Котьку юрттыны дась луись механизатор — Алексей Матвеев

Нош тани самой кылзӥськисез, котькинлы юрттыны дась луисез, пал кыл но верасьтэмез механизатор Алексей Матвеев луэ вылэм. Сыӵе ушъямон ужасен вераськытэк кыльыны ӧз луы.

Алексей Юрьевичлэн, ми доры вераськыны лыктыкуз, киосыз вӧен саптаськемын вал. Киоссэ ватыны тыршыса, востэм воргорон вераськонэз мытэ:

— МТЗ-82 тракторме ремонт карисько вал. Туннэ нуналэ (2-тӥ инвожое вал со — Н.Ж.) ужмы сокем кысык ӧвӧл бере, дыраз техникаез ремонт карыса дасяно. Туннэ со ужме быдтоно ини. Ӝоген мукет ужъёс кутскозы ук, турынэн выроно луоз…

2000-тӥ арысен «Сурнай» обществоын механизатор луыса ужась Алексей Юрьевич но пичи дырысеныз техникаез тодыса будэм воргорон вылэм, соин со машина-тракторъёс борды кыстӥське. Улын Ушма гуртын вордскем Алексей гумырез ӵоже вордскем гуртаз улэ. Городэ кошкыны солэн малпанъёсыз но луымтэзы. Вордскем гуртэныз со Урнякын механизаторлы дышетскыкуз но армиын служить карыкуз гинэ люкиськем. Туннэ нуналэ но со Улын Ушмаын улэ. Кузпалэз Эвелина «ФарМат» магазинын ужа, Эмилия нылзы нылпи садэ ветлэ.

— Вань улонэ гуртын ортче, ӝыныез — татын, колхозын. Урняке дышетскыны кошкон азьын ик (со луэ 8-тӥ класс бере) комбайнёрлэн юрттӥсез луыса ветлӥ. Гуртысь пиос понна со оломар ӧвӧл, дышем уж, — шуэ механизатор. — Озьы, пичи дырысен гуртын будыса, бусы ужъёс матын луэм бере, техника вӧзысь кошкыса вуымтэ бере, паймонэз но ӧвӧл, малы мон та удысын тыршисько.

Урнякын куинь ар ӵоже дышетскыкуз басьтэм тодон-валанъёсыз Алексей Юрьевичлы ужаз юрттӥллям ке но, воргорон вераз: «Дышетскон — со одӥг, нош практика — воксё мукет. Ачид ужаса, аслад синмыныд адӟыса гинэ ужлэсь вань чыры-пырыоссэ валаны кутскиськод».

Туннэ нуналэ механизатор, зэмзэ но, ужезлэсь вань чыры-пырыоссэ тодэ ни, соин кивалтэтэз солы котькыӵе ужез оскыны дась.

— Туэ тулыс 400 гектар музъеме кукурузаез кизи. Гужемзэ прессэн ужасько, сенаж но нуллӥсько, огъя вераса, мар косӥзы, сое быдэстӥсько, — шуэ механизатор. — Уж луыку, шумпотыса ужаськомы.

Механизаторен соглаш луэмзэ вераз бригадир Николай Анатольевич но. Котькудӥз ужась умой вала: вормонэ ӵошен кужым поныса гинэ вутскыны луэ. Тулыс, гужем но сӥзьыл гинэ ӧвӧл, толалтэ но тыршыса ужало «сурнайёс». Азьпалан но озьы ик мед луоз!