Карек-Серма гуртысь Зоя Петрова дорын куноын

Петрова Зоя Илларионовна 1934-тӥ арын Карек-Серма гуртын вордскемын. Со кадь тунсыко, но со дыре ик секыт улонэз адӟем адямиосты шер пумиталод — историлэсь пӧртэм бамъёссэ адӟемын Зоя апай. Война, сютэм аръёс, секыт ужан, колхозэз ӝутон — мар пыр гинэ потэмын ӧвӧл со. Озьы ке но, со монэ пальпотыса пумитаз, улонысьтыз тодаз вайыны быгатэм вакытъёсыз сярысь мадиз.

— Атае, Илларион, жугиськонэ кошкиз. Жугиськонысь бертӥз, татын, гуртын кулӥз ини. Кемалась вал ини со. Анае но кемалась ӧвӧл ини. Агай-вынъёсы но ваньзы кулэмын. Висись сузэръёсы вань вал, ветлыны уг быгато вал, соос но кулӥзы, — кутске ачиз сярысь веранзэ Зоя апай.

Пичи дырыз секыт война но война бере аръёслы тупаллям бере, Зоя апайлы шуг-секытъёсын ваче син пумиськоно луэ. Ваньзэ пыр-поч тодаз вайыны ӧз быгаты ке но, Зоя апай шуэ: «Пичиысен ужаса будӥмы. Уриськимы, кутсамы. Кыӵе ужез косӥзы, ваньзэ быдэстӥськомы вал. Секыт ужъёсты ужаса будӥмы ини». Школаын но кӧня ке класс гинэ йылпумъям со. Карек-Серма гуртысь школаын 4 класс быдтэм, собере Кушкет школае дышетскыны выжем. Кушкетэ дышетскыны ветлэмзэ тодаз вайиз Зоя апай. Гуртысьтыз одӥг ареслы быдӟымгес Настя нимо нылэн ӵош ветлӥллям вылэм. «Настяен ӵош дышетскыны ветлӥськомы вал. Со но кӧня ке ар талэсь азьло кулӥз ини…»

Гумыраз фермаын ужам со. Дышетскон сярысь малпанъёсыз луымтэзы. Карек-Сермаын парсь ферма луэм. «Фермаын ужай, парсьёсты, ветылъёсты но сюдӥ. Мукет интые ужаса ветлыны ӧз йӧты ни — кытчы мынод на. Луэм ужлы шумпотӥмы. Пенсие потытозь но отын тырши — 50 арес тырмытозям.

Зоя апай яратонзэ кыдёкысь утчамтэ — Карек-Серма гуртысь Трифон агайлы картлы кошкем. Со кемалась кулэм ини. «Нылпиосыз вань, — вераськонэ итӥське Зоя апайлэн кенэз Алевтина. — Одӥгез татын, та юртын улэ, Геннадий, мынам кузпалэ со. Самой бадӟым нылыз Антонида, Ципьяын улэ. Одӥгез пиез, Семён, кулӥз, озьы ик Ципьяын улэ вал. Света нылыз но вань, со Ӟаныын улэ».

Туннэ нуналэ Геннадий пиезлэн семьяяз, бадӟым но шуныт юртын улэ. Кенэз Алевтина но пиез Геннадий Зоя апаез кадырласа утё. Соослэн куинь нылпизы вань: Наталья, Константин но Олег. Нош огъя туннэ нуналэ Зоя апайлэн тямыс внукез но укмыс правнукез вань. Нош кузпалыз кемалась кулэм ини — 1984-тӥ арын.

— Вань гумыры татын, та гуртын ортчиз. Татын вордски, улӥ но улӥсько, пересьмонме ортчытӥсько, — шуэ Зоя апай. — Мон асме шудо адями шуыса малпасько. Пие, кенэ монэ ӟеч утё, — синкылиоссэ ватыны быгатытэк вера арлыдо кышномурт. — Синмы адӟе али, ветлыны но быгатӥсько, луэмезлы шумпотыса улӥсько.

Вераськон куспамы Зоя апайлы верай, мынам ӵужанае та гуртысь луэ шуыса. Сое тодэмез бере, Зоя апай туж шумпотӥз. Собере мыным ӵыжы-выжыосы сярысь кӧня ке мадиз со. Василий Петрович Никитин шуэ: «Зоя апай туж трос тодэ вал. Гуртлэн историез яке адямиос сярысь кыӵе ке юанъёсы кылдӥзы ке, одно ик солы вазиськисько вал». Юнме гинэ озьы уг вера вылэм со. Зоя апай зэмзэ но ветлӥсь справочник кадь.