Кема витем праздник матэктэ

Малы ке шуоно туэ асьме Балтась музъемын ортчоз республиканской Гырон быдтон. Ортчоз со Балтась посёлокысь «Сабантуй» паркын 1-тӥ пӧсьтолэзе (июле).

Валамон ини, республика масштабен ортчись ужрад луэ бере, кылкутон но трослы бадӟымгес. Быдэс республикаысь но республикамылэн палэнысьтыз вуэм куноосты, кивалтӥсьёсты возьытэ усьытэк пумитано, мукетъёслы адӟем карымон кунояно, могӟетъёс кылдытытэк, ӝегатсконъёстэк шулдыръяськон ужрадэз кулэезъя лад-лад радъяно. Нош со понна огъя команда луыса ужано, кызьы вераз одӥгаз Гырон быдтонэз ортчытонэн валче люкам кенешонын районысь исполнительной комитетлэн кивалтӥсезлэн воштӥсез Ильгам Гайнутдинов, ужрад швейцарской часлэн ужамез кадь радъямын луыны кулэ. Нокыӵе ӝегатсконъёс, янгышъёс лэсьтоно ӧвӧл. Соин но та нуналъёсы районысь исполком, ёросысь культура отделысь ӧнерчиос но гурт клубъёсысь ужасьёс, удмурт школаосысь дышетӥсьёс, нылпи садъёсысь визьнодасьёс, библиотекарьёс, гурт поселениос но хозяйствоос та ужпумез быдэстон понна дэмен тыршоно луозы.

Куноос сярысь верано ке, соос трос луозы шуыса витиське. Казаньысь но республикалэн палэнысьтыз вылӥ куноос, Татарстанлэн мукет ёросысьтыз делегациос, творческой коллективъёс, кылсярысь, Огырчи (Агрыз), Бавлы, Алабго, Кукмор, Мамадыш, Менделеевск ёросъёсысь, Челны но Казань городъёсысь куноос вуыны кулэ. Котькуд делегацилы куратор тодмостэмын луоз. Со соосын праздник ӵоже луоз, ваньзэ возьматоз, котьмаин тодматоз.

Валтӥсь сцена но майдан сяна, ужалозы на удмурт калыклэсь вашкала улонзэ возьматӥсь юртъёс: корка, мунчо, лапас-кенос. Отын удмурт атрибутъёслэсь, ужан тӥрлыкъёслэсь, юртъер котырын кулэ луись арбериослэсь тунсыко композициос кылдытэмын луозы. Вераны кулэ, отын ик ортчоз одӥгез тужгес тунсыкоез вожвылъяськон — «Чеберина» конкурс. Кылем арын Менделеевск ёросын ортчем республиканской Гырон быдтонын «Удмурт батыр» конкурс но радъяллям вал. Туэ но удмурт пиос пӧлын сыӵе вожвылъяськон ортчытыны чакламын.

Мукет аръёслэсь висъяськыса, туэяз шулдыръяськонын луозы на спортивной шудонъёс но, кылсярысь, волейбол. Соос нимаз площадкаын ортчытӥськозы. Пӧламы валэн ворттылонэз яратӥсьёс но трос. Соосты но шумпоттыны быгатӥськом — туэ Гырон быдтонын валэн ӵошатскон но луыны кулэ. Нош кыӵе шулдыръяськон котькудмылы но тодмо но матэ луэм шудонъёстэк. Котьку сямен туэ но калык горшок пыргытыса (нылпиос но бадӟымъёс), пу вандылыса, курегпуз питыртыса (нылпиос но бадӟымъёс), чорыгаса, пуйыен (нылпиос но бадӟымъёс), думылэм пыдъёсын, возьвылтӥ куасэн, ведра карнанэн бызьылыса, бодыен но канатэн кыстаськыса, пуйыен жугиськыа, юэн тырмытэм пуйыосты нуллыса, кутэн шудыса мылкыдзэ ӝутоз, кузьымъёс басьтоз. Нылпиос туж ярато синъёссэс думыса арбери вандыны. Со но луоз. Пӧламы парсьпи но атас кутонъя усточиосмы но вань. Соос но асьсэлэсь шаплы но чырткем луэмзэс возьматыны быгатозы.

Тросэз Гырон быдтонэ концерт учкыны, мылысь-кыдысь шутэтскыны шуыса мынэ. Асьмелэсь та шулдыръяськонмес калык кырӟанъя но эктонъя «Айкай» театртэк син азе пуктыны секыт. Туэ но яратоно артистъёсмы шулдыртозы асьмелэсь Гырон быдтомес. Со сяна, республикамылэн ёросъёсысьтыз вуэм творческой коллективъёс но Ӟаны культура юртысь «Шулдыр ӝыт», Ӟаны школаысь «Инвожо» ансамбльёс асьмеды асьсэ выступлениосынызы шумпоттозы шуыса витиське. Кылем арын кадь туэ но Мызганчиослэсь парадзэ ортчытыны чакламын. Удмурт егитъёслэн «БиГерд» форумазы пыриськись нылъёслэн но пиослэн тыршеменызы радъямын луыны кулэ бадӟым флешмоб.

Котьку сямен Гырон быдтон кутскоз куноослэн, творческой коллективъёслэн, делегациослэн майданэ сӥё-дано пыременызы. Котьку сямен луозы Музъем Анайлэн но Шундылэн символъёсыз, гырисьёс, кизисьёс, вӧсясь но, конечно, ческыт ӝук!

Озьыен, гажаса лыктэ 1-тӥ июле 11.00 часэ Балтась посёлокысь «Сабантуй» парке республиканской Гырон быдтонэ! Калык шулдыръяськонысь нокин но куашкам мылкыдын уз кошкы. Котькудӥз аслаз сюлмаз кельшымон ужрадэ пыриськоз, мылысь-кыдысь шутэтскоз, ар ӵожелы тырмымон шулдыр мылкыд басьтоз шуыса оскисько.

Ольга Плотникова

(статья гожтэмын 2018-тӥ арын ортчытоно Гырон быдтонлэн программаез вылэ пыкъяськыса).

Ильгам Фидаелевич Гайнутдинов,

районысь исполкомлэн кивалтӥсезлэн воштӥсез:

 «Асьме азьын, Сабантуен ӵошатыса, Гырон быдтонэз умойгес ортчытыны кулэ шуыса ужпум пуктэмын. Малы ке шуоно та республиканской масштабен ортчоно праздник. Асьме доры лыктэм куноос «Кылем аръёсын сярысь Гырон быдтон трослы умойгес ортчиз, балтасьёс быгато. Соослэсь пример басьтоно» мед шуозы но праздникысьтымы ӝутскем мылкыдын мед бертысалзы. Со понна командамылэн юн огазеяськыса ужамез кулэ луэ, соку нокыӵе шуг-секытъёс уз кылдэ. Котькуд ужмес валче ужаны кулэ, ог-огмы вылэ ваньзэ погыльтыны уг яра. Асьме сяна, тӥ сяна та ужез нокин но уз лэсьты. Вань кадь пуктэм ужпумъёсты быдэстыны быгатӥмы ке, самой умой Гырон быдтон ортчытыны быгатомы».