Хезмәт

Балтач районы

18+
2024 - Гаилә елы
Азьлане

Бускельёс пумиськизы

Берло дыре удмурт фестивальёсы, конкурсъёсы ӵемгес ветлыны тупаз. Валамон, сыӵе ужрадъёс нокызьы но мылкыдтэм кельтыны уг быгато.

Таиз веранэ Киров улосвылысь Вятской Поляна карын ортчем «Бускельёсын пусмиськон» шуыса нимаськем II-тӥез улосвылкуспо фестиваль сярысь.

Полянаысь «Чипчирган» ансамбль «Победа» культура юртын кырӟаса, бадӟым куноосты сямен пумитаз ас бускельёссэ — Татарстанысь, Марий Элысь но Удмурт шаерысь творческой коллективъёсты. Шумпотымон, соос пӧлын вал асьме ёросысь «Зангари» ансамбль но.

Туж шуныт пумитазы учкисьёс котькуд коллективез. Но тужгес но кужмо кичабонъёс кузьмазы Удмуртиысь «Брангурт песянайёслы» но «Брангурт кенакъёслы» (егитгес коллективзэс озьы нималлям — О.П.). Чебер кырӟанъёсынызы сяна, песянайёс но кенакъёс люкаськем калыкез асьсэ киынызы вурем дӥсьёсынызы но паймытӥзы. Синмаськытӥзы асьсэ выступлениосынызы Удмуртиысь Пичи Пурга ёросысь «Арганчи» ансамбль, Марий Элысь Ӟаны Починка гуртысь ваньмылы тодмо но матын луись «Ӟардон» ансамбль. «Арганчи» шуэмысь тросэзлэн син азяз йӧно удмурт воргоронъёс пуксизы, луоз. Но таяз учыре со озьы ӧвӧл. «Арганчиос» ансамбльысь мызганчиос ваньзы нылкышноос. Пӧлазы вань кызьы ке арлыдоосызгес, озьы ик егит нылмуртъёс но. Озьы ик егитъёслэн трос луэменызы висъяське «Ӟардон» ансамбль но. Та туж шумпотымон. Ижкарысь «Ӟаныкай», Кукмор ёросысь «Сактон», Балтасьысь «Зангари» ансамбльёслэн выступлениоссы, нимысьтыз та фестивале Москваысь вуэм Ирина Денисовалэн аслаз гожтэм кырӟанъёсыз но кужмо кичабконъёсын согиськизы. Учкисьёслэсь мылкыдзэс эшшо но пуромытыса, таяз радэ но, Ижкаре ветлыкузы кадь ик, «Зангари» ансамбльысь мызганчиос шулдыр юмшан гуръёсты быдэстӥзы, калыкез эктытӥзы.

Зэм но, кызьы таӵе ужрад мылкыдтэм кельтыны быгатоз. Мылкыдъёс пачылмемын. Нырысь ик со таукарон, собере паймон но синмаськон мылкыд: бадӟым городын (котьма шуид ке но, Вятской Поляна пичи город ӧвӧл), мукет калыкъёс пӧлын удмурт кылэз но удмурт лулчеберетэз, удмуртлыкез утьыны но азинтыны быгато! Тунсыко потӥз тодыны, маин улэ, маин шока Вятской Полянаысь удмурт калык. Та сярысь «Чипчирган» удмурт ансамбльлэн кивалтӥсеныз Надежда Моисеевна Исаеваен вераським. Тани ма со вераз: «Мон ачим Кукмор ёросысь, Вылын Кузмес гуртысь. Вятской Полянае1986-тӥ арын лыктӥм. 5 ар ужай садикын воспитательница луыса, собере 20 ар тырши госстрахын агент луыса. Соин но, весь калыкен ужам бере, монэ трос адямиос тодо.

