Азьмуртэз бырйизы, толэз келязы

Покчи Лӧзя черкогуртын 17-тӥ южтолэзе Россилэн Азьмуртэз (Президентэз) понна куаразэс сётыны лыктэм адямиос толэз келян-тулысэз пумитан празднике но пыриськизы.

Вӧй праздникез калык чидатэк вите, ческыт сиёнъёс дася, кин мильым, кин табань пыже, ог-огзы доры куное ветло, сьӧлыкъёссэс куштыны куро (Простить карон нунал ӵапак Вӧйдырлэн берпуметӥ нуналэзлы тупа угось) но черк календарьысь тужгес валтӥсь кӧсутёнлы — Быдӟым визьлы — дасясько. Туэ та нуналэ эшшо шаермы понна кулэ луись бадӟым ужрад но ортчиз: Россилэсь Азьмуртсэ быръёнлэн куинетӥ нуналэз тупаз. 

Покчи Лӧзяын Вӧй арнялэн берпуметӥ нуналаз котькуд аре шулдыръяськон ортче — та вошъяськисьтэм сям. Озьы 17-тӥ южтолэзе Россилэн Азьмуртэз понна куаразэс сётыны лыктэм адямиослы но толэз келян-тулысэз пумитан празднике пыриськыны шуд усиз.

— Калык трос люкаськиз, бускель гуртъёсысь но палэнысь гуртъёсысь но куноос вал. Празднике озьы ик вуылӥзы Балтась ёрослэн тӧроез Рамиль Нутфуллин но Татарстан Республикаысь Кун Кенешлэн депутатэз Камиль Нугаев, ёросысь исполнительной комитетлэн кивалтӥсезлэн воштӥсез Ильгам Гайнутдинов, социальной дурбасьтонъя ёзэтлэн кивалтӥсез Алсу Гатиятуллина но интыысь кивалтӥсьёс. Соосты но шулдыртыны быгатӥмы, шудытӥмы, мылкыдзэс ӝутӥмы, — ивортэ Покчи Лӧзя гуртысь лулчеберетъя юртысь устолыкъя кивалтӥсь Галина Петрова. 

Ужрадлэн туж шулдыр ортчемез сярысь веразы лыктэм куноос но. Интыысь лулчеберет удысын ужасьёслэн тыршеменызы радъямын но ортчытэмын вал пӧртэм тунсыко вожвылъяськонъёс но шудонъёс. Котьку сямен люкаськем калыклэсь мылкыдзэ ӝутӥзы шулдыр крезьгурен, куноязы ческыт табанен но пӧсь чаен. Вожвылъяськонъёсы пыриськем адямиос ваньзы кузьымъёсын пусйиськизы. Валамон, та ваньмыз коньдонэз кулэ каре. Сыӵе дыръя спонсоръёстэк уг луы, соослэн юрттэмзылы луыса праздник шулдыр ортче. Таяз радэ но покчи лӧзяослы шулдыр праздник ортчытыны «Сурнай» общество, нимаз ик кивалтӥсез Тауфик Газизович Гилязов, «Талисман» но «Фармат» магазинъёс юрттӥзы. Озьы ик нимаз ужбергатӥсь Плотников Сергей Геннадиевич но люкет пыртӥз. 

Бератаз шудо, тынӥсь но тупаса улон сӥзьыса, удалтэм урожай курыса, Вӧйдырлэсь валтӥсь тодметсэ — куро мунёез — ӝуатӥзы. Огъя вераса, та нуналэ Покчи Лӧзя культура юрт дорын ортчем шулдыръяськонын котькин мылысь-кыдысь шутэтскыны быгатӥз.