Армес йылпумъяса, выльзэ пумитаськом!

Гажано, яратоно лыдӟисьёсмы! Валче асьмеос улонысь нош одӥг лёгетэз ортчимы. Котькудмы понна со аспӧртэмлыко луиз, дыр. Кин ке выль ужен эшъяськиз, кин ке выль улон ӧрзэ шедьтӥз, кин ке нырысетӥ нылпизэ вайиз, кин ке трос нылпиё анай-атай луиз, нош кин ке аслэсьтыз яратонзэ шедьтӥз…

Ваньмыз та улон! 2024-тӥ арын асьмеос 51 пол пумиським. Котькуд арня, котькуд толэзь аслаз паймымон но ушъяськымон ужрадъёсыныз паймытӥзы. Кӧня вал соос?! Лыдъяса быдтонтэм кадь. 

Ог-огмес яратыса, гажаса, валаса, вань шуныт мылкыдъёсмес матысьёсмылы кузьмаса уломе. Выль арын тӥледлы эшшо но тросгес шумпотон, быронтэм тазалык. Котьку ӵошен мед уломе, дуно лыдӟисьёсмы! Выль 2025-тӥ арен тӥледыз! Выль шудбурен!

2024 ар «Азьлане» газет понна вунонтэм луиз — газетмы 90 аръем юбилейзэ пумитаз. Та лыдпусэн герӟаськем вожвылъяськонъёс ялӥськизы, пӧртэм пумо визьсынан ужъёс печатласькизы. Калыкез тунсыкъяськытон понна пӧртэм пумо шутэтскон сэрегъёс малпамын.

Кыкетӥез саклык висъямын вал семьяослы. Быдэс Россиын 2024 ар Семьялэн арез шуыса ялэмын вал. Соин сэрен ми тӥледыз ёросысь семьяосын тодматыны тыршимы. Ӟаны гуртысь Апаковъёслэн семьязы «Эхо веков в истории семьи — Тарихта без эзлебез» элькун конкурслэн ёрос этапаз вормисе потӥз. Эшшо огпол соосты ӟечкыласьком!

Тулыспалэ Россиысь Героез — Олег Николаевич Исаевез — буре вайимы. Ужрадэз, сяме пыремъя, Ӟаны шоръёзо школаысь коллектив радъяз. Сӥё-дано люкетэз сяна, татчы пӧртэм пумо спортивной ужрадъёсты пыртыны тыршизы. Арысен аре куноос тросгес но тросгес люкасько.

Шумпотонъёсын сяна, армы шуг-секытъёсын но пачылмиз. Гожтэмъёсамы нимысьтыз ожгар операцие пыриськись батыръёсмылэн улонэнызы но тодматӥм. Бен, соос пӧлын бырем геройёсмы но луизы, соос сярысь лыдӟыса, сюлэмъёсмы чигиськизы. Котькудзэ секыт мылкыдын но синкылиосын берпуметӥ сюресазы келямы. Соин валче, кулэм батыръёсмылы мемориал пулъёсты юнматон ужъёс но радъяськизы. Будӥсь нылпиос котьку мед тодозы геройёссэс, соослэсь пример мед басьтозы вал.

Политикаен герӟаськем ужъёсмес но тодэ ваёме. Южтолэзе быдэс шаермы понна бадӟым нунал луиз — Президентэз быръён. Ёросчиосмы но татын кылкутыса ужазы.
Удмурт литература дуннеын но туэ сӥё-дано ужрадъёс трос вал: Григорий Медведевлэсь (120 ар) но Николай Никифоровлэсь (70 ар) дано лыдпусъёссэс пумитамы. Со понна южтолэзе но шуркынмонэ нимысьтыз лыдӟонъёс радъяськизы. Соослэн базаоссы Покчи Лӧзя но Ӟаны шоръёзо школаос луизы.

Котькуд газетын гурт возёсысь ужъёсын но тодматыны тыршимы. Татын пӧртэм выльдӥськонъёс, кивалтӥсьёслэн малпанъёссы шараяськизы. Гурт удысын тыршисьёслы тау шуиськом секыт быдэстоно ужзы понна, шутэтскытэк ёросмылэсь улонзэ азинтэмды понна пумтэм тау тӥледлы!

Куартолэзе пумитамы Вормон нуналэз. Та понна котькуд гуртын нимысьтыз ужрадъёс ортчизы. Соосты сайтамы но мерлыко вотэсъёсамы югдытыны тыршимы. Ӵапак соку ик Россилэн Героезлы — Олег Исаевлы — вордскем гуртаз нимысьтыз бюст пуктэмын вал.

Дышетскон удысын но трос вормонъёсмы луизы. Дышетскись пиналъёсмы ёрос, элькун, Россия масштабен ортчись вожвылъяськонъёсын, ӵошатсконъёсын шумпотымон бервылъёсы вуизы.

4 гудырикошконэ Казанской но Татарстанской митрополит Кирилл Ципья черкогуртысь Троицкой храмез вӧсяны вуиз. Православной калык понна та тужгес но югыт праздник луиз. Ёросысь оскисьёс талы туж бадӟым саклык висъязы.

Нош кӧня юбиляръёсмы вал! Задор мылкыдо арлыдоосмы шумпотыса ӟечкылан кылъёсты, куноосты пумитазы. Кема мед улоды на, муспотон песянайёс но песятайёс! Тӥляд тодон-валанъёсты будӥсьёсызлы пайдаё мед луозы.

Ум вунэтэ арысен аре пусйиськись праздникъёсмы сярысь но. Сабантуй, Гырон Быдтон, Петрол нунал — ваньмыз калык понна кельшымон праздникъёс, кудъёсыз ёросысь трос калыкез люкало но шулдырто. Ёросысь делегациосмы Элькунысь Гырон Быдтонэ но Чакарае вуизы. Капчи мылкыдэн тырмем куноос праздникъёстыкельшытыса бертӥзы.

Кыӵе гинэ вакытъёс, дыръёс ӧз вуэ шаерамы, адямиос котьку огазе улыны кулэ.