын служить каронлэсь мозмытыны кутскизы, яке стройбатэ лэзён понна сюлмаськизы.

Али тодматэме потэ Афганистанын служить каремъёсын, кудъёсыз мыным тодмо но матын (вождэс эн вае, кинэ ӧй гожты).

Тарасов Павел — водитель, Чуртанов Валерий — стрелок-наводчик, Раков Николай — радиотелефонист, Романов Николай — механик-водитель, Петров Сергей — водитель, Андреев Вячеслав — отделенилэн командирез, Макаров Сергей — механик-водитель — соослы 19 арес луэ соку. Гаврилов Владимир — автомобильной рота отделенилэн командирез, Щербаков Сергей — механик-водитель, Кондратьев Владимир — водитель — соослы 20 арес луэ. Гришкин Анатолийлы — специалистъёслэн отделенизылэн командирез — 21 арес, нош Петров Геннадийлы  (гусеничной тягачлэн механик-водителез), Григорьев Юрийлы  (старшой механик-водитель), Камашев Михаиллы  (наводчик), Егоров Владимирлы ( механик-водитель) - 18 арес гинэ луэ соку.

Афганистан пумита асьме солдатъёсыз ымнырез сутӥсь пӧсь но яркыт шундыен. Изо гурезьёс, кишлакъёс, пустыня — ваньмыз татын ят. Пӧсь тӧл дорын кадь уг веша, пурӟись луо синъёсазы но пельёсазы пыре. «Советской солдатъёсыз татын «шурави» (советские) шуо. Ожмаськон шорысен верамзы уг поты, соослэн верамзыя, «сюлэмзы вӧсь луэ», сюлмазы возё бырем, ыштэм, китэк-пыдтэк кылем эшъёссэс. Тужгес но секыт вал бырем эшъёссэс вордӥськем музъемазы, анай-атайзы доры келяны. «Валаськом вал, ӵуказеяз котькудмы соос интыын луыны быгатӥськом, нокинлэн сюлэмыз пулялэсь согымтэ, ворсамтэ», — шуо соос. Нуналысен нуналэ, турлы условиосын душманъёслы пумит ожмаськыны, пӧртэм боевой задачаосты быдэсъяны тупа, татын, Афганистанын, асьме солдатъёслы трос государствоосысь пӧртэм наёмникъёслы пумит ожмаськыны тупа, котьку но командирлэсь приказзэ быдэстоно. Соослэн верамзыя, бронетранспортёр йӧтыны луонтэм ӟырда, 50-60 градус пӧсь, отчы пыриськод ӟырдыт гуре кадь, кузьыт пӧсям ву синъёсыз куректытэ, сие, форма вылын гӧртэм кадь сылал куасьме. Тодыны уг луы, мар азьпалан, гурезьёс сьӧрын, засада-а, мина-а, снайпер вите-а, шальной пуля-а. «Котьку шӧдӥськом вал эшлэсь шокамзэ, пыкъетсэ, пельпумзэ. Асьме солдатъёс но офицеръёс пример басьтӥзы пӧртэм дыръёсы служить карем но Атаймузъеммес утем атайёссылэсь но песятайёссылэсь.

Ожмаськон сярысь художественной яке документальной фильм учкыкузы соослэн бамъёстӥзы синвуос васько, сюлэмзы вӧсь луэ. Кӧня сюресъёс ортчемын... Служить карон йылпумъяськем бере Атаймузъеме бертэмъёссэ вошто мукет солдатъёс, мар вите соосыз азьпалан?

Бертыкузы кунгож дорын эскерон ортчо. Пьянж шурез выжем бере Термезэ вуо, родной музъеме. Мар вал соку соослэн  мылкыдазы, лулпушказы, сюлэмазы, валэктыны уг луы — шуо соос. Ӵош служить карем эшъёсыз пазясько, анай-атайзэ шумпоттыны дырто, турлы улон сюрес быръё. Соку 1980 — 1990-тӥ аръёсы государство, правительство малпаськиз-а психологической травмаен, инвалид луыса бертэм егит солдатъёс сярысь? Афганистанын ожмаськонэ пыриськемъёс, ваньзы но шуг-секытъёс пыр потыса, кужмогес луо, валазы сое: юрттоз ас кужымед, ачид кадь ик ож пыр потэм эшед.

Ортчо аръёс, пурысьтам йырсиоссы ватсасько, уг вунэто соос «афган» сюресъёссэс, али но вӧтазы вуо ожмаськем интыосазы, перевалъёсы, адӟо бырем эшъёссылэсь тусбуйёссэс). Афганистанысь асьме войскоосты поттэм дырысен 30 ар ортчиз. Отечество азьын ас воинской ужпумзэс быдэстэм солдатъёс сӥлы каремын луыны кулэ. Буре ваёно ваньзэсты: быремзэ но, ивортэм ышемъёссэ но, улэпъёссэ но. Ивортэм ышемъёс, кытын соос? Улэпесь-а, быремын ке, ватэмын-а? Кӧня синвуос кисьтэмын? Кызьы анай-атайлэн сюлэмыз чида ас вордэм пизылэсь Афганистанысь бертэмзэ гумыр витьыны, оскыса, оло, улэп кылем, дыр, одно ик бертоз, сюлмысен ӟыгыртоз, чупалоз.

Чуръёс тодам лыкто.

Азьло но, туннэ но асьме армия кужмо но оскымон, вордскем музъемез возьманы котьку дась. Асьме солдатъёслы, офицеръёслы вань, кинлэсь адӟем карыны. Арлы быдэ Вормон нуналэ синмаськыса, бадӟым мылкыдын военной Парадэз учкисько, оскисько, асьме границаез али служить карись солдатъёс военнослужащейёс но офицеръёс юн возьмало шуыса. Асьмелэн улонамы медаз луэ вал ни ожмаськонъёс, котьку но сӧл-тазаен доразы мед бертозы солдатъёс.

Екатерина Ракова

Вукогурт

Мне не надо обелиска славы,

Нет, не слава увенчает путь,

Мне бы на заплаканную маму

Хоть ещё в последний раз взглянуть.

Алексей Соболев.

Звёзды над Кабулом неживые,

Кто-то зажигает их в ночи.

Были вы такие молодые...

Вспомним ваши лица, помолчим.

Галина Шерстова