Атае — мынам осконэ, юн пыкетэ но матысь эше

Атае, Константинов Николай Валентинович, 1969-тӥ арын 16 октябре Карек-Серма гуртын огшоры колхозникъёслэн семьяязы вордскемын. Пичиысен ужаны дышемын, нокыӵе ужлэсь палэнэ кыльымтэ. Дышетсконзэ мытэ гуртысь покчиёзо школаын, нош собере сое Ӟаны но Тюнтер школаосын азьланьтэ. Школаын ик атай активист луэм. Туж яратэм спортэн вырыны: усто луэм куасэн ветлон ласянь. Али ке но солэн трос грамотаосыз утиськыса кылемын. Бадӟым классъёсын дышетскыкуз ик малпам гурт удысын ужаны, гуртын улыны, соин ик армие кошкытозяз гуртысь колхозын ужаны вутскем. Армиын кык ар ӵоже служить каре, Атаймузъеммы азьын дано ужпумзэ быдэстэ. Служить карыкуз атай сярысь газетэ но гожтӥллям. Бертэм бераз ини тракторист луыса колхозэ ужаны интыяське (соку «Бурнак» колхоз «Шушма» шуыса нимаськем). Кема ик улытэк анаеным семья кылдыто. Анае, Нина Васильевна, Сизнер гуртысь луэ. Кыкназы ик соос ужасесь, семья понна ваньзэ карыны дась луись адямиос. Анае туннэ нуналэ Ципья шоръёо школаын тырше. Атае сярысь ке верано, со гумырыз ӵоже колхозын тыршыса, ужезлы сётскыса, вань кужымзэ сётыса ужа. Огъя вераса, колхоз улонэн улэ. Нырысь атай ужам ДТ-ен, собере К-700 тракторен, али дыре солы выль трактор оскизы ни. Сомында аръёс ӵоже ужаса, атай огпол но азьмынӥсьёслэн радазы ӧз луы, тыршыса ужа ке но, бадӟым вормонъёсы вутске ке но. Ёрос газетэ но со сярысь гожъямзы ӧвӧл. Но та шоры учкытэк, атае мон понна котьку ужась но тыршись воргоронлэн зэмос примерез луэ, зэмос герой луэ шуи ке но, янгыш уз луы. Аслаз анай-атаез понна со йӧно пи луиз, анай понна — оскымон кузпал, нош мон но мынам выны понна — адӟем карымон атай. Милемыз, кык пиоссэ, пыд йыламы султытыны, тодон-валан сётыны быгатӥз, дышетскыны но юрттӥз. Туннэ нуналэ анай-атайлэн юрттэменызы, мыным оскеменызы полициын ужасько.

Атае котьмаин вырыны кибашлы. Соин тэк пукыны уг чида — ялан маин ке выре, маке но лэсьтэ. Милемыз но аслаз быгатэмезлы дышетыны тырше. Быгатэмезъя котьма ласянь юрттэ но. Атайлы пересез но, егитэз но вазисько. Гуртын но сое гажало. Техника но сое яратэ, ачиз но со сое чакласа, эскерыса гинэ возе, солэсь котькуд секретсэ тодэ.

Та гожтэме мед луоз тон понна кузьым, атай. Мед тодод: ми тонэ туж яратӥськомы но тонэн данъяськиськомы.

Мушъёсты но уте атай. Верасько ук: тэк пукыны уг яраты, уг быгаты но. Юнме гинэ ӵукналы быдэ муэн но вӧен чай уд юиськы, вылды, атай, — зэмзэ но, котькытчы вутскыны, котькуд малпам но кутскем уждэ быдэстыны кужым басьтӥськод, лэся...

Александр Константинов

Карек-Серма гурт