Хезмәт

Фидель Кастроез адӟем улосчимы

Календарьын 25 июнь морякъёслэн нуналзы шуыса тодмостэмын. Асьме ёросамы та праздникез пусйисьёс ӧжыт ӧвӧл, дыр — военно-морской флотын служить каремъёсты гинэ басьтом. Соос пӧлын газете гожтымон, адӟем карымон воргоронъёс но вань. Но мон малпамъя, тужгес висъяськисез Павлов Андрей Петрович луэ.

Андрей Петрович 1940-тӥ арын Вылын Ушма гуртын вордске. Тросэзлэн «война нылпиослэн» кадь ик, пичи Андрейлэн но улонэз секыт луэ. Сиыны сиёнзы но луымтэ, соин ик трос ужаны тупам — нюлэскы но ветлӥллям, пу, турын но нуллӥллям.

— Трос шуг-секытъёс пыр потоно луиз, мазэ ватонэз. Пичиысен ик атайтэк кыли, анае кыкетӥзэ картлы кошкиз, — шуэ Андрей Петрович, пичи дыръёссэ тодаз вайыса.

Но уродэз сярысь малпаськемез но верамез уг поты воргоронлэн.
1959-тӥ арын Андрей Петровичез армие басьто. Казаньысен Севастополе быдэс эшелон лэзиллям. Отчы шедем егит Андрей но. Одӥг ар но ӝыны служить каремез бере, училищее пырыны рапорт гожтэ.

— Со вал 1961-тӥ ар, мон экзаменъёсты сётӥ но Нахимов нимо военно-морской училищее пыри. Отын вить ар дышетскыса мон подводник луыны кулэ вал. Соин дышетсконме йылпумъям бере малпай подводной лодкаен ветло шуыса, но собере Севере мыноно луи, — вера Андрей Петрович.

Пинал дырысеныз ик Андрей Петрович чебер гинэ ӧвӧл, визьмо но, тыршись но луэм. Военной училищеын дышетскыкуз но капчи но секыт атлетикая, бызьылонъя, гребляя нырысетӥос пӧлын, Сборнойын луэм. Соин паймонэз но ӧвӧл, училищеын ваньзы сое тодӥллям шуыса. 4-тӥ курсын дышетскыкуз со Севастопольысь нылэз кышно басьтэ. (Туннэ нуналэ Андрей Петровичлэн Таня нылыз но Дима внукез Москваын уло — Н. Ж.).

Ужан сюрессэ Андрей Петрович мытэ Черноморской флотын, инженер БЧ-2 должностьын «Грозный» ракетной крейсерын. Егит лейтенант кема но улытэк старшой лейтенант луэм, нош берлогес ини капитан-лейтенант звание но вутскем. Сопала-тапала ветлэмез потымтэен, со куриськем батареялэн командирез луыны. Соку солы юлтошез, кудзэ дышетскыны лэзё вылэм, ачиз интые дивизи штаблэн начальникезлэн строевой частья юрттӥсезлэн интыужаз кыльыны ӵектэ. «Мон, конечно, соглаш луи, — пальпотыса вера Андрей Петрович, — нош ӝыны ар ортчыса, юлтоше дышетсконысь бертэм бере, монэ «Грозный» ракетной крейсере командирлэн юрттӥсезлы тодмостӥзы. Шумпотыса соглаш луи. Мыным зачётъёс сётыны тупаз, соку ик командире мыным кораблез нуллон понна зачётъёс но сдавать карыны ӵектӥз. Мон понна та витьымтэ шорысь луиз», — тодаз вае воргорон.

Зачётъёссэ сётыны быгатэм Андрей Петрович. Со дырысен солэн мукет улонэз кутскем шуыны но луэ. Пушкино городын нимысьтыз курсъёсты ортчемез бере, Андрей Петровичез кораблез нуллыны допустить каро.

