Хезмәт

Арган шудэ – мылкыдэз шулдыртэ!

Кемалась дырысен арган адямилэн воштонтэм эшез луэм. Каньыл улонын но, ожлудын но адями соин люкиськымтэ.

Берло аръёсы, жаляса верано, арган улонысьтымы пумен ыше. Туала амалъёсын олокыӵе кырӟанэз но, олокыӵе крезьгурез но шудыны луэ угось. Оло соин но, дыр, арганлэсь азвесь куаразэ табере фольклор, лулчеберет фестивальёсын гинэ кылыны тупа. Озьы ке но арган улэ али, калык инструментэн усто шудӥсьёсмы вань на! Таӵе йылпумъянэ школаямы ортчем егит арганчиослэн фестивальзы бере вуимы…

2021 ар президентэнымы Анай кылъёслэн но калык огазеяськонлэн ареныз ялэмын вал. Ципья шоръёзо школа удмурт, бигер но пор нылпиосты огазея. Соин милемлы — вордскем кылъя дышетӥсьёслы — туэ эшшо но бадӟым ужпумъёс оскемын. Ми вӧзамы улӥсь калыкъёслэсь кылъёссэс

но лулчеберетсэс утён ӧрын уно пӧртэм но тунсыко ужрадъёс ортчытъяны кутскимы. Соослэн одӥгез — егит арганчиослэн «Шуд, арганэ!» нимо фестивальзы — мылкыдъёсын сайкыт тодэ ваёнъёсын кема возиськоз али.

Дышетскисьёс пӧлын арганэн шудӥсьёс вань шуыса тодӥськомы вал. Нош тазьы тани, школа масштабен бадӟым ужрад ортчытыны нырысетӥзэ басьтӥськимы. Нырысь ик классъёсысь пӧртэм инструментъёсын шудӥсьёсты эскеримы. Празднике Ципья Культура юртысь нимысьтыз куноос но ӧтемын вал.

Реклама

Ужрад егит быдэстӥсьёслэн выступлениосынызы кутскиз. Соос та нуналэз сюлмаськыса витизы, малы ке шуоно сцена вылэ нырысетӥзэ потӥзы. 4-тӥ классын дышетскись Сабиров Карим, 7-тӥ классысь Зубарев Яков кылзӥсьёслы асьсэлэсь тужгес яратоно произведениоссэс ӵектӥзы. Бадӟымгес классъёсысь уногес опытэн дышетскисьёслэн но сюлмаськонзы луэм, дыр. Удмурт, бигер, пор гуръёсты арганэн усто быдэстӥсь 9 классын дышетскись Григорьев Максим юнме гинэ: «Матын тодмо луись адямиос азьын выступать карыны эшшо но секытгес вылэм», — шуыса ӧз вера, дыр. Нош со ини Балтасьысь, Казаньысь сценаос вылэ потаса усто выступлениос лэсьтэм мурт. Улисьял гуртысь лыктыса дышетскись арганчи пиосмы сярысь нимысьтыз вераме потэ. Кирилл (11 класс) но Ярослав (6 класс) Фёдоровъёс (агаен вынъёс), Руслан Максютов (8 класс) задор пор гуръёсты шудыку, чидатэк сцена вылэ потыса эктӥсьёс но луизы. «Гуртамы туннэ нуналэ 19 арганчимы вань», — паймытӥзы соос милемыз. Озьыен, Улисьялын искусствоез яратӥсь адямиос уло. Школаын ужась пор фольклор ансамбль (кивалтӥсез пор кылъя дышетӥсь Иванова А.А.) но тае юнматэ. Асьсэос пӧртэм крезьгур инструментъёсын но шудо, кырӟало но, экто но, нош огзы но искусствоосъя школаын уг дышетско. Пиосты гинэ огазеям ансамбль кемалась ӧвӧл Казаньын ортчем фестивальын асьсэды усто возьматыса бертӥзы, кузьымъёсын пусъён ужрадэ но ӧтён басьтӥзы. Азьпалан но вормонъёс сӥзиськом соослы.

«Шуд, арганэ!» шуыса нимаськиз ке но, та ужрадын баянэн, гитараен, синтезаторен шудӥсьёсты но кылзыны луиз. Саляхутдинова Диляралэн (6 класс) синтезаторен выступлениез, Тарасов Артёмлэн (4 класс) гитараен шудыса кырӟамез праздникез эшшо но чебергес каризы.

Пумаз сцена вылэ нимысьтыз ӧтем куноос, Ципья Культура юртысь устолыкъя кивалтӥсь Михайлова Евгения но самодеятельной арганчи Ишмуратова Нурзихан, потӥзы. Арганэн профессионал уровенен шудэменызы соос егит быдэстӥсьёслы зэмос устолыкъя урок возьматӥзы. «Шудыны кутскыкумы ми но чылкак тӥ кадь вал. Зэмос арганчи луон понна бадӟым улон школа ортчоно, тыршись но ужпуме вутскись луоно. Ноку киысьтыды аргандэс эн куштэ», — сётӥзы соос ас визь-кенешъёссэс егит арганчиослы.

Праздник ортчиз, нош сое зэмзэ но праздник шуыны луэ. Дышетскисьёс вӧзазы одӥг парта сьӧрын пукись эшъёссылэн талантъёссылы синмаськизы, дышетӥсьёс дышетскисьёсынызы пумтэм данъяськизы, нош лыктэм куноос, дано воштӥсьёс будо шуыса шумпотӥзы…

«Шуд, арганэ!» шуэм ӝыт огшоры ужрад гинэ ӧй вал, со поколениослэсь герӟетъёссэс пропагандировать карись, калык сям-йылолъёсты выльдӥсь но утись, соин ӵош егитъёсты арлыдо поколенилэн примерез вылын визьнодась, калыкмылэсь, солэн крезьгуръёсызлэсь чеберзэс валэктӥсь визьнодан урок но луиз.

Ципья шоръёзо школаысь директорлэн йӧскалык ужпумъёсъя воштӥсез

Раиса Бахтиярова

Район тормышына кагылышлы иң мөһим яңалыкларыбызны Балтаси_Хезмэт телеграм каналыбызда да укыгыз.

Иң мөһим һәм кызыклы язмаларны Татмедиа Telegram-каналында укыгыз


Нравится
Поделиться:
Реклама
Комментарии (0)
Осталось символов: