Г. С. Медведевлэн выжы нюжаосыз тӥяськемын ӧвӧл на

Котькуд адямилэн улоназ сыӵе нуналыз вуэ, ку со аслэсьтыз юа: «Кин мон, кыӵе выжыысь потэмын?» Вань сыӵе муртъёс но, кудъёсыз песянай-песятайзылэсь гинэ но нимъёссэс уг тодо. Уг тодо, кызьы соосты гуртооссы дунъяллязы. Сыӵе муртъёс выжытэм писпулы уг-а кельшо? Тӧл золгес пельтыку, сыӵе писпу погра, нош адями ас калыкезлэсь кепыра, палэнске, люкиське. Калык сямъёс-йылолъёс — со калыклэн выжыосыз. Калык выль пушъетъёс сётоз, выжыосыз бордын возиськыса, соосты утьыса. Выль пушъетъёс чебересь, юнэсь, эшшо но трос пушъетъёс сётыны быгатӥсесь мед луозы шуыса, ваньмылы сюлмаськоно калыкмылэсь дауръёс ӵоже люкам тодон-валанъёссэ, улонэз радъян йылолъёссэ валаны тыршоно. Г. С. Медведевлэн но выжы нюжаосыз тӥяськемын ӧвӧл на, али дыре но солэн вордскем шаераз но солэн палэназ ӵыжы-выжыосыз уло. Соос данъясько но вылӥ нулло солэсь нимзэ, тыршо утьыны но возьманы писательлэсь лэсьтэм ужзэ. Одӥгез сыӵе матысь адямиез — солэн правнучкаез Марина Андреевна Варламова. 

«Адями чиптэм-чаптэм уг ышы, бӧрсяз солэн малпанъёсыз, солэн книгаосыз кылё ке. Со сяна Григорий Сергеевич бере кылизы солэн нылыз, внукъёсыз но правнукъёсыз» — тазьы гожтӥз Эмилия Григорьевна Медведева, писательлэн нылыз.

— Марина Андреевна, малпасько, лыдӟисьёслы тунсыко луоз тӥледын матысьгес тодматскыны. Асьтэ сярысь пичияк ивортон уд сётэ меда?

— Мон вордӥськи Глазкарын, Короленко нимо педагогикая институтэз йылпумъяса, англи но немец кылъёсъя дышетӥсьлэсь ӧнерзэ басьтӥ. Но профессияя уг ужаськы. Институтэз йылпумъяме бере Петербурге интыяськи. Быземын, нылпие вань. Атае паласен но выжые удмурт, анае паласен но удмурт выжыосы вань. Анае уйпал удмуртъёс пӧлысь, атаелэн выжыосыз тӥ пала, лымшор удмуртъёс доры, вутто. 

— Пересь песятайдылэсь «Лӧзя бесмен» романзэ лыдӟиды-а?

— Берло дыре мон туж тунсыкъяськыны кутски удмурт лулчеберетэн. Пересь песятаелэсь «Лӧзя бесмен» романзэ (солэсь «Лозинское поле» шуыса нимаськись ӟуч вариантсэ — ред.) но лыдӟи. Туж шумпотымон, куке синпелет утиське, улэ. Романын туж трос интынимъёс пусъемын. Тӥ доры вуэм бере мон чылкак пайми, соос утиськемын, али но кутӥсько шуыса. Шаерамы кӧня ке пол кун радлык воштӥськиз ини, нош Муса нюлэс озьы ик Муса нюлэс луыса кылемын. Малпасько, со туж умой, интынимъёс уг вуно ке. Зэмзэ вераса, мыным потэ, тросаз гурт интыосын соос ышемын ини шуыса. Мон малпасько, со туж бадӟым ваньбур. Ваньмыз со книгаосын но, адямиослэн тодазы но утиське, улон-вылонын кутӥське. Со туж умой.

— Пересь песятайдылэн покчи дораз та дырозь вуылэмды вал-а?

— Ӧвӧл, мон нырысьсэ пересь песятаелэн вордскем музъемаз вуылӥ. Мыным туж кельшиз. Монэ туж умой пумитазы, шуныт но эшлыко мылкыдын. Кӧня ке ар талэсь азьло мон Покчи Лӧзя школае гожтӥ вал, Г. С. Медведевлэн правнучкаез луисько шуыса валэктӥ. Школаысен мыным соку ик ответ вуиз. Со туж шумпотымон но витьымтэ шорысь луиз. Тӥни озьы мыным шуд усиз песятаелэн вордскем музъеменыз тодматскыны, выль ӵыжы-выжыосты шедьтыны. 

— Кыӵе мылкыдъёс кельтӥз конференция?

