"Азьло ужаллям ке ужаллям..."

Редакцилэн, газетмылэн бадӟым но узыр историеныз ми, газетын ужасьёс, асьмеос но пыр-поч тодмо ӧвӧл. Лыдӟисьёсмы сярысь веранэз но ӧвӧл, дыр. А ведь макем шулдыр соос ужаллям, макем эшлыко улӥллям! Та сярысь тодон понна мон но Ольга Юрьевна Плотникова, «Азьлане» газетъя валтӥсь редакторлэн али дыре воштӥсез, одӥг нуналэ Гондыргуртэ куное кошкимы. Отын улэ уго Петров Александр Сергеевич — редакциын трос аръёс ӵоже ужам адями.

Урамысен ик дуно кунооссэ кадь пумитаз милемыз Александр Сергеевич.

«Редакциын ужаны 1961-тӥ арын кутски, армиысь бертэм бере. Соку али «Азьлане» газет нимаз редакция вал — чылкак удмурт газет, нимаз штатэн. Редактор соку Иван Семёнович Кушаев вал, секретарь — Ципьяысь Герасимова Зинапай. Валтӥсь редакторлэн воштӥсез Лельвижысь Иван Филиппович Букашев (Кушкетын дышетӥсь луыса но ужаз со). Гожтэтъёсъя отделын ужаз Борисов Николай Григорьевич, колхозъёсысь материалъёсты но со люкаса гожъяз, редакторлэн воштӥсез луыса но ужаз берлогес. Озьы ик Иван Петрович Петров ужаз, Сырьяысь пи. Со вылын вал сельхозматериалъёс. Литсотрудницамы Евгения Плотникова вал, со но ачиз материалъёсты гожъяз. Сыӵе но умой коллективен ужаны тупаз мыным. Огезлэсь огез визьмо, огезлэсь огез йӧно», — веранзэ кутскиз Александр Сергеевич.

— Сомында ужасьёс луиллям вылэм иське соку редакциын...паймоно кадь. Удмурт гуртъёс тросэз Балтась дорысь кыдёке интыяськемын ук, кызьы гожъяськисьёс со гуртъёсы ветлылӥзы? — юасько мон.

— Валэн ветлӥзы. Соку ведь транспорт туннэ кадь ӧй вал. Кык редакцилы кык вал вань вал — котькудӥзлэн аслаз валэз. Соосты одӥг конюх утиз. Типография но нимаз вал, солэн но аслаз директорез луиз.  

Кыӵе шуг-секытъёс ӧз луэ ке но, ми туж шулдыр но эшлыко ужамы.

— Тӥ бен редакцие кызьы вуиды? – тунскъяськиськом.

— Армиысь бертэм бере, монэ Николай Григорьевич Борисов (гуртоез, кема аръёс ӵоже «Азьлане» газетэн кивалтэм — Н. Ж.) ужаны ӧтиз. Милемлы, пе, редакцие ужаны мурт кулэ. Нош мон ведь чылкак та ужез уг тодӥськы вал. Кыкетӥ корректоре басьтӥзы, материалъёсты лыдӟыны. Корректор луыса соку Кутэшысь Мария Самсонова ужа вал. Нош ини Балтась районэз Арча районэн огазеям бере, газет Арчаын потыны кутскиз, газетъёс «Коммунизмга», «Коммунизме» нимаськизы). Зэмзэ ке верано, районъёс огазеяськем бере удмурт редакциез нырысь воксё быдтӥллям вал. Но Кукмор палъёсысь удмуртъёс курыса (Кукмор ёрос но Арча районэ пыртэмын вал. Соин «Коммунизмга» газет соос дорын но вӧлмиз), восстановить кароно луизы удмурт газетэз. Собере нош ик отын ужан понна сотрудникъёсты люказы.

— Нош Арчаын удмурт газет потыны кутскем бере, азьвыл коллектив отчы выжиз-а?

