Гырон быдтонмы пӧртэм улосъёсысь сюрсъёсын адямиосты люказ

Гырон быдтон — со лыктэм, люкаськем калыкез куно карон, лулысь-сюлмысь шулдыръяськон. Та сям-йылолъёс туннэ нуналэ но утиськыса кылё. Калык шудонъёс, конкурсъёс, ӵошатсконъёс, творческой коллективъёслэн выступлениоссы — та ваньмыз но праздникын вань вал.

Празднике лыктэм адямиосты кӧня ке пӧртэм площадкаос шулдыртӥзы. Котькудӥз куно ческыт ӝук веръяны быгатӥз, озьы ик соослы пӧраськемъёс, удмурт калык кухняысь юонъёс но ӵектэмын вал. Удмуртиысь Алнаш ёросысь кибашчиослэн юртысьтызы вуэм куноос асьсэлэсь лэсьтэм арбериоссэс вузазы, соос сяна котькудӥз лыктэм адями быгатӥз басьтыны Румыниысь нимысьтыз Гырон быдтонамы вуэм мадьяр семьялэн — Дэметэръёслэн асьсэ киынызы лэсьтэм туж тунсыко но «удмурт» шӧмо арбериоссэс но. Дэметэръёслэн бадӟым нылзы, Дьёнди (удмурт кылын Инӟы), монэным чылкыт удмурт кылын вераськиз. «Мон али школаын дышетскисько, мыным 16 арес. Кык ар дышетсконэ кылиз на — Румыниын школаын 12 ар дышетско. Трансильваниын улӥсько ке но, удмурт кылме уг вунэтӥськы, аслам мылкыды луыса дышетскисько. Катюшен (Ката, Инӟылэн сузэрыз — Н. Ж.) ог-огенымы но, анаенымы но тыршиськом удмурт кылын вераськыны, медаз вуны шуыса. Румыниын ведь анаенымы сяна удмурт кылын нокинэн вераськеммы уг луы. Тани аслэсьтым улонме но азьпалан удмурт но венгер калыкъёслэсь эшъяськонзэс ӝутон бордын тыршонэн герӟаны малпасько. Но со сяна мон туж яратӥсько эктыны, калык эктонъя дышетӥсь луэме потэ. Трансильваниын 7-тӥ арзэ эктӥсько ни, сотэк но улонме уг адӟиськы», — шуэ Инӟы.

Таӵе кыдёкысь лыктэм куноос но вань вал бере, Гырон быдтон калыккуспо статус басьтӥз шуыны но луэ. Дано куноос пӧлын озьы ик Татарстан Республикалэн Премьер-министрезлэн воштӥсез Василь Шайхразиев, Балтась муниципал ёрослэн главаез Рамиль Нутфуллин, Удмурт Элькунысь культурая но туризмъя министрлэн воштӥсез Пётр Данилов, Татарстанысь Калыкъёслэн эшъяськон юртсылэн директорез, ТР-ысь Кун Советысь Депутат Ирек Шарипов,  Татарстанысь удмуртъёслэн национально-культурной автономизылэн правлениезлэн тӧроез Андрей Герасимов но мукетъёс но вань вал.

— Ми адӟиськом, праздник Татарстанын ортчем Гырон быдтонъёс пӧлын тужгес масштабноез луыны быгатэ шуыса, малы ке шуоно со районысь самой умоятэм площадкаяз ортче. Та площадка туж трос адямиосты, делегациосты куно карыны быгатэ. Удмурт калыклэн сыӵе площадкаосыз одно ик луыны кулэ. Мон, Татарстанысь Калыкъёслэн эшъяськон юртсылэн кивалтӥсез луэмысь, трос аръёс ӵоже пӧртэм калыкъёслэн кусыпъёсыныз выремысь, котьку Гырон быдтон кадь национальной праздникъёслэсь кулэлыксэ шудонъёс, ӵошатсконъёс но культурной программа бордын гинэ уг адӟиськы. Нырысь ик, солэн пайдаез адями люкаськем бордын луэ. Туннэ татын трос удмуртъёс люкаськизы, соин ик культурной программа сяна, татын пӧртэм регионъёсысь вуэм адямиослы вераськон понна луонлыкъёс кылдытыны кулэ. Сюлмысь сӥзисько, туннэ вераськем малпанъёс, мылкыдъёс вуоно ар ӵоже улонэ мед пыӵалозы, мед быдэсмозы шуыса, — аслэсьтыз мылкыдъёссэ вуттӥз Ирек Ильдусович Шарипов.

Куноосты сӥё-дано пумитам бере, майданын культура удысын ужасьёслы но творческой коллективъёслы дуно кузьымъёс, наградаос но сертификатъёс кузьмазы. Собере нош — Татарстанысь, Удмуртиысь но Марий Элысь егитъёсты люкам улосвылкуспо «БиГерд» форуме пыриськисьёс удмурт дӥськутъёсын флешмоб эктӥзы.

Валтӥсь сценаын концертной программа гурлаку, пичи сценаын (подворье), праздник ӵоже удмурт нылъёслэсь но пиослэсь чеберлыксэс, кужымзэс эскерись «Чеберина» но «Батыр» конкурсъёс ортчытӥськизы. «Чеберина» ним понна нюръяськизы Балтась, Кукмор, Менделеевск, Мамадыш, Агрыз ёросъёсысь но Елабуга, Набережной Челны городъёсысь нылъёс. «Батыр» ним понна нюръяськизы Агрыз, Балтась, Менделеевск но Мамадыш ёросъёсысь пиос. Туэ валтӥсь «Чебериналэсь» нимзэ Елабугаысь Юлия Сорокина басьтӥз, нош «Батыр» асьме улосчимы, Ӟаныысь Юрий Кунаев луиз. Сизнерысь Людмила Трокова, асьме «Чеберинамы», 2-тӥ инты басьтӥз.

Огъя вераса, праздникысь ваньзы бурдъяськем мылкыдъёсын кошкизы. Куное лыктэм делегатъёс но мылкыдъёсынызы вошъяськыса, вераськыса сылӥзы.

— Ми ини уйин 2 часэн сюрес вылэ потӥмы. Ваньмыз празднике вуон понна! Гырон быдтон — со зэмзэ но удмуртъёслэн праздниксы, со милям национальной данмы. Ми туж шумпотӥськом, туннэ татчы, Балтась ёросэ, вуимы шуыса. Тау бадӟым балтась музъемлы сыӵе чебер праздник радъямез понна, милесьтым ваньмылэсь мылкыдъёсмес ӝутэмез понна. Таиз Гырон быдтон кемалы малпанъёсамы кылёз на, — верало мылкыдъёссэс ватытэк Бавлы ёросысь вуэм куноос.

Ма, праздник куноослы гинэ ӧвӧл, вузкарисьёслэн но тодазы кылёз. «Мороженоез кӧня ке час куспын басьтыса быдтӥзы, салкым ву, юоно напитокъёсты но нышыр бере шедьтыны уг луы вал ни», — пальпотыса вера одӥгез вузкарись.