— Мон пыриськи конференцие, кытын выжы писпуос сярысь но веразы. Монэ эшшо огпол туж паймытӥз со, макем ӟеч тӥ дорын утисько синпелет тодэ ваёнъёс. Мыным потэ, со туж бадӟым данъяськон, куке выжы нюжаос уг тӥясько. Малы ке шуоно куке но ыштэм кусыпъёсты выльысь шедьтыны котьку но секытгес. Соин но ӵыжы-выжы кусыпъёс ышытэк, лякытэн киысь кие мед выжозы вал, со туж дуно. Соин ужрадлэсь но огъя пумиськонлэсь кылем валтӥсь мылкыды — со данъяськон, ӵыжы-выжы кусыпъёс, тодэ ваёнъёс уг вуно шуыса валан. 

— Вера вал-а песянайды атаез сярысь?

— Песянае (Эмилия Григорьевна — Г. С. Медведевлэн нылыз — ред.) котьку атаеныз данъяське вал. Атайзэ пытсэт улэ басьтыкузы, солы луэм сизьым арес. Быдэс улонзы ӵоже соос анаеныз туж кема но трос тыршизы пересь песятаймылэсь ӟеч нимзэ берыктон понна. Песянае репрессированнойёсты шонере поттон бордын ужась огазеяськонэ пыриськем. Арлы быдэ политической репрессиос улэ шедемъёсты буре ваён нуналэз пусъё, песянае котькуд аре отын выступать карылӥз вал. Песянае понна туж кулэ вал атаезлэсь ӟеч нимзэ берыктыны. Мон малпасько, улэп ке луысал, со туж шумпотысал тодыны, атаезлэн вордскем музъемаз, вордскем гуртаз солы сӥзем конференция ортчиз шуыса тодыны. Улонэз ӵоже со атаез сярысь тодэ ваёнъёссэ сюлмаз возиз, данлыксэ берыктон сярысь сюлмаськиз. Со вал улонэзлэн одӥгез валтӥсь люкетэз. 

— Мон тодӥсько, ми доры куное вуылыкуды тӥ шошма нылмуртлэсь дӥсьсэ но мерттады шуыса. Туспуктэмъёстэс адӟи. Вераме потэ, тӥледлы туж мынэ милям дӥськутмы.

— Зэм но. Со мылкыдъёсты кылын верамон но ӧвол. Монэ паймытӥз коньдон тӥрлыкты. Отын 1750-тӥ аръёсысь коньдон но вань ук и со ваньмыз утиськемын! Шаермылэн историез возьматэ: асьмеос дышемын нырысь ваньзэ выжыеныз порыны, нош собере выльысь лэсьтыны. Соин но ас калыктэ, ӵыжы-выжыостэ, семьядэ юн гажан монэ туж синмаськытэ. 

— Таӵе веран вань: адями улэп, со сярысь малпало, со сярысь тодо ке. Тӥ та веранэн соглаш-а?

— Соглаш. Зэмзэ но со озьы, адями сярысь тодэ ваёнъёс солэн улон гумырезлэсь кузьгес. Со тодэ ваёнъёс сокем кема уло, макем трос калык со адями сярысь тодэ, малпа. Мон туж шумпотӥсько, пересь песятае сярысь вордскем шаераз, вордскем гуртаз уг вунэто шуыса. Солэсь нимзэ туннэ нуналэ нуллэ Покчи Лӧзя гуртысь школа но урам, солы сӥзьыса ортчытӥсько ужрадъёс. Озьыен, Г. С. Медведев ӵыжы-выжыосыз понна гинэ улэп ӧвӧл, аспалъёсыз но сое гажало, соин данъясько но со сярысь тодэ ваёнъёс калык пӧлын но уло. Угось со тодэ ваёнъёс но вашкалаосмылэсь кылем мерасмы луэ но, асьмеос, туала поколение, со ваньбурмес утьыны но вуоно выжыосмылы вуттыны кулэ. Таин валче туж умой луысал, кылсярысь, Г. С. Медведевлы сӥзьыса, Балтась ёросын музей яке музей-корка кылдытыны. Оло, азьланяз со, удмурт калыклэн данбурез луыса, пырыны быгатысал кыӵе ке туристической маршрутэ но. 

— Зэм но, туж умой малпан. Оскомы, со улонэ пыӵалоз шуыса. Улон асьмеды уг витьы ук, ялан азьлан вамыштэ. Но та вошъяськись улонын одно ик луыны кулэ ноку быронтэм дунлыкъёс, угось ӵапак со дунлыкъёс ик асьмелы АДЯМИ луыны юртто. 
Марина Андреевна, бадӟым тау вераськемды понна. Туж шумпотӥсько тӥледын тодматски шуыса. Оскисько, азьланяз тӥ ми доры ӵемгес вуылоды, дыр, шуыса. Ваньзэ умойзэ тӥледлы.

— Тау. Мон но туж шумпотӥсько, пересь песятаелэн вордскем музъемаз вуылыны шуд усиз шуыса. Азьланяз но выжы нюжаосты юнматыны тыршо, выльысь тӥ доры куное вуыны мед кылдоз.

Туспуктэмъёс понна тау М.А. Варламовалы но Н.Л. Антоновалы