Ӟеч лу, тол! Ӟечбур, тулыс!

Но котьма ке но, со ортчиз — улосамы тулыс кузёяськыны кутскиз. Тросаз гуртъёсын, толэз келянлы, тулысэз пумитанлы сӥзьыса, шулдыр ужрадъёс, калык шулдыръяськонъёс но ортчизы.

Кызь укмысэтӥ тулыспалэ Дурга гуртын туж шулдыр толэз келян, вӧйдырез пусъён праздник ортчиз. Со радъямын вал клуб азьысь али лэсьтэм выль паркын. Отчы люкаськизы детсад аресысен кутскыса арлыдо песянай, песятайёсы вуытозь. Пӧсь табань, самоварысь ческыт чай, кырӟанъёс, эктонъёс, пӧртэм тунсыко шудонъёс — ваньмыз та адямиослэсь мылкыдзэс ӝутӥз, тулыс мылкыд кузьмаз. Котькудӥз — пичиез но пересез, егитэз но арлыдоез — шулдыръяськонэ пыриськиз. Гурт адямиос мӧзмемын уга таӵе ужрадъёслэсь. Ку эшшо адӟод на ог-огдэ! Ку валче люкаськыса шулдыръяськод! Бускель гуртъёсысь но лыктӥллям вал празднике.

Та шулдыръяськонэз радъязы Дурга гуртысь Андреев но Антонов Борисъёс, Семёнов Михаил, Иванов Альберт, Фирдания но Николай Алексеевъёс, детсадэн кивалтӥсьёс.

Куро мунё ӝуатӥзы, тылскем вылтӥ тэтчазы, асьсэлэсь малпанъёссэс быдэстыны курыса; пичиос гурезьысен нискылазы.

Милемыз но (Кӧргем, Киськем гуртъёсыссь куноосты — ред.) бадӟым карыса ӧтизы праздниказы. Сыӵе шулдыръяськеммы кемалась ӧй вал ини, бер ӝытозь но бертэммы ӧз поты. Бигерез но, крашинез но, удмуртэз но, порез но — ваньмы ӵошен-ӵошен шулдыръяськимы. Туж бадӟым тау кареммес вуттэммы потэ праздникез радъясьёслы, Дурга калыклы. Азьланьын но таӵе шулдыръяськон ужрадъёсы пыриськыны мед кылдоз.

Кӧргем, Киськем гуртъёсысь куноос

Фото: durga_official_