И вот 2000 арлэн кутсконаз, Нырьялан Гырон быдтон ортчем бере, малпай городамы ансамбль кылдытыны, ас тодмоосыным вераським но 6 кузя кырӟаны ветлыны кутским. 2013-тӥ арозь мон та ужме госстрах уженым валче нуи. 2013-тӥ арлэн пумаз сётӥзы быдэс ставка. Тӥни со дырысен кутским арезлы кык пол ужрадъёс ортчытъяны. 2014-тӥ ар городамы ялэмын вал удмуртъёслэн арзы шуыса. И котькуд 4 арскын городамы сыӵе ар ялыны малпамы. Озьыен, 2018-тӥ ар но милям вал. 2014-тӥ арын ми доры вуылӥзы Бурановской песяйёс, соку клубмы пичи вал на, 300 интылы гинэ, соин сэрен соос 2 концерт интые 3 концерт возьматӥзы. Соосын туж юн эшъяським. Собере ортчытӥмы Ватка удмуртъёслэсь 2-тӥзэ улосвылкуспо «Зарни бугор» фестивальзэс, люкамы 8-9 коллектив, Татарстанысь, Марий Элысь, Удмуртиысь, Киров улосысь. Сӥзьыл ужъёс бырем бере городамы улӥсьёсын гинэ нырысьсэ ортчытӥмы вал Аран быдтон праздник. Калыклы туж кельшиз, куд-огъёсыз лыктӥллям вал удмурт костюмъёссэс дӥсяса. Мылысь-кыдысь шулдыръяським. Калыклы кельше бере, малпамы сое котькуд ар ортчытыны но куноос ӧтчаны. Тани 6-тӥ арзэ ортчытӥськом ке, 3 ар со улосвылкуспо фестиваль луыса ортчиз ини. Учкисьёсмы 2014-тӥ арысен ик милемыз туж яратӥзы кадь потэ мыным. Со дырозь но ми, 2006-тӥ арысен кутскыса, котькуд ар возьматӥськом вал концерт, котьку но выль программаен. Одӥг пол сыӵе концертмы бере одӥг ӟуч апай потӥз но шуэ: мон, пе, кӧня ке улӥ Удмуртиын и мыным удмуртъёс туж кельшо. Ӧй ке но вала удмурт кылэз, туж, пе, кельшиз концертты. Тодмоосы трос бере, мон тодӥсько, ми доры ветло бигеръёс но, ӟучъёс но, поръёс но. Соин табере концертъёсмес тыршиськом ни ӟуч кылын но нуыны. …жыт ке но валад ке ма сярысь вераськемез, шулдыргес луэ ведь со.

Городамы удмуртъёс трос уло ке но, пиналъёссэс уг дышето ас кылзылы,   мон доры пиналъёссы ветло но дышеты, пе, Надяпай, а озьы гинэ ма дышетскозы ини соос, дорын ӧд ке вераськы. Со понна сюлэмы туж вӧсь луэ!!!

Татчы, «Победа» Культура Двореце ужаны лыктэм берамы кык-куинь ӟуч ужасьёс воксё уг ярато вал милемыз. А таяз октябре Аран быдтонмес ортчытыкумы, одӥгез лыктӥз но шуиз: «Моисеевна, честно признаюсь: я не любила другие нации, но я сейчас в шоке, как вы любите и уважаете друг друга, теперь вы нам так нравитесь!!!» Тӥни сыӵе кылъёс бере мон малпасько тыршеммы буш ӧвӧл шуыса, чурытомем сюлэмъёсыз небӟытыны юрттэмезлы Инмарлы туж бадӟым тау шуисько. Директормылы но, Векшина Ирина Владимировналы, нунал потэм вӧсяськиськом ужаны тазалыкез мед луоз шуыса. Со котьку но кылзӥське, юрттэ. Ансамблям нылъёсы но, воргоронмы но туж умоесь, тыршисесь, малпанъёсме верасько ке, сӥлы каро. Кылем арын удмурт культуралэн ареныз валче трос ужамы бере, малпаськом вал ини ял карыны. А кин тодэ, ар куспатыса, адями милемыз, оло, воксё вунэтоз, «ойдо ум дугдэ» шуыса кутским ини ужаны. Мон туж оскисько Инмарлы. Анае шуэ вал Инмартэк номыр но карыны уг луы. Мон малпасько, туж шонер верам. Таиз пумиськонмы но Инмарлэн юрттэмезъя ортчиз, артистъёсмы но туж быгатӥсесь, чебересь, визьмоесь вал, учкисьёсмы но капчи мылкыдоесь, киоссэ жалятэк чабизы. Ваньзылы туж кельшем!!! Уж дорысьёс но туж ушъязы!!! Тау ваньдылы!!! Нош пумиськоно мед луоз!!!»

Зэм, озьы медло! Пумиськыны мед кылдоз!

Следите за самым важным и интересным в Telegram-каналеТатмедиа

 

Без социаль челтәрләрдә:  ВКонтакте, ВКонтакте, ТикТок, Ютуб, Одноклассники, Телеграм, Яндекс.Дзен

 

Район тормышына кагылышлы иң мөһим яңалыкларыбызны Балтаси_Хезмэт телеграм каналыбызда да укыгыз.


Галерея

Оставляйте реакции

2

0

0

0

0

К сожалению, реакцию можно поставить не более одного раза :(
Мы работаем над улучшением нашего сервиса

Нет комментариев

Теги: фестиваль