Куинь выпускникъёс — куинь зарни медалистъёс

Кылем дышетскон арын Покчи Лӧзя школаысь 11-тӥ классэз куинь пиос йылпумъязы. Шумпотымон но тунсыко: куиньназы ик соос дышетсконзэс зарни медален быдтӥзы. Егит пиос тае асьсэлэн тыршеменызы гинэ ӧвӧл, дышетӥсьёссылэн, анай-атайёссылэн юрттэменызы но герӟало. Котькуд дышетӥсьлы тау карыса, соос классэн кивалтӥсьсэс Лейсан Раисовна Манашеваез но покчи классъёсысь дышетӥсьсэс Нина Михайловна Мойсееваез пусйизы. Озьы ик соос веразы, пӧлазы нокыӵе вожвылъяськон но ӧй вал шуыса — ог-огзылэн визьмо луэмзы, дышетскыны быгатэмзы соослы тыршон понна эшшо но бадӟым стимул сётэм.

Туннэ нуналэ соос — вылӥ дышетскон юртъёсын бюджет интыын дышетскись студентъёс.  Покчи Лӧзяысь Антон Сергеевич Мухин Казаньысь КНИТУ-КАИ-ын дышетске, специальностез — транспортно-технологической процессъёсты уже кутон (эксплуатация). Данил Ришатович Габидуллин но Покчи Лӧзя гуртысь, дышетске Ижевскысь технической кун университетын (ИжГТУ), сое йылпумъямез бере Данил технической эскеронъя (контролья) сотрудник луоз. Роман Вячеславович Григорьев Улын Ушма гуртысь, дышетске Казаньысь Гурт возёсъя (Аграрной) кун университетын агроинженерия ӧръя.  Куиньназы ик пиос — визьмоесь, йӧноесь, тыршисесь. Та сярысь соослэн классэн кивалтӥсьсы, Лейсан Раисовна, данъяськыса вераз: «Со классэ мынам идеальной вал. Мон соосты 5-тӥ классысен кутскыса 11-тӥ классозь дышетӥ. Антон, Рома, Данил сярысь ке верано, соос ваньзы туж тыршисесь. Дышетскон ласянь гинэ ӧвӧл, ваньмыз ласянь. Ноку но «уг быгатӥськы», «мынам уг пӧрмы» шуэмзы ӧй вал. Куиньназы дышетскыны кылемзы бере, ваньмыз соос вылэ кылиз: конкурсъёс но, олимпиадаос но. Пал кыл но вератэк, мыло-кыдо пыриськылӥзы, со дыре дышетсконзы сярысь но ӧз вунэтылэ, дышетсконзы соослэн котьку нырысетӥ интыын вал». Дышетӥсьлэн верамезъя, пиос зэмзэ но котькытчы вутскиллям. Соос асьсэлы вылӥ дышетскон юртэ дышетскыны пырыны ужпум пуктӥллям, асьсэлы кулэ луись предметъёсъя экзаменъёслы дасяськиллям, огъя вераса, дышетскон шоры туж кулэ карыса учкиллям. Студентъёслэн нуналэнызы валче, Покчи Лӧзя школалэн выпускникъёсыныз вераськыны малпамы. Маин соос школаын дышетскыкузы тунсыкъяськиллям, кызьы студент улонзы ортче — та но мукетыз сярысь улӥын интервьюын.

— Пиос, тӥ али студентъёс ини. Но мон тӥледлы нырысь ик школа дыръёсады берытскыны ӵектӥсько. Кыӵе предметъёс тӥледлы тужгес кельшо вал школаын дышетскыкуды?

Антон: Школаын мыным тужгес но кельшо вал история, обществознание, физика выллем предметъёс. История но обществознание тунсыко потӥзы, малы ке шуоно мыным кельше асьмелэсь обществомес, асьме калыкез эскерыны. Физика — туж паськыт но аспӧртэмлыко тодос, солэн трос тодослюкетъёсыз вань, сое но эскерыны туж тунсыко.

Данил: Мыным тужгес кельшо вал география, информатика предметъёс. Кинлы кызьы дыр, уг тодӥськы, но озьы ик матын кари черчение предметэз, физкультура сярысь веранэз ӧвӧл ини. География но информатика кельшо вал, малы ке шуоно мыным котьку тунсыко потӥз, мае эскеро та наукаос. Черчение кельшиз, малы ке шуоно суредаськонъя урокъёс покчи классъёсын дышетскыкум ик кельшо вал, нялтас вераса, та мыным али ке но юрттэ начертательной геометрияя параосын. Физкультура, валамон ини, тросэзлы пиослы матын, тае комментировать каронэз но ӧвӧл, дыр. Огъя учконо ке, ваньзы предметъёс тунсыко вал, та дышетӥсьёслэн тыршемзылэн бервылыз. 