— Троссэ адӟыны тупаз, — вера со, — «Грозный» крейсерен кыӵе гинэ шаеръёсы ӧм вуылэ — Анголае, Гвинеяе, Румыние, Египетэ, Сирие, Францие, Мароккое, Кубае, Эфиопие, Йеменэ, Ливанэ... Ачим командир луэме бере Африкае но лэзизы. Нош отысь бертэме бере ини штаблэн бригадаезлэн кивалтӥсезлэн воштӥсез луи, Поти городын (Грузия — ред). Отын мукет корабльёсын но ветлыны тупаз. Озьы, пӧртэм шаеръёсын, корабльын, зарезьын, вуын трос аръёсы ортчизы... Огъя верано ке, 27 ар мынӥз службае. 2 ар срочной служба, 5 ар дышетскон... Мукет аръёсыз — корабльёсын.

Сомында арзэ службалы сӥзем ке но, ортчем аръёсыз сярысь жаляса уг вера Андрей Петрович. «Али но шумпотыса мынысал, ужасал», — шуэ.

Военнойёслэн ужзы секыт ке но, Андрей Петрович кышкаса ужамтэ, ассэ жалятэк ужезлы сӥзем со.

— Егитъёслэн малы ке но туала дыре военно-морской училищеосы дышетскыны пыремзы туж ик уг поты, та монэ сюлэмшугъяськытэ. Кылсярысь, мон та удысын тыршыса кытчы гинэ ӧй вуылы, кинэн гинэ ӧй тодматскы (зэмзэ но, Андрей Петрович ас дыраз Фидель Кастроез но, Анголалэсь нырысетӥ Президентсэ но адӟем!), кыӵе шаеръёсын гинэ эшъёс ӧй шедьты. Соин но егитъёслы вераме потэ: эн кышкалэ! Дышетске. Дышетӥсьёстэс кылзӥське, соос тӥледлы умойзэ гинэ сӥзё. Анай-атайдэс гажалэ, яратэ, соосты уте, — аслэсьтыз мылкыдъёссэ но вуттӥз пиосмурт.

Огшоре гинэ верам кылъёс ӧвӧл та — Андрей Петровичлы аслыз но ог 15 ар талэсь азьло гуртаз анайзэ но сюратайзэ утён понна бертыны тупам. Со дырысен ини Балтасьын улэ, соин но асьме ёросысьтымы улон сярысь умой тодэ. Тужгес но Андрей Петровичез удмурт егитъёслэн ӟуч кылэн вераськемзы паймытэ но, вожзэ но поттэ вылэм (ачиз трос аръёс ӵоже пӧртэм шаеръёсы вуылыса но вордскем кылзэ вунэтымтэ адямилы та кӧтӝож луымон, вылэм).

Индийской, Атлантической, Северной океанъёсын ветлэм военнойлэн юбилейной медальёсыз но вань, воинской ужпумзэ сюлмысь быдэстэмез понна Ушаковлэн медаленыз но пусъемын. Сыӵе бадӟым вормонъёсыз луыса но, та сярысь ушъяськыса ӧз вера — Покчи Лӧзя аскивалтон ёзэсысен гинэ тодӥ.

Пичиысен моряк луыны малпанэз солэн быдэсмем, соин но ортчем улонэз сярысь уг жаля Андрей Петрович, туннэ нуналлы шумпотыса улэ. Ма, гуртын, пе, мӧзмыны дыр ӧвӧл. Тани Вормон нуналлы сӥзем парадэ но арлы быдэ мылысь-кыдысь пыриське со. Туэ, кылсярысь, парадын военной машинаен ортчиллям, военной кырӟанъёсты но кырӟаллям. Туэ, кылдэм ке, 78 арес тырмоз ни Андрей Петровичлы. Но сое тодӥсьтэм адями талы уз но оскы — сокем со пинал адске. Спортэн эшъяськемезлэн но бервылыз, дыр, та. Тӥни кыӵе со — военной адями!


 

Реклама
Нравится
Поделиться:
Реклама
Комментарии (0)
Осталось символов: