Антонида Перемечева:«Ӵошен луыку гинэ, малпасько, та выллем ужрадъёсты шулдыр радъяны но ортчытыны луэ» (фото)

Вукогуртын мыло-кыдо калык улэ шуыса тодӥськомы — соос нокыӵе ужрадлэсь но палэнэ уг кылё, гуртазы егитъёс пӧлын но, арлыдоос пӧлын но активистъёссы трос угось. Соин таяз учыре но праздник ужрадэ адямизы трос люкаськем, мукет гуртъёсысь но, кылсярысь, Ципьяысь но Сизнерысь, лыктэм кунооссы луиллям.

— Куазь кезьыт вал ке но, адямиос шӧдскымон трос люкаськизы, шумпотымон. Пичиос но бадӟымъёс, егитъёс но мӧйыос — арлыдзы шоры учкытэк, ваньзы сюлмысь шулдыръяськизы шуыса малпасько. Ужрадэз радъян понна магазинэ банка понӥмы но, калык отчы коньдон люказ. Куинь сюрслэсь тросгес уксёмы люкаськиз, — шуиз Вукогуртысь клублэн заведующиез Антонида Перемечева, ужрад сярысь юалляськыкумы.

Сӥлен ческыт чабей ӝук, пӧсь чай, табань (Любовь Фёдорова дораз пыжыса ваем), кӧня ке мукет сиёнъёс — ваньмыз та ӝӧк вылазы вань вал, соин сютэм нокин но кыльымтэ.

Арлыдоос понна «весёлые старты» шудон ортчытӥллям, со шудонэн ик воргоронъёс но шудӥллям, нылкышноос нош футбол шудӥллям. Канатэн кыстаськонын но кужымзэс эскериллям вукогуртъёс (нылкышноос но воргоронъёс нимаз).

— Огъя вераса, ужрадмы шулдыр ортчиз. Круге султыса кырӟамы, музыка улсын эктӥмы, юмшамы. Нылпиос но вань вал, соос сыӵе ужрадъёсысь уг кылё, соизлы но шумпотӥськомы. Ужрадлэн пумаз ини сульдэрез ӝуатӥмы, — шуиз Антонида Перемечева. — Шумпотӥсько, гуртоосы котьку та выллем ужрадъёсты радъянэ мыло-кыдо пырисько. Ӵошен луыку гинэ, малпасько, та выллем ужрадъёсты шулдыр радъяны но ортчытыны луэ шуыса. Ваньзылы бадӟым тау!