Роман: Мон но озьы ик вераны быгатӥсько, котькуд предмет ас сяменыз тунсыко вал шуыса. Но тужгес кельшизы физкультура (зэм пусйиз Данил, кызьы пиослы физкультура уз кельшы ни — со ведь футбол, волейбол, куасэн ветлон шуэм кыл). Физикаез яратыны тупаз, малы ке шуоно со предметъя экзамен сётоно вал. География предметэз яратӥ, малы ке шуоно солэсь но капчи предмет ӧй вал, дыр. Бадӟым тау дышетӥсьмылы Вероника Вениаминовналы, солэн урокъёсаз котьку туж тунсыко вал. Озьы ик удмурт кылъя но литературая урокъёсты пусъеме потэ, со мынам анай кылэ бере, соос мыным капчиен сётскизы. Тунсыко вал Наталия Львовналэсь милемлы веросъёс лыдӟемзэ кылзӥськыны.

— Нош классады нылъёстэк, куинь кузя гинэ дышетскыны мӧзмыт вал-а? 10-тӥ классозь кӧня ӵошен дышетскиды но кыӵе вал кусыпъёсты дышетӥсьёсыныды, одноклассникъёсыныды?

Роман: Бен, нылъёстэк дышетскыны мӧзмыт луиз ини. 10-тӥ классозь ми 12 кузя вал классамы, соос пӧлысь куинез гинэ нылъёс вал. Но соос 10-тӥ классэ ӧз кыле, соин милемлы кык ар ӵоже куиньнамылы дышетскыны тупаз. Дышетӥсьёсын но, одноклассникъёсынымы но кусыпъёсмы умой вал. 5-тӥ классэ ми доры мукет гуртъёсысь пиналъёс дышетскыны лыктӥзы, соосын но ӝог эшъяськимы.

Антон: Ӧжыт мӧзмытгес кылиз, веранэз ӧвӧл. Яра ай, мукет классъёсын нылъёс вань вал (серекъя). Милям 10-тӥ классозь но классамы укмыс пиослы куинь гинэ нылъёс вал, соин дышиськеммы, дыр, ини. Адямиосын ӝог огъя кыл шедьтыны быгатӥсько бере, нокыӵе шуг-секытъёс ӧз кылдэ кадь дышетӥсьёсын но, одноклассникъёсын но.

Данил: Зэмзэ верано ке, сыӵе югдурлы, куинь кузя пиосын дышетсконлы, ми ӝог дышимы. Пусйыны кулэ на, милям классмы, мукет классъёсын, кытын трос дышетскисьёс, ӵошатыса, сплочённойгес но вал. Классмы эшлыко, кусыпъёсмы ваньзэсын умой вал. Шулдыр дыръёс вал со. — Тӥ куиньнады но школаез зарни медален йылпумъяды, та туж ушъямон, туж шумпотымон. Озьы бере, ваньды туж умой дышетскиллямды. Со котьку озьы вал-а яке медалез басьтон понна ӧжыт тросгес тыршыны тупаз берпуметӥ аръёссэ дышетскыкуды?

Данил: Зарни медалез басьтон понна трос тыршыны кулэ луиз. 10-тӥ классозь мон отличник ӧй вал, кык-куинь «ньыльёсы» вань вал. Зэмзэ верано ке, медальлэн мон понна туж ик бадӟым кулэлыкез ӧй вал, валтӥсез — со тодон-валан ук.

Роман: Валамон ини, зарни медалез басьтон капчиен ӧз йӧты. Ми куиньнамы но кык ар ӵоже тыршыса дышетскимы. «5» но «4» гинэ басьтӥмы, куддыръя «3»-ёс но луыло вал ини (серекъя). Трос юрттӥз милемлы классэн кивалтӥсьмы Лейсан Раисовна Манашева. Мон но, Данил кадь ик, ударник вал котьку, одӥг-кык “ньыльёсы” луылӥзы. 10-тӥ классын валай, зарни медаль басьтон понна тыршыны кулэ шуыса, малы ке шуоно вылӥ дышетскон юртэ дышетскыны пыреме потӥз. Нош зарни медаль кӧня ке вылӥ юртъёсын ватсаса 10 балл сётэ, озьыен, бюджет интые пырыны шансъёс бадӟымгес луо.

Антон: Мон ӧй верасал, зарни медаль туж секытэн йӧтӥз шуыса. Но кызьы луиз ке но, тыршытэк ӧм басьтэ медальёсмес. Нырысетӥ классысен четвертьёсты «5»-лы гинэ йылпумъяй, соин малпасько, «витьёслы» дышетскон умой сямлы пӧрмиз, дыр, шуыса. Со сяна, дневникез «ньыльёсын» саптаме ӧз поты. Нош медаль — со, мынам малпамея, тыршеммылэн бервылъёсыз.

