Италмас, Сукыр така, перепеч…

Татарстан Республикаысь удмуртъёслэн лулчеберетъя йӧскалык автономиысьтызы азьветлӥсьлэн Самсонова Анна Владимировналэн «#будудмурт» программаез туэ куинетӥ ползэ улонэ пыӵатӥськиз. (Тодӥськоды на ке, нырысетӥез ортчиз вал 2019-тӥ арын, нош кыкетӥез — 2021-ын). Азьло аръёсы сямен ик со Покчи Лӧзя школалэн базаяз ортчиз. Куинь нунал ӵоже, 14-16 инвожое, 9-тӥ классын дышетскись нылпиослы, асьсэлэсь творческой но кивалтон потенциалзэс улонэ пыӵатон понна, луонлыкъёс кылдытӥськизы. Та куинь нунал ӵоже соос покчи классъёсысь дышетскисьёсын но ужазы, удмурт калык праздникез — «Гырон быдтонэз» — радъян-ортчытон бордын но тыршизы.

Та программалэн нырысетӥ нуналэз йӧскалык тусо чебермась арбериосты лэсьтонын дизайнысь туала амалъёслы сӥземын вал. Дышетскись пиналъёс туала дизайнэн но декоративно-прикладной творчествоысь этнофутуризм ӧрен тодматскизы но «Гырон быдтон» праздникез но ярмаркаез чебертон понна арбериосты, мастер-классъёсты дасязы. Озьы ик со нуналэ 9-тӥ классын дышетскисьёс удмурт калык эктонъёсты но шудонъёсты дышетӥзы. Кыкетӥ нуналаз пиналъёс удмурт калык кухняен тодматскизы но асьсэос картофкаен перепеч, шуэн шаньги но мукет ческыт удмурт сиёнъёсты пӧразы. Та кык нуналэ тыршемзылэн емышез «быгыльскиз» покчи пиналъёс понна радъям «Гырон быдтон» праздникын.

«Гырон быдтон» праздник «Шулдыртом» шуыса нимам концерт программаен кутскиз. Школа лагере ветлӥсь пиналъёс кырӟазы, эктӥзы, огъя вераса, праздниклы шулдыр кутскон сётӥзы. Собере Анна Владимировна, школалэн администрациезлы, дышетӥсьёслы но вань со адямиослы, кудъёсыз та ужрадэз радъяны но ортчытыны юрттӥзы, шуныт кылъёссэ вераса тау кариз но кузьымъёс сётӥз. Праздник калык шулдыръяськонъёсын азинтӥськиз. Ужрадэ пыриськизы Татарстанысь удмуртъёслэн НКА-зылэн исполнительной директорез Ольга Чайникова но Балтась ёросысь удмуртъёслэн «Кенеш» НКА-зылэн председателез Ольга Пчельникова. 

Та нуналэ Покчи Лӧзя школалэн территорияз куинь площадка ужаз. Нырысетӥез площадка декоративно-прикладной творчестволы сӥземын вал. Нимаськиз со чеберъям арбериосъя «Пужы» ярмарка. Та площадкаын 9-тӥ классысь нылъёс покчи пиналъёсты фоамиранлэсь италмас сяська, сӥньыслэсь поскес (фенечка) лэсьтыны дышетӥзы. Пусйыны кулэ, та площадкаен тунсыкъяськисьёс пӧлын пиос но трос вал.

Кыкетӥ площадкаын пиналъёс удмурт калык шудонъёсын шудӥзы. Нош кыӵе удмурт калык шудон мызган гуртэк! Мызганчизы но вал покчи лӧзяослэн — тросэзлы тодмо луэм Алексей Зубарев. Тӥни озьы, мызган гуръёслэн чузъяськемзы улсын пиналъёс «Небыльток», «Кышет» но «Сукыр така» шуыса нимаськем удмурт калык шудонъёсын шудыса мылкыдзэс эшшо но ӝутӥзы.

Куинетӥ площадкаын спортивной шудонъёс гурлазы. Нылпиос, кык командалы люкиськыса, эстафетаын вожвылъяськизы, канат кысказы.

Берло та площадкаосты ортчыса шулдыр мылкыд басьтэм пиналъёс ческыт сиёнъёсын тырмытэм ӝӧк сьӧрын куно луизы. Татын вал «Гырон быдтонлэн» ӝукез но, 9-тӥ классысь пиналъёслэн тыршеменызы дасям перепечъёс но, шаньгиос но, чай но.

Тӥни озьы «#будудмурт» проектлы луыса Покчи Лӧзя школаын туж тунсыко но пайдаё ужрад ортчиз. Малпам потэ, Анна Владимировналэн но, та ужрадэз радъяны юрттэм дышетӥсьёслэн но тыршемзы юнме ӧз луы, пиналъёслэн удмурт лулчеберетэн, калыккылосэн но удмурт кылэн тунсыкъяськон мылкыдзы ӝутӥськиз шуыса.