— Ӧз. Кылсярысь, мыным Арскын инты ӧз луы. Соин аслым мукет уж утчаны кутски. Николай Иванович Иванов (соку со Вуж Кушкет школаын директор луыса ужаз) монэ уже басьтӥсько шуиз. Вити, вити но мон, август вуэм бере «школаед быдмоно, дышетӥсь эн люка» шуиллям Николай Ивановичлы, РОНО-е мыныса утьы, пе. Отчы мыныса вераськи но, монэ Турьяе лэзизы. Отын Исьмекова шуэм дышетӥсь интые куинь толэзь ужай (со декретын вал). Отын уже йылпумъяськем бере нош ик РОНО-е мынӥ. Лэзизы монэ табере Тюнтере начальной классэз ӟуч кыллы дышетыны. Со арын ик, 1963-тӥ арын, Иван Семёнович Кушаев, газетын ужзэ куштыса колхозаз бертӥз, газетын ужзэ куштыса. Борисовез кельтӥзы со интые замредактора карыса. «Срочно мыным мурт кулэ» пе, монэ отпуске но ӧз лэзьы, отчы ужаны мынӥ. «ӜЂоггес ужаны дышетскы, мон отпуске потыны малпасько» пе. Ма, кытчы пырод? Дышетски. Одӥг толэзь перевод карыны дышетски но собере Николай Григорьевич кошкиз, мон со интые кыли. Мазэ веранэз, ми котьку сямен ужамы бадӟым но эшлыко коллективен. Мон, Борисов, корректор Евгения Плотникова, Ѓаныысь Николаева Катя корректор вал. Типографиын но удмуртъёс ужазы. Кылсярысь, Мария Лобанова Вукогуртысь. Вера Лобанова но ужаз типографиын, али со «Ӟечбур» газетын тырше ни. Вунэтӥсько ни, ваньзэсыз тодэ вайыны уг луы, но ми, сомында аръёс ӵоже, зэмзэ но, трос кузя ужамы, — веранзэ азьланьтэ Александр Сергеевич. — 1965-тӥ арозь отын (Арчаын — ред.) ужамы. Ветлыны сюрес ӧвӧл, машинаос но толалтэ ӧвӧл, буран луиз ке, ма карыны ёрмиськом ни. Бертыны куддыръя уйбыт тупалляз машина кыскаса — куазез тодыны уг луы ук. Таӵе учыр но луэм вал. Оград Балтасьысен машинаез гурезе донгаса, гозыосын кыскаса мыныны тупаз Арчае, уйшор дыръя гинэ мыныса вуимы. Уйин ужамы ни собере — газетэз ведь поттыны кулэ (серекъя).

— Асьмеос али ӝожтӥськиськом, — шуэ мон шоры учкыса Ольга Юрьевна. — Азьло ужаллям ке ужаллям тӥни...

Александр Сергеевич нош веранзэ азьланьтэ: «1965-тӥ арын районэз нош ик берен татчы, Балтасе берыктӥзы, собере, калыкмылы удмурт газет кулэ шуыса, май толэзе нош ик татчы бертӥмы. Соку редактор луыса татчы Арчаысен Хузин лыктӥз, со ваньзэ татын радъяз — редакцилэсь азьло луэм зданизэ ик басьтӥзы, асьмеос ик лэсьтӥськон ужъёс борды но басьтӥськимы. Одӥг палась люкетэз удмуртъёслы сётӥськиз, мукет палыз — бигеръёслы. Татчы выжеммы бере троссэ редакциысь коллективлы аслыз ужаны но тупаз. Кирпич, из нуллӥмы, асьмеос ик сюримы. Тӥни озьы...»

— Озьыен, тӥ троссэ берыктӥсь луыса ужады? — юа Ольга Юрьевна.

— Балтасе бертэм бере мон переводчик луи ни, корректор гинэ ӧвӧл. Первой ужаны кутскем арын ответсекретарь Зинапай мыным клише берыктыны сётӥз. Мон машинистка доры пукси но диктовать карисько. «Эй, сое нырысь кагазэ гожъяса переводить кароно ук. Кызьы кариськод, кызьы быгатӥськод тон озьы», — шуылозы вал (серекъя).  

— Галяпай (Галина Константиновна Васильева — Н. Ж.) вералляз, Сандырагай туж усто переводчик вал шуыса, — шуэ Ольга Юрьевна но серекъяса. — Кагазэ гожъяса уд пукиськедэ, пе, вал, сразу берыктӥськоды вылэм.

