Хезмәт

Карек-Серма гуртысь Елизавета Петрова дорын куноын

Лиза апай Петрова 1942-тӥ арын 10 ноябре Карек-Серма гуртын вордскемын. Кызьы пусйиз ачиз нылкышно, солэн улоназ пӧртэмез луэм — шумпотон нуналъёсыз но, куректон уйёсыз но.

«Ваньзэ одӥг пол пумиськыса вераса но уд быдты, — шуэ Лиза апай. — Мон та юртын ӧй вордскы, вордски мукет коркаын, гуртлэн мукет пумаз вал со, — азьланьтэ со ачиз сярысь веранзэ. — Жугиськон дыръя анае монэным секыто кылем, атае монэ адӟымтэ ни — жугиськонын кулэм. Атайтэк будӥ мон… Анай егит на вал, гуртысь пиосмуртлы ик картлы кошкем. Мыным соку ваньзэ-ӧвӧлзэ куать арес луэм, анае монэ аслаз вордскем юртаз кельтэм. Солэн выныз, сузэрыз луэм, соос доры кельтэм — ӵужанай, ӵужатай, ӵужапайёс доры луэ ини. Мон бере сизьым нылпи вайиз али анай. Тямыс кузя вал ми солэн. Тӥни озьы будэм адями ини мон...»

Пичи дыръёсыз сярысь Лиза апай кӧня ке минут куспын вераз ке но, шӧдске: та кылъёсыз сьӧрын туж трос вӧсь луонъёс, адӟонъёс ватскемын.

Кӧня ке аресъем нылпи гинэ луэм бере, война бере аръёс Лиза апайлэн йырсазяз туж ик тодаз кыльымтэзы. «Мон соку воксё пичи вал ук али. Соин номыр вераны уг быгатӥськы», — шуэ со.

Карек-Серма гуртысь школаын ньылетӥ классозь дышетскыса, Лиза апай дышетсконзэ Ӟаныын азьланьтэ. Сизьыметӥ классэ йылпумъямез бере, колхозэ ужаны интыяське. «Сизьым классэз быдтыса, кытчы мынод? Дышетскод-а, ужалод-а, дорын пукод-а? Ужаны кутски, колхозэ пыри. Гуртысь фермаын тырши. Азьло милям гуртмы бадӟым вал, куатьтонлэсь трос корка луэм татын. Туннэ нуналэ куамын юрт вань меда. Адямиез ӧвӧл ук ини, кошкыса быдмизы, чиньыен лыдъяны луэ кылемъёссэ», — маде Лиза апай.

Фермаын со ыжъёсты сюдэ. Со луэ 60-тӥ аръёс. Отын ужамез бере, кӧня ке дырлы почтае ужаны интыяське. Куать ар ӵоже отын тырше. «Ужай аслам гуртам, почталэн отделениез Ӟаныын вал. Азьло мынам сузэре Галя отын ужаз. Со картлы кошкыса нылпи вайиз но мон со интые отчы ужаны пыри», — почтаын ужам аръёсыз сярысь вера со. Почтаын ужаса дугдэмез бере, ошак сюдыны пыре гуртысьтыз фермаязы. Кызь арлы матэ отын ужа, пенсие потытозяз. 1997 арын дано шутэтсконэ потэ.  Нялтас вераса, солэн Ленинлэн вордскемез дырысен 100 ар тырмонлы сётэм медалез но вань — кинлы гинэ йӧтэм али со!

Картлы кошкымтэ Лиза апай. Гумырзэ ужаса но нылпиосты утьыса ортчытэм, тазьы вераз солэн кенэз Валя апай.

— Ӵужапай картлы кошкиз, ӵужанай кулӥз. Ӵужмуртэ кулӥз, соослэн вить нылпиоссы анай-атайтэк кылизы. Мон соку егит вал, кызь арес луэм меда мыным. Со вить нылпиослэсь кӧнязэ ке вордыны басьтӥзы, кылемъёссэ нылпи юртэ келяны тупаз. Мон кызьы вордысал соосты? Анай мукет пиосмуртлы кошкем бере, аслаз нылпиосыз огез сьӧры огез вордскизы — со кызьы вордысал? Соосты нылпи юртэ келям бере, коркан огнам номыр кареме но уг луы. Ачим кыли огнам. Анай монэ собере дораз ӧтиз, огнам медам улы шуыса. Ӵапак тани та корка, соос татын уло вал. Озьыен, аслам сводной сузэръёсын, вынъёсын ӵош будӥмы ини. Огнам кызьы улысал мон со юртын?

Зэмзэ верано ке, Лиза апаез анаез кельтэм шуыны туж ик шонер но уз луы. Малы ке шуоно солэн верамезъя, анаеныз соос котьку пумиськылӥллям, со котьку анаез дорын луэм. Весь со доры куное ветлэм.

— Лиза апайлы йӧтэм ини солы, гумырыз ӵоже нылпиосты будэтыса улонзэ ортчытэм. Но шуг-секытъёслы, улонысьтыз адӟонъёслы сётскымтэ, — вера нош ик Валя апай.

Табере Лиза апай дорысь ваньзы шуымон пазяськиллям ини, котькудӥзлэн ас семьяез. Туннэ нуналэ Валя апаен, солэн пиеныз Андреен, Андрейлэн кышноеныз   — ньыльназы уло. Валя апайлэн куинь пиосыз вань. Лиза апайлэн выныз Анатолий (Валя апайлэн картэз) кулэмын ини.

Лиза апайлэн аслаз нылыз Людмила но та юртын будэм. Туннэ нуналэ со аслаз семьяеныз та гуртын ик улэ. Ужа Людмила «Бурнак» обществоын экономист луыса. Солэн кык пиосыз вань — Александр («Бурнакын» кадастровой инженер луыса ужа), Алексей (Казаньысь Аграрной университетын дышетске).

— Вань улонэ татын ортчиз. Сомында история верамон… Мар адӟемед вань шуо, тӥни сомындаез адӟыса утьы ай… Пӧртэмез луиз ини… Туннэ нуналлы одӥг но уг ӧкынӥськы, номыр сярысь уг жаляськы. Кур но ӧз каре монэ. Начар но ӧй улы мон. Сиёнлы но ӧй ёрмы. Тэльмырыса ӧй улы. Ӝожтӥськымон ӧвӧл. Валяос но кур ӧз каре, ӟечен ӵош улӥськомы, — шуэ Лиза апай.  — Кытчы ке мынӥ ке но, доре бертэме потэ. Городэ мынӥськод — соку ик бертэм потэ. Огпол мынӥськем вал, пенсие потэме бере, одӥг толэзьзэ мырдэм чидаса улӥ городын, сокем гуртэ бертэме потӥз. Та дырозь улэм бере кытчы мынэмед потоз ини. Ӝоген 80 арес тырме ук, — оло пальпотыса, оло ӝожомыса вера Лиза апай.

Кема вераськимы али соин. Улонысь чыры-пырыос сярысь, ӵыжы-выжыосмы сярысь, гуртлэн улонэз сярысь — ваньзэ одӥг статьяе тэрытыны уз луы. Лиза апаен келяськыса, сюрес кутӥ кыкетӥ песяе — Зояпай доры. 

Реклама

Район тормышына кагылышлы иң мөһим яңалыкларыбызны Балтаси_Хезмэт телеграм каналыбызда да укыгыз.

Иң мөһим һәм кызыклы язмаларны Татмедиа Telegram-каналында укыгыз


Нравится
Поделиться:
Реклама
Комментарии (0)
Осталось символов: