Элькун олимпиадаысь – вормонэн

Толсур — йылпумъянъёс лэсьтон толэзь. Арлэн пумаз котькуд адями аслыз выль ужпумъёс пуктэ, азьланезлы осконъёссэ юнматэ. Ёросысьтымы удмурт кылэз но литератураез умой тодӥсь пиналъёс но элькун олимпиадалэн йылпумъян этапаз тодон-валанъёссэс эскеризы.

Вордскем кылэз но литератураез тодонъя ёрослэсь данзэ утён — нимысьтыз ужпум, татын тон школалэсь, дышетӥсьлэсь, анай-атаедлэсь, быдэс ёрослэсь данзэ утиськод, аслэсьтыд быгатонлыкъёстэ шараяськод, туж кылкутымон уж луэ. Соин но, дыр, арлы быдэ нылъёсмы вормонъёсын, призо интыосын асьмеды шумпотто.

«Валтӥсез — пыриськон» лэчыткылэн гинэ буйгатскыса уг уло, самой вылӥ данъетэ вуыны тыршо. Та туж шонер, котькуд ужын самой вылӥ дунъетозь кыстӥськоно, ас кужымдэ котькуд удысын, котькуд ӧнерын эскероно. Соку гинэ аслыд кельшымон удыстэ шедьтыны, валаны луэ.

Озьыен, ёросысьтымы бадӟым классъёсысь нылъёс элькун олимпиадалэн йылпумъян этапаз ӧтемын вал. Шумпотымон, нылашъёсмы отысь буш киын ӧз бертэ. Ёросмылы но дышетӥсьёссылы бадӟымесь шумпотонъёс вайизы. Малпасько, матэктӥсь Выль арлы нылъёс асьсэлы но, дышетӥсьёссылы но, семьяоссылы но бадӟым кузьым лэсьтӥзы. 

11-тӥ классъёсысь нылашъёс элькунысьтымы мукет ёросъёсысь дышетскисьёслы дано вожвылъяськон кылдытӥзы. Тужгес шумпотымонэз, Покчи Лӧзя шоръёзо школаысь Артемьева Дарья вормисе потӥз, та школаысь ик Иванова Полина призо инты басьтӥз (дышетӥсьсы — Пчельникова О.М.); Ӟаны шоръёзо школалэн но шумпотонэз вань — Кешишева Юлиана призо интые вутскыны быгатӥз (дышетӥсез — Петрова Р.Н.).

10-тӥ классъёс пӧлын Покчи Лӧзя шоръёзо школаысь Ефремова Алина озьы ик призо интыен пусйиськиз (дышетӥсез — Пчельникова О.М.);

9-тӥ классъёс пӧлын Ӟаны шоръёзо школаысь Кешишева Ангелина призёр луиз (дышетӥсез — Петрова Р.Н.);
Нылъёсты но соослэсь дышетӥсьёссэс бадӟым азинсконъёсынызы ӟечкыласьком! Азьланяз но удмурт калыкмылэсь чеберлыксэ, гожъяськон удыссэ азинтон сюрес вылын сӥё-дано вормонъёсы вутскон сӥзиськом!