— Бен. Татчы бертэм бере машинисткаен ужаз Ушмаысь Волкова Мария. Текстэз берыктыса лыдӟыкум «Постой, погоди» гинэ шуэ вал со мыным. (серекъя). Собере лыктӥз Ушмаысь ик Люба Сарманаева. Мон диктовать карыку соослы нарош кужмо-кужмо верасько вал. Озьы дышетӥ соосты текстъёсты ӝог бичаны. А тани али тӥляд редакциын машинисткаосты но ӧвӧл. Компьютер улон ни шол табере...

Тӥни озьы 23 ар ужай редакциын переводчик луыса. Диктовать гинэ карисько вал, гожъяса пукеме ӧз поты.

— Тӥ бен Кунаев Александр Михайловичен ужаса вуиды-а? — юа Ольга Юрьевна.

— Александр Михайлович мон бере лыктӥз ини ужаны. Сое уже басьтэмзы бере ини мон верай солы, одӥг толэзь дышетӥсько но собере ачид ужалод шуыса. Дышетӥ но ачим кошки ни собере. Пенсиын ӧй вал али мон соку, Покчи Лӧзяысь лесничествое ужаны интыяськи. Отысен ини пенсие потӥ, 1998-тӥ арын.

— Туала газетмы сярысь но мар ке вералэ вал, Александр Сергеевич, — шуисько. — Гожтӥськиськоды-а, кельше-а? Оло, кыӵе ке кенешъёсты-ӵектонъёсты вань, дыр?

 — Конечно, газетлы али но гожтӥськисько, туж кельше гожъямъёсты, молодцы. Азьло тани программа потэ вал газетын, сое ас дыраз мон верай кулэ ӧвӧл шуыса, лучше удмурт материалъёс мед потозы со интые шуи. Озьы ведь трослы умойгес. Туннэ нуналэ потӥсь газет та кылъёсты юнматэ, — ответ сётэ Сандырагай.

— Нош гожтӥськон ласянь мар верасалды? Азьло но сыӵе шуг-секытъёс кылдо вал-а, яке адямиос газетэз тросгес басьязы-а тӥ ужан вакытэ?

— Гожтӥськон но тираж — со котьку газетлэн бадӟым проблемаез вал, дыр. Азьло но ветлӥмы гуртъёс кузя адямиосын вераськыса, агитировать карыса, почтальонъёсын вераськыса, гожтӥськытыса. «Азьланелэсь» сюрсозь вуэмзэ уг тодӥськы. Быръёнъёс дыръя туж умой вал — удмурт бюллетеньёс потто вал, удмурт кандидатъёслэсь биографиооссэс удмурт кылын поттӥмы, заказ сёто вал Казаньысь избиркомысь. Быдэс республикаын озьыен асьме дорын потэм бюллетеньёсын кулэяськизы удмуртъёс, — вера Александр Сергеевич. 

Ми Ольга Юрьевнаен кема пукимы Александр Сергеевичен вераськыса, газетмы сярысь, татын ужасьёс сярысь туж тунсыко историос тодӥмы, асьмелы троссэ выльзэ басьтӥмы. «Азьлане» газетын, туннэ нуналэ кадь ик, азьло но луиллям гожъясьёс, но удмурт кылын гожъясьёс котьку ӧжыт луиллям.

Небыт но каньыл вераськись воргоронлэн бамъёсаз ини трос кисыриос кылдэмын — адске: троссэ со та улонын адӟем. Тани кӧня ке нуналскын, 27 августэ, Александр Сергеевич 80 арессэ но тырмытоз. Улонэз юнме ортчымтэ пиосмуртлэн — валче ужасьёсыз сое котьку гажаллям но гажало, семьяез яратэм но яратэ. Кузпалэныз Елена Семёновнаен соос вить нылпи будэтӥллям —  Борисэз, Маргаритаез, Нинаез, Светланаез, Владиславез. Туннэ нуналэ соослэн ини 11 внуксы, яратоно правнукъёссы но вань ини. «Нылпиосмы, внукъёсмы но правнукъёсмы — быдӟым шумпотонмы, — шуо кузпалъёс.