«Бадӟым каремды понна тау»

Сала Кушкет гуртысь юбиляр куноосты сыӵе кылъёсын пумитаз

1-тӥ тулыспалэ 90 аресъем юбилейзэ пусйиз Сала Кушкет гуртын улӥсь Демьянова Мария Алексеевна. Юбиляр вордскем нуналзэ самой матысь адямиосыныз артэ, югыт но шуныт юртын пумитаз. Тужгес песянай шумпотӥз, нылпиосыз та нуналэ доразы люкаськизы, сое уг вунэто, ярато но гажало шуыса.

Ёрос кивалтэтысь представительёс — Балтась ёрослэн главаезлэн воштӥсез Наиль Сабирзянов, социальной дурбасьтонъя ёзэтлэн кивалтӥсез Алсу Гатиятуллина, интыысь кивалтэт — Шор Кушкет гурт поселенилэн главаез Юрий Перфилов, «Дуслык» обществоысь представитель Сергей Чириков, юбилярез вордскем нуналэныз ӟечкыласа, Россиысь Президентлэсь ӟечкылан открытказэ, Балтась ёрос главалэсь Таукарон гожтэтсэ, сяська керттэт но кузьымъёс сётӥзы.

— Мария Алексеевна, Тӥ кадь мӧйы улосчиосынымы ми туж данъяськиськомы. Ас дыраз ёросмы, гурт удысмы понна Тӥ туж трос тыршиды. Кема аръёс ӵоже таза луыса, матысьёсты вӧзын каньыл улыны мед кылдоз али Тӥледлы. 95 аресъем юбилеяды но пумиськыны мед кылдоз, — шуизы куноос.  

Мария Алексеевна — пичи дырысен ужаса будыны дышем поколениысь адями. Жугиськон дырозь но, жугиськон дыръя но, жугиськон бере но солы капчи йӧтымтэ. Тани мар мадиз милемлы песянай:

— Секыт вал милям пичи дыръёсмы, егит дыръёсмы но. Ож дыръя луэм секытэз сярысь веранэз ик ӧвӧл, вань секыт уж нылпиос но нылкышноос вылэ кылиз. Кӧня нылкышноос, кузпалъёссэс жугиськонын ыштыса, ас кужыменызы нылпиоссэс пыд йылазы султытӥзы... Пӧртэм секыт ужъёсты адӟыны тупаз, валэн но трос ужай. Пичи дырысен ик сюрлоен кӧжы арамы. Поттурынэз пызь карыса, нянь пыжимы. Мынам одӥг сузэры но одӥг выны вань вал, ми куинь нылпиос луимы. Гур эстыны кулэ луэмысь, сузэреным пашпулы нюлэскы ветлӥмы… Песяе вань вал, анае. Ми ӵош улӥмы, жугиськонозь но, собере но. Анай-атае колхозын ужазы. Анаелэн нимыз Анна Васильевна вал. Солы туж секыт йӧтӥз ини. Атай, гуртысь тросэз воргоронъёс кадь, оже кошкиз. Но солы, сӧсырмыса ке но, бертыны шуд усиз. Нялтас вераса, песяйлэн ньыль пиосыз но жугиськонысь улэпен бертыны быгатӥзы. Миколагай сӧл-таза бертӥз, Васягай (песяйлэн нырысетӥ пиез), атай кадь, кунулбодыен бертӥз, сӧсырмемез вань вал. Атай, Алексей, жугиськонын санитар луыса ветлэм. Мыным военной сумка вайиз, мон сизьыметӥ классын соин дышетски. Пельпуме гинэ пононо вал сое.

Сизьыметӥ классэ йылпумъямез бере егит Мария, нокытчы дышетскыны пырытэк, колхозэ ужаны интыяське. Пенсие потытозяз но, 1987-тӥ арозь, колхозын тырше. Пал кыл но вазисьтэм, оскем ужез дыраз быдэстӥсь, тыршись кышномуртэз кадь тодӥллям Мария апаез ужан интыяз. Дораз но со йӧно кузпал (жаляса вераны кулэ, кузпалэз Николай Иванович Демьянов 1991-тӥ арын висьыса кулэм), адӟем карымон анай луэм. Куать нылпиоссэ будэтэ, пыд йылазы султытэ (соос пӧлысь но ваньзы улэп ӧвӧл ини). Нылпиосыз семьяосынызы уло, но анайзэс уг вунэто — куное бертылыса, тазалыкеныз, улэм-вылэменыз тунсыкъяськыса уло. Нылпиосыз пумтэм тау каро анайзылы соосты пыд йылазы султытэмез, тодон-валан, визьнод сётэмез понна.