— 10-11-тӥ классъёсы дышетсконды борды кужмогес басьтӥськиды соку. Мукет маин ке вырыны дырды кыле вал-а бен? 

Роман: Мыным дышетскон сяна маин ке нош вырыны дыры уг тырмы вал. Покчи классъёсын гинэ волейболъя, баскетболъя секциосы ветлӥ, хоккеен шудыса ути. Эктыны быгатӥсько шуыса, монэ пӧртэм эктонэн герӟаськем ужрадъёсы басьтылӥзы. Удмурт, ӟуч, бигер эктонъёсты эктӥмы. «Созвездие-Йолдызлык» конкурслэн район этапаз но пыриськи. 

Антон: Школаын трос маин тунсыкъяськисько вал: хоккеен, спортивной туризмен, волейболэн. Хоккеен шудыку, командалэсь нимысьтыз заявление басьтылоно вал, дышетсконысен мед лэзёзы шуыса.

Данил: Мон туж ик спортэн ӧй выры, но милям переменаын но, кылсярысь, волейбол шудыны дырмы тырме вал. Нырысетӥ классысен кутскыса куатетӥ классозь суредаськыны яратӥ.

— Трос учыре отличникъёс пӧртэм олимпиадаосы, конкурсъёсы пырисько. Конференциосын, форумъёсын асьсэды эскерыса, школалэсь данзэ утё.

Антон: Ми классын ӧжыт вал бере (параллельной классмы но ӧй вал), тросэз олимпиадаос мон вылын вал. Валамон ини, ваньмаз рос-прос дасяськыны дыр уг луы, но призо интыосы луылӥзы, кызьы районын, озьы ик республикаын но. Озьы ик конференциосы но, форумъёсы но пыриськылӥ. КАИ-ын ортчем конференциос мыным тужгес кельшизы.

Данил: Зэм, куиньнамы но олимпиадаосы пыриськылӥмы. Озьы ик конкурсъёслэсь но палэнэ ӧм кыле, призо интыосынымы но ушъяськыны быгатӥськомы.

Роман: МХК-я, экологияя, удмурт кылъя олимпиадаосы пыриськылӥ. МХК-я но экологияя интыосы ӧй вал ке, удмурт кылъя 2019-тӥ арын нырысетӥ инты басьтӥ. Конференциосы но пыриськылӥ.

— Секытэн сётске-а тӥледлы вылӥ дышетскон юртын дышетскон?

Данил: Школаен ӵошатыса, секытгес дышетскыны, но туж тунсыко. Секытэз учебной программа бордын, малы ке шуоно математика, кылсярысь, татын вылӥ, экономика предметэз но мургес дышетскиськомы.

Антон: Нырысь ик дышетскыны кутскем бере, дышетскон туж секытэн сётскоз шуыса малпаськем вал. Нош параосты кельтытэк дышетскыны ветлӥд ке, дышетӥсьёсын огъя кыл шедьтыны быгатӥд ке, дышетсконэд каньылэн мынэ вылэм. Умой студентъёс шоры дышетӥсьёс но умой учко.

Роман: Дышетскыны туж ик секыт ӧй шуысал, малы ке шуоно нырысетӥ курсын тросэз предметъёс школьной программаысь.

— Дышетскон юртады ортчись кыӵе ке ужрадъёсы пыриськиськоды-а? Яке студент улонлы дышыса ӧд вуэ на али?

Антон: Мон университетлэн улоназ пыриськыны кутски ини. КАИ-лэн хоккейя сборной командаяз шудӥсько. Ӵапак кемалась ӧвӧл гинэ Казаньысь вылӥ дышетскон юртъёс пӧлын студенческой чемпионат но кутскиз.

Данил: Дышетскон юртын ортчись ужрадъёсы пыриськыны тыршисько, но дыр котьку уг тырмы. Туннэ нуналэ мон но, одногруппникъёсы но дышыса вуимы, лэся, ини студент улонлы.

Роман: Нош мон али дышыны гинэ кутски, соин кыӵе ке ужрадъёсы пыриськыса ӧй вуы на.

— Пиос, тӥ школады, дышетӥсьёсты, анай-атайёсты понна гинэ ӧвӧл, ёросмы понна но бадӟым данъяськон луиськоды. Улонады ваньмыз асьтэос малпамъя мед быдэсмоз. Студент дыръёсты шулдыр, яркыт мед ортчозы, улонды ӟеч иворъёслы но пайдаё кенешъёслы узыр